Read zande Ruka 8 Bible Online

Ruka 8 - zande bible

Ruka 8

¹Si ki ta du wa gere fuo gi rago re toni, Yesu amerẽ rogo abaakporo na akporo dunduko nitungusi pai ki niyugu gu wene pangbanga nga ga ga Mbori ngbi, agu aboro nanidu bawe na ue i ki du na ko,

²na agu ade i ahusi yo be gbigbita atoro na kaza, nangia Maria, i aya ti ri Magadara, nga gu ri adaimona akuru kpotori yo saba,

³na Yoana dia Kusa nangia ga Erode buruku, na Susana na akura yo ni dungu yo, nga agu yo naamanga pa yo na gayo ũkumuko.

⁴Ho bakere rimbasa atiria ku ho ni, aboro ki ye koyo du ko ni rogo abakporo yo dunduko, ko ki gumba pai fu yo ni sanza ki ya;

⁵“Bamitunga andu ka mi gani tunga; ho ni ami he ni gu bete he ki tiwi ku pangba gene; i ki si he asi ni nduyo, azire ari yo ki riti he.

⁶Gu kura ha ki tiwi ku auru mbia; ho si akuru ni, si ki kpi bambiko ime adu nga ti ni te.

⁷Gu kura ha ki tiwi ku dagba akiwe yo, akiwe ki sono asona, ki nikandasi he.

⁸Gu kura ha ki tiwi ku rogo mbudu sende ki nisono asona, si ki nizuku ki nisusi gu ni nimi he mbata bara 100.” Ho ko agumba agi apai ni re, ko ki poi ku ari niya, “Gu ni du na tu gia ha ti ni ni gí he.”

⁹Gako abawiriki ki sana ko ki ya. “Gine nga gi sanza re?”

¹⁰Ko, ki ya, “I ayugu gu gbugbu pai nga ga ga Mbori ngbi fu roni; ono i afu he fu kura aboro ni kina sanza; i ngere, ka i abi nga he ya; i gi pai, ka i aruga nga tiyo na ni ya.”

¹¹Were, gi sanza re nga gere: Gu tunga re si nga ga Mbori pai.

¹²Gu nidu ku pangba gene nga agu yo nigi he; Satana ki ye, ki nidi pai kpotoyo yo, ka i aida nga pa ha ka bata ya.

¹³Gu nidu auru mbia si nga agu yo, ho i agi he ni i ki di pai ni ngbarago; ka tarãha adu nga ti yo ya, nga agu yo nidi pai ti toni rago; rago asada i ki koto akota.

¹⁴Gu nitiwi ku kiwe yo, nga agu yo nigi he, wa i namerã gayo gene berã pa zegino na ũkumuko na nyemu ahe rogo gi unga re ki kandasi he, ka si azu nga nzunzu ya.

¹⁵Gu i nimi rogo mbudu sende, i nga agu yo nigi gu pai re mbiko weneringiyo na gu rengo du kpotoyo yo, i ki ka kuti ni, ki nizu azu rogo hipai.

¹⁶“A nga boro sa, ho ka ni tigi baro ni, ni ka dada ha ni akoro, ki moi he tii barame yo te; ono ni ki moi he auru nguaha, agu aboro ka rimi ku dimo yo ki bi ima we.

¹⁷Bambiko a nga he sa ka du ni okooko ho te, si du adu ni kusikusi he; a nga he sa ka du ni gbuko te, si kuru akura ku imarago.

¹⁸Oni bánda tironi ti agu apai oni agia ha: bambiko gu ni du na he be ni, i afú he fu ni; gu ni adu nga he be ni ya, i adía kina gu du be ni.”

¹⁹Na Yesu ki ye na awirinako koyo du Yesu ni, ka si adu nga wa ka i mbedi koyo du ko ni be rimbasa ya.

²⁰Aboro ki gumba ha fu ko ya, “Anamo na awirinamo ru kina zegi yo, nikpi nyemu ka bi ro.”

²¹Ko ki ta karaga ha niya fu yo, “Anina na awirinami nga agu yo nagia pa Mbori, ki nimangi he.”

²²Si ki ta du wa gere ni gu rago re, Yesu azorõ ku kurungba yo, ko tigako, na gako abawiriki; ko ki ya fu yo, “Ani sí ku mbiti baime yo.” I ki tona ka ndu.

²³Wa i andu ko ati ni rame. Yuge ki ye gbe ari yo ku bangiri baime yo; kurungba ki tona ka hi be ime, i ki du ngba pai yo.

²⁴Abawiriki ki ta ye koyo du Yesu ni, nizingisi ko, niya, “Baira, Baira, ani nikakpi.” Ko ki zingi, ki niza yuge na sungburasungbura ime. Si ki ru, bakere zereda ki du.

²⁵Ko ki ya fu yo, “Gaoni idapase si wari?” I ki gunde agunde, si ki iriwo ti yo, i ki ya dagba yo, “Da du re, yuge agia sangbani na baime a?”

²⁶I ki da ku rogo ga aGerasa ringara, nga gu mbedi na Gariraya.

²⁷Ho Yesu akuru ni ku pia yo, kumba ki gbia ko naye bakporo yo naadu na adaimona ti ko, ko avo nga remu ti dungu arago te, ko asunga nga rogo bambu a te, ono dagba kina amurã.

²⁸Ho ko abi Yesu ni, ko ki poi ku ari, ki ti sande barangba ko, ki ya na bakere fugo, “Mi namanga wãi na mo, Yesu, nga Wiri Mbori du ni Bahe ki susi? Mi nazungadi ro, ka mo rúngosi nga re ya.”

²⁹Bambiko Yesu arugu gbigbita toro u guari ti kumba. Bambiko u azi ko ti dungu rago; i ki nibanda ko ki vodi ko ni azogbo na aganziri; ko ki kuadi azogbo, adaimona ki dandi ko adanda ku ngbakungba yo.

³⁰Yesu ki sana ko ya, “Rimoro nga da?” Ko ki ya, “Rimbasa”; bambiko dungu adaimona arimi ku kpotoko yo.

³¹Ami ki kpari fu Yesu gbe ki ya ka ko kedi nga ra ku ngbungumu yo ya.

³²Were, rimbasa amukuru nadu ho ni dungu ra niriki auru bagangara yo, ami ki kpari fu ko ko idi he fu ra ami rimi ku vuru amukuru yo. Ko ki idi he fu ra.

³³Adaimona ki kuru kpoto kumba yo, ki nirimi ku vuru amukuru yo; rimbasara ki zorõ ti ngba gango ime ku rogo baime yo, ami ki kpiki ime yo.

³⁴Agu aboro nariga ra ho i abi gu pai namangi ni, i ki oro ki gumba ha rogo bakporo na ringara yo.

³⁵Aboro ki ye ka bi gu pai namangi; i ki ye koyo du Yesu ni, ki bi gu kumba adaimona niguari ti ko, ko sungu pati ndu Yesu, na remu ti kpotoko, nzanga nago ti ko; i ki nigunde agunde.

³⁶Agu aboro nabi he ki gumba pa gu kumba adaimona azi ko wa ko ahu.

³⁷Agu aboro nadu ringara aGerasa yo dunduko kirikiri i ki kpari fu Yesu ko guari ti yo; bambiko bakere gunde azi yo. Ko ki zorõ ku kurungba yo, ki nikaraga tiko.

³⁸Ono gu kumba adaimona aguari ti ko ko ki kpari fu Yesu i ndu na ko; ono ko ki kedi ko, ki ya,

³⁹“Mo gá ku kpuro yo, ki gumba pa gu bakere pai mangi Mbori foro.” Ko ki ndu gako nduge ki gbandaka gu bakere pai agbandaka rogo bakporo yo dunduko, nga gu Yesu amangi fu ko.

⁴⁰Ho Yesu akaraga tiko ni, aboro ki udi ko, bambiko i asungudi ko dunduko.

⁴¹Mo ngére, kumba ki ye rimoko nangia Yairo, baira bambutiria nangia ko. Ko ki ti barangba Yesu pati nduko, ki kpari fu ko ko ye ku kpuko yo;

⁴²bambiko bangisa wiriko nadu ho, garãri adu bawe na ue, ri ki mbedi ka kpi. Wa ko andu rimbasa aboro ki gbisi ko.

⁴³De kureri anaga garãha ki du bawe na ue, ri abagi agu ahe nadu be ri dunduko fu amunganga, ka ri ahu nga be yo wa sa ya.

⁴⁴Ri ki ye aye gii ko yo, ki zadi ngba gako remu; gu kureri naaga si ki kiti ni ba sa.

⁴⁵Yesu ki ya, “Da zadi re?” Ho i ati kangu he ni dunduko, Petero ki ya, na agu yo nadu na ko, “Baira, rimbasa nigbisi ro ki niturã ro.”

⁴⁶Yesu ki ya, “Boro sa nizadi re; bambiko mi ini he ya tandu kuru ti re.”

⁴⁷Ho gu de aini he ni ya ri adu nga ni okooko ri te, ri ki ta ye nikio akio, ki ti sande barangba ko ki gumba gu pai ri azadi ko ti ni fu ko ku bangiri aboro dunduko, na wa ri abati ni ba sa.

⁴⁸Ko ki ya fu ri, “Vungu, ga idapase batasi ro; mo ndú zezeredi.”

⁴⁹Ho ko agumba ha ni were, boro ki ye rogo gu kporo nga ga baira bambutiria, ki ya, “Wiro kpi, ka mo fúdi nga Bayugupai ya.”

⁵⁰Ono ho Yesu agi he ni, ko ki karaga ha fu ko, “Ka mo gúnde nga ya, mo idi pai, ri abáta abata.”

⁵¹Ho ko ada ni ku kporo yo, ko aida nga fu boro ni peke ko te, kina aPetero na Yoane na Yakoba, na ba degude na nari.

⁵²Aboro ata kpara ni aume dunduko, nita wawa tipa ri. Yesu ki ya, “Ka oni kpári nga ya; ri akpi nga te, ri nara ara.”

⁵³Aboro ki nimomu ko amoma niini he ya ri kpi.

⁵⁴Ono ko ki ta zia ri ti beri, niyambu ri ki ya, “Degude, mo gúari.”

⁵⁵Torori ki yega, ri ki guari ni ba sa. Ko ki rugu yo ya i fu he fu ri ri ri he.

⁵⁶Avunguri ki kigi akiga; ono ko ki rugu yo ya ka i gumba nga gu pai namangi fu boro wa sa ya.