Read zande Ruka 9 Bible Online

Ruka 9 - zande bible

Ruka 9

¹Yesu ki yambu agu yo nanidu bawe na ue koyo du ko ni, ki fu tandu fu yo ki asia pa adaimona fu yo na ka husa akaza.

²Ko ki kedi yo ka tungusa pa ga Mbori ngb na ka husa agu yo du na kaza.

³Ko ki ya fu yo, “Ka oni dí nga he tipa gaoni nunguro ya, ngbondo te, mangu te, riahe te, na marã a te; ka baukadi dú nga be roni ni ba ue a ya.

⁴Gu bambu oni ka rima ku rogo ho, oni ki sungu ho, ki niguari yo.

⁵Agu yo ka dia nga roni ku gume ya, ho oni ka niguari ni rogo gu bakporo re, oni ki zanzia nvutu ti nduroni ni yugopai kuti yo.”

⁶I ki guari ki ta merã ku rogo akporo, nitungusi wene pangbanga, ki nihusi akaza rogo rago dunduko.

⁷Were Erode nangia bazogo agi pa agu apai namangi dunduko. Ko ki nibaki bangiriko ti ni gbe, bambiko agu aboro agumba ha ya Yoane azingi be kpio;

⁸agu yo ki ya si ngia Eriya ada, akura yo ki ya gu ni dagba agu anebi nadu mbata zingi be kpio.

⁹Erode ki ya, “Mi aima kata ri Yoane; ono da nga gi kumba mi agia pako re?” Ko ki nikpi nyemu ka bi ko.

¹⁰Ho amokedi ayega ni, i ki gumba pa agu apai fu Yesu i amanga. Ko ki rogo yo ki ndu na yo ku bakporo yo rimoho nangia Betesaida.

¹¹Rimbasa aboro ki ta ina ha ki nipeke ko. Ko ki di yo ku gume, ki nigumba pa ga Mbori ngbi fu yo, agu yo naida hu be kaza ko ki husi yo.

¹²Ho uru ati ni; agu yo nanidu bawe na ue ki ye, ki ya fu ko. “Mo ásia rimbasa, i ndu ku rogo akporo na ringara kirikiri pati yo, ka gbata barame, na riahe; bambiko ani du kina ngbakungba no.”

¹³Ono ko ki ya fu yo, “Oni fú he fu yo i ri he.” I ki ya, “Kpokuta be rani kina bisue na atĩo ue ― kina gu ka ani ndu ki ningbeke riahe tipa gi rimbasa dunduko re.”

¹⁴Bambiko i adu wa akumba 5,000. Yesu ki ya fu gako abawiriki, “Oni gúmba ha fu yo i susungu ku rogo rika yo wa aboro 50.”

¹⁵I ki mangi he wo, ki rugu yo i susungu dunduko.

¹⁶Ko ki di gu kpokuta nadu bisue na atĩo ue, ki ngere ku ari ki nifu tambuahe, ki nikuadi he; ki nifu he fu abawiriki i moi he barangba rimbasa.

¹⁷I ki ri he, ki nimbiki dunduko. I ki dungura gu mbusuruhe nanye be yo, abaga ki du bawe na ue.

¹⁸Si ki ta du wa gere, wa Yesu akpara ni sa ko, abawiriki ki du na ko; ko ki ta sana yo niya. “Rimbasa aboro niya da nga mi?”

¹⁹I ki karaga ha niya, “Yoane Babapatiza; ono kura yo naya, Eriya; kura yo ki ya, gu ni dagba agu anebi nadu mbata zingi be kpio.”

²⁰Ko ki gumba ha fu yo, “Ya oni tigaoni, da nga mi?” Petero ki karaga ha ki ya, “Ga Mbori Kristo nga mo.”

²¹Ono Yesu ki rugu yo ya, ka i gumba nga gere fu boro wa sa ya;

²²ki niya, “Wiri boro ka hi dungu apai, ga aYudo abaakumba ki basa pako na abairamotumo na abakeapai, i ki imi ko, ko ki zingi be kpio ti biata rame.”

²³Ko ki ya fu yo, “Gu ni nakpi nyemu peka re ni mbu gani apai, ki tumba gani wagiwagi ngua na uru, ki nipeke re.

²⁴Bambiko gu ni nakpi nyemu batasa ungani ni aíngisa ha aingisa; na gu ni ka ingisa ungani tipa re, ni abátasa ha abatasa.

²⁵Bambiko gini u du ti kumuko boro na gi zegino dunduko re, ki ingisi tini?

²⁶Bambiko gu ni ka zee amanga ni amanga tipa re na gimi apai, zee amanga Wiri boro amanga tipa ni, ho ko ka ye ni rogo gako taarimo na ga Bako na ga ziazia amaraika.

²⁷Ono mi nagumba ha fu roni ni rengo, agu yo kina dagba agu aboro ru erẽ, nikaakpi nga ya daho i ka bi ga Mbori ngbi ni.”

²⁸Si ki ta du wa gere rame ki du muambi fuo agi apai re, ko ki rogo aPetero na Yoane na Yakoba, ki nindu ku ri bagangara yo ka kpara.

²⁹Wa ko akpara, kpakpuko ki sa tihe, gako remu ki vuru avura wa imarago.

³⁰Oni ngére, aboro ue ki fura na ko nangia aMose na Eriya;

³¹i aye rogo imarago ka gumba pa gu kpio ko ka kpi Yerusarema yo.

³²Were aPetero na agu yo nadu na ko i ki yukura be rame. Ho i azingi ni rame yo, i ki bi ga Yesu imarago na agu akumba naru na ko ue.

³³Si ki ta du wa gere wa i aye ka ga pati ko, Petero ki ya fu Yesu, “Baira, du ani erẽ angba ti rani a; ani dudua abasura biata; gamo sa, ga Mose sa, ga Eriya a sa.” Ka ko aina nga gu pai ko agumba ya.

³⁴Wa ko agumba agi apai re, mai ki ye ku ba ri yo: i ki gunde agunde wa i arimi ku rogo mai.

³⁵Fugo ki poi mai yo, ki ya, “Wire du re, nyemuko ti re gbe; oni gi pako!”

³⁶Ho fugo asusi ni, i abi kina Yesu ni sa ko. I agumba nga pa agu apai bi yo wa sa te fu aboro ti gu rago re.

³⁷Si ki ta du wa gere, ho i azorõ ni ri bagangara yo wiso, bakere rimbasa ki gbia ko.

³⁸Mo ngére, kumba adu rimbasa yo ko ki poi ku ari, ki ya, “Bayugupai, mi nazungadi ro mo bi wire; bambiko bangisa wire nga ko.

³⁹Mo ngére, wa toro nazia ko, ko nakpara ni ba sa; u naba ko aba, fuge ki nigbadi ngbako, u ki guari ti ko nimburu ko ambura gbe.

⁴⁰Mi ki zungadi gamo abawiriki i do ru; ka omeyo arengba nga na u ya.”

⁴¹Yesu ki karaga ha ki ya, “Ako keretukeretu rika aboro nazanga idapase, ani araka na oni ki ini pai fu roni da wari? Mo yé na wiro kono du mi ni.”

⁴²Ko ki ta ye, daimona ki ba ko ku sende, ki fu imawirianya fu ko gbe. Ono Yesu ki za gbigbita toro, ki nihusi gude, ki nigasi ko fu bako.

⁴³Si airiwo airiwo ti yo dunduko tipa ga Mbori bakere tandu. Ono wa i akiga dunduko mbiko agu apai ko amangi he dunduko, ko ki ya fu gako abawiriki,

⁴⁴“Oni ídi agi apai re si rimi ku rogo turoni; bambiko i afú Wiri boro ku be aboro.”

⁴⁵Ka i aruga nga tiyo na gu pai re ya, si adu ni okooko ho ti yo, ka i aina nga ha ya; i ki nigunde agunde ti sana ko.

⁴⁶I ki ta paa apaa dagba yo niya da nga bakumbayo.

⁴⁷Ono ho Yesu aini he ni ya i nasaka pai ngbaduyo yo, ko ki di toni gude ki moi ko pati ko.

⁴⁸Ko ki ya fu yo, “Gu ni ka di gi toni gude re ku gume ni rimore ni ka di re ku gume; gu ni ka di re ku gume ni nadia gu ko nakedi re ku gume; bambiko gu ni du ni toni ni dagba roni dunduko, ni nga bakumbaroni.”

⁴⁹Yoane ki karaga ha ki ya, “Baira, ani abi boro ni nidandi adaimona ni rimoro; ani ki za ni, bambiko ni apeka nga rani te.”

⁵⁰Yesu ki ya fu ko, “Ka mo zá nga ni ya; bambiko gu ni ka du nga ni vuraroni ya ni du adu fu roni.”

⁵¹Si ki ta du wa gere, ho rame ambedi ni tipa dia ko ku ngbangbaturũ yo, ko ki sa kpakpuko kindi ka ndu ku Yerusarema yo,

⁵²ko ki kedi asunge ku mbata yo. I ki ndu ki nirimi ku rogo gu kporo nga ga aSomorono, ka mbakada ba tipa ko.

⁵³Aboro adia nga ko ku gume te, bambiko kpakpuko adu wa ko nasusa asusa ku Yerusarema yo.

⁵⁴Ho a Yoane abi he ni na Yakoba, nangia gako abawiriki, i ki ya, “Gbia mo ídi he ani yambu we si zorõ ngbangbaturũ yo ka gbarasa yo?”

⁵⁵Ko ki sa tiko, ki za yo.

⁵⁶I ki ndu ku rogo gu kura kporo.

⁵⁷Wa i amerẽ gene, gu boro ki ya fu ko. “Mi apéka ro rogo arago dunduko.”

⁵⁸Yesu ki ya fu ko, “Agu anya nasunga rogo yaro, azire ari yo ki sungu rogo angua: ono ba adu nga be Wiri boro ka ko pi auru he wa sa te.”

⁵⁹Ko ki ya fu gu kura ni, “Mo nipéke re.” Ko ki ya, “Gbia, mo ídi he fere mi ndu ka kpisida buba mbata.”

⁶⁰Yesu ki ya fu ko, “Mo he kangba aboro i ki kpisidi gayo kangba aboro; ono mo ndú ka tungusa pa ga Mbori ngbi rogo arago dunduko”

⁶¹Kura ni ki ya a, “Mi apéka ro. Gbia; ono mo ídi he fere mi sanango agu yo du kpure yo mbata.”

⁶²Ono Yesu ki ya fu ko, “A nga gu ni sa ka ni nadia sunge ku beni ki ngere ku sa yo, ka re na rima ku rogo ga Mbori ngbi yo te.”