Read zande Pa Fu Rugute ni Ue he 10 Bible Online

Pa Fu Rugute ni Ue he 10 - zande bible

Pa Fu Rugute ni Ue he 10

¹“Ni gu rago re Yekova aya fere wẽ, ‘Mo séke kpasakpasa ambia ue wa gu naadu mbata, ki ye kono du mi ni ku ri bagangara no, mo ki mangi sanduki rogo ngua.

²Mi aké agu apai foro ti agu ambia re mi ake ti gu bambata ha mo akuadi, mo ki moi he ku sanduki yo.’

³Si du mi ki mangi sanduki rogo gu ngua du wa mbegure, ki seke kpasakpasa ambia ue wa gu naadu mbata, ki ndu ku ri bagangara yo, agu ambia ue re ki du bere.

⁴Ko ki ke pai ti agu ambia re, wa kina gu keke pai naadu mbata, arugute bawe nga gu Yekova agumba ha fu roni ri bagangara yo bebere we yo ni gu uru nga ga gbuu; Yekova ki fu he fere.

⁵Mi ki aria tire ki zorõ ri bagangara ku pa di no, ki moi agu ambia re ku rogo gu sanduki mi amangi he; si ki du yo kindi a wa Yekova arugu re.”

⁶Awiri aYisaraere andu nunguro tona Berota Bene-yakana yo ki da ku Mosera yo. Arona ki kpi yo, i ki kpisidi ko kina yo; Erazara nangia wiriko ki nimángi sunge ni boromotumo ku ba ko.

⁷Yo i aguari ni ka ndu nunguro ku Gudugoda yo, tona Gudugoda yo ki da ku Yotebata yo ringara awiriadi yo nga ga ime.

⁸Ti gu rago re Yekova akpara ngbatunga Revi, i nitindi sanduki nga ga mokido nga ga Yekova, ka aru bara bangiri Yekova ka amanga sunge fu ko, ka afu maku ni rimoko, ki da ku areme.

⁹Si du adu nga bete he ti ni na ringara a be aRevi dagba awirinayo ya. Ono i abi gayo mosoro be Yekova, wa Yekova gaani Mbori agumba ha fu yo.

¹⁰“Mi ki sungu ri bagangara yo, wa ti bambata rago uru ki du 40 na yuru 40 a, Yekova ki dege tuko fere ti gu rago re a; Yekova akpi nga nyemu ka gbarasa roni te.

¹¹Yekova ki ya fere wẽ, ‘Mo gúari, mo ndú ga nunguro na aboro, i ndu ka dia ringara, nga gu mi azunga he fu abayo ka fu he fu yo.’

¹²“Ono awere, aYisaraere, gini pai Yekova gaoni Mbori nakpi nyemu he be roni? nga kina roni ka gunde ti Yekova gaoni Mbori, ka peka kina gako apai, ki nikpi nyemu ko, ki nimangi pa Yekova gaoni Mbori na kpotoroni yo dũ, na mbisimoroni dũ,

¹³ka ka kuti ga Yekova arugute na gako rugaapai, nga gu mi aruga roni kuti ni ni gi uru re tipa gaoni wenepai, te?

¹⁴Oni ngere, ngbangbaturũ nga ga Yekova he nga gaoni Mbori, na gu ngbangbaturũ nga ga angbangbaturũ a, na kpotosende, na agu ahe dunduko du rogo ho;

¹⁵ono rago angba ti Yekova kpotoko yo tipa abaroni ko akpi nyemu yo; ko ki sia angbatungayo fuo yo, nga kina roni ku ri aboro dunduko, wa du he ti gi uru re.

¹⁶Oni yére gu kpotongba du ngbaduroni yo, ka nyakari adú nga ti roni berewe ya.

¹⁷Bambiko Yekova gaoni Mbori, ko nga Mbori ri ambori, nga Gbia ri agbia, nga bakere Mbori, nga iranyaka, ni iiriwo ko, aberã nga pa aboro ya, adia nga marã mobirimo a ya.

¹⁸Ko ninasara ngbanga fu awirinyaure na fu adekurugbo, ki nikpi nyemu kungba boro, rogo fu riahe fu ni na roko.

¹⁹Si du oni ka kpi nyemu kungba boro tigaoni ti ni; bambiko oni adu ni kungba aboro ringara Ezipeta yo.

²⁰Oni nigúnde ti Yekova gaoni Mbori; ko oni ka amanga pa ko, ki ka kina kuti ko, ki nizunga he ni kina rimoko.

²¹Ko nga gaoni utambuahe; ko nga gaoni Mbori namangi gi bakere pai na iiriwoapai re fu roni, nga gu oni abi he ni bangironi.

²²Abaroni andu ku Ezipeta yo wa aboro 70 gbua; awere Yekova ngeesi roni wa akerekuru nga ga ngbangbaturũ ra ni rimbasa roni.