Read zande Pa Fu Rugute ni Ue he 13 Bible Online

Pa Fu Rugute ni Ue he 13 - zande bible

Pa Fu Rugute ni Ue he 13

¹“Ka nebi kuru dagba roni, watadu barari amusumo, ki fu yuguyuguhe fu roni, watadu iiriwo yuguyuguapai,

²ka gu yuguyuguhe watadu iiriwo yuguyugupai ye ka du ki mangi, ka ko gumba pai fu roni, niya, ‘Ani ndú fuo kura ambori, ani mángi pa yo,’ nga gu oni aina nga pa ha ya,

³ka oni adéga nga turoni sa agu apai nga ga gu nebi re ya, watadu fu barari amusumo a ya; bambiko Yekova gaoni Mbori naasada roni, ka ina ha si ngia oni nakpi nyemu Yekova gaoni Mbori na kpotoroni yo du, na mbisimoroni dũ.

⁴Oni apéka fuo kina Yekova gaoni Mbori, ki nigunde ti ko gbe, ki nika kuti gako arugute, ki nigi fugoko, oni amánga kina pa ko, ki nika kina kuti ko.

⁵Ono gu nebi re watadu gu barari amusumo re i aniimi ni aimo, bambiko ni pe kina pa samungu kuti Yekova gaoni Mbori, nisa roni oni mbu gu gene Yekova gaoni Mbori arugu roni oni nita ngba ha, nga gu ko naakusi roni ringara Ezipeta yo, ki tumo roni kporo akanga yo. Wo oni ka niba gu pai ku sa yo dagba roni nga gbigbita ha.

⁶“Ka wirinaroni nga boro wirinaroni, watadu gu wironi nga de, watadu adiaroni du be roni, watadu bakureroni, nga gu ni du mbisimoni ti roni, zomia roni ni gbuko, niya, ‘Ani ndú ka manga pa kura ambori,’ nga gu oni aina nga pa ha ya, oni na abaroni a ya,

⁷nga agu ambori nga ga agu aboro du pati roni kirikiri, mbedi ambeda na oni, watadu turũ aturã na oni, du ti mburu kpotosende ku bani sa ki da ti gu kura digida kpotosende,

⁸ka oni aída nga pa ha fu ni ya, ka oni adéga nga turoni fu ni a ya, ka nunga ni adu nga ti roni ya, ka oni ambú nga ni ya, ka oni aóka nga ni a ya;

⁹ono oni aniimi ni aimo; beroni nikanidu ni bambata ha ku rini sa imo ni, fuo ho be aboro dũ.

¹⁰Oni ki nisopo ni asopa ni ambia, ni ki kpi akpi, bambiko ni gbata gu pai nga gbe roni ku sa yo ti Yekova gaoni Mbori, nga gu ko naakusi roni ringara Ezipeta yo kporo akanga yo.

¹¹AYisaraere ki gi he dunduko, ki nigunde, ka i amánga nga kura gbegberẽpai berewe ni ngbatunga gu i amanga dagba yo re ya.

¹²“Ka oni gi pai i nigumba ha tipa bakporo sa dagba gaoni abaakporo, nga gu Yekova afu fu roni oni nira yo, ya

¹³gbegberẽ sino aboro guari awere dagba roni yo, ki gbe araki rogo gu bakporo re ku sa yo, niya, ‘Ani ndú ka manga pa kura ambori,’ nga gu oni aina nga pa ha ya,

¹⁴oni ki nisana he, ki niwisigi he, ki sana he nyanyaki; oni ngére, ka si du ni rengo, gu pai ki du nzunzu re, ya i namanga ngbatunga gu kere gbegberẽpai re dagba roni ni rengo,

¹⁵oni ki mangi araki rogo gu bakporo re ni basape, ki gbarasi he agbarasa kpakaya, na agu ahe dunduko du rogo ho, na gaha zogozogo anya, ni basape.

¹⁶Oni ki nidungura gu gbugbu ahe dũ nga gaha ku ngba gaha gene bakporo, ki zo gu bakporo re, na gu gbugbu ahe re dunduko, wa zozo motumo na baha fu Yekova gaoni Mbori. Si ki du ni guguda nye anye kindi, ka i adúa nga ha berewe ya.

¹⁷Gu he Mbori atiwa ha ka oni ká nga kuti ni ku be roni wa sa ya; si du Yekova ka sa tiko ti ni ti gako nzengerenzengere zinga, ki yugu inapai fu roni, nungaroni ki du ti ko, ko ki ngeesi roni, wa ko azunga he fu abaroni,

¹⁸ho oni nikanidege turoni ni sa fugo Yekova gaoni Mbori, ka ka kuti gako arugute nga gu rugu mi roni kuti ni ni gi uru re, ka amanga gu pai dũ ni ruru he bangiri Yekova gaoni Mbori.