Read zande Pa Fu Rugute ni Ue he 14 Bible Online

Pa Fu Rugute ni Ue he 14 - zande bible

Pa Fu Rugute ni Ue he 14

¹“Oni nga awiri Yekova gaoni Mbori; ka oni dé nga kpotoroni ya, watadu kpé mange ngakaĩ bangironi tipa kpio boro a ya.

²Bambiko oni tigaoni du ni kparakpara ziazia aboro fu Yekova gaoni Mbori, ono Yekova asia roni oni du ni kparakpara rikaaboro fu ko, dagba agu aboro dunduko du auru kpotosende.

³“Ka oni niri nga wasiwasi he ya.

⁴Agi ra re nga agu anya oni ka ri ra: babagara, kandoro, meme,

⁵nzungba, gbangbaria, gbodi, na ameme nga ga nvuo ra, ngbiimo, na gu nya du wa mbangana, na kandoro du ri gangara.

⁶Agu anya ni ba sa sa du na kparakakparaka sukutura du kpandura yo ni sarisari he a, nafuga riahe afuga berewe, agi anya re, ami oni ka ri ra.

⁷Agi ra re ka oni arí nga ra ya, nga agu ra nafuga riahe, na dagba agu ra yo du na kpandura yo ni sarisari he: kameri, na kiki ndakuta, na gu nya du ri mbia du wa ndakuta, bambiko ami nafuga riahe ono ka sukutura akparaka ngaya, amiduninyakorokpafuroni.

⁸Mukuru a, bambiko sukuturu ni kparakakparaka ha, ono u afuga nga riahe te, u du ni nyakorokpa fu roni. Ka oni ari nga pasio ra ya, ka oni azáda nga kangbara a ya.

⁹“Oni ka ri agi ra re dagba agu atio du tii ime yo dunduko; agu ra du na akiwe ti ngongora na ire ti ra oni ka ri ra.

¹⁰Agu ra adu nga na akiwe ti ngongora na ire ti ra ya, ka oni nirí nga ra ya; ami du ni nyakorokpa fu roni.

¹¹“Agu azire dunduko du dagba ra ni gigiri ra oni ka ri ra.

¹²Ono agi ra re oni ka niri nga ra ya: nga nguku na dingimo, na ngbandabare,

¹³na nzagu, na kpiakpia, na sosorofuge na angbatungara;

¹⁴na ngbatunga azire akua dunduko;

¹⁵na surutio, na gboõ, na zire ime, na bakiki na angbatungara;

¹⁶gu rukutu agbuku, na bazizi, na gbiiwi;

¹⁷na perekani, na kubu, na ngoroni,

¹⁸na gonyo, na naaranaara, na angbatungara; na ndaasi na fura.

¹⁹Agu agbiro dunduko du na pupo ti ra nagbe tira sande ami du ni nyakorokpa fu roni ka oni nirí nga ra ya.

²⁰Gu gigiri agbiro dunduko du na pupora ti ra, oni ka niri ra.

²¹“Ka oni nirí nga kotokakpi ya; oni ki nifu he fu kina gu kungba boro ka du kpuroni yo, ni ri he, watadu oni anibagi he fu kungba boro; bambiko oni tigaoni nga kparakpara ziazia rikaaboro fu Yekova gaoni Mbori. “Ka oni nipási nga wiri meme rogo mamu nai ya.

²²“Oni nifú sa dagba bawe ni rengo rogo agu ahe nazuga fu roni dagba gaoni tunga, nga gu nakura ati yo na garã na agarã.

²³Oni ki niri he ku bangiri Yekova nga gaoni Mbori, kina rogo gu ba ko ka sia ha rimoko du rogo ho, gu sa dagba bawe nga ga gaoni zende ahe, ga gaoni imekakue, na ga gaoni nzeme, na bambata vungu nga ga rimbasa abagara na gaoni rimbasa akandoro; ya oni wiriki pa gunde ti Yekova gaoni Mbori na arago a dũ.

²⁴Ono ka gene ku rogo gu ba re du ni bagbanga ha fu roni nga gu sia Yekova gaoni Mbori rimoko du yo, ho Yekova gaoni Mbori ka fu maku ni fu roni, ka oni arengba nga ka tinda ha koyo ya; bambiko turũ gu rago re aturã na oni,

²⁵si du oni ki bagi he tipa marã, ki vo gu marã re ku beroni, ki ndu ku rogo gu rago sia Yekova gaoni Mbori he.

²⁶Oni ki fu gu marã re tipa gu he tororoni akpi nyemu he, tipa abaabagara, watadu tipa akandoro, watadu tipa imekakue, watadu tipa baripiro, watadu tipa gu he tororoni ayugo ho fu roni. Oni ki ri he yo bara bangiri Yekova gaoni Mbori, oni ki ningi, oni na gaoni aborokporo.

²⁷Gu Revi ka du kpuroni yo, ka oni ambú nga ni ya, bambiko bete he beni na ringara na oni du nga ti ni te.

²⁸“Ti digida agarã ni ba biata oni aniye na gaoni sa dagba bawe dunduko nga ga agu ahe nazuga fu roni rogo kina gu garã re, oni ki nimoi he kina ku kpuroni yo;

²⁹gu Revi bambiko ni na bete he beni na ringara na oni te, na gu kungba boro, na gu wirinyaure, na gu dekurugbo, nga agu yo ka du kpuroni yo a, i ayé ki ri he ki mbiki; Yekova gaoni Mbori ki fu maku fu roni rogo gaoni sunge nga gu beroni anamanga ha dunduko.