Read zande Pa Fu Rugute ni Ue he 15 Bible Online

Pa Fu Rugute ni Ue he 15 - zande bible

Pa Fu Rugute ni Ue he 15

¹“Ti digida agarã ni ba saba oni animangi pa mbu pa bape.

²Sino mbu pa bape nga gere; airabape dunduko animbu pa gu he i afu fu akurayo na fu awirinayo; i anisana nga he tipa ha berewe te, be wirinayo na kurayo a te, bambiko i aima tingida pa ga Yekova mbu pa bape.

³Kina gu nga ga kungba boro oni ka nisana he tipa ha; ono gu he nga kina gaoni du be wirinaroni oni akanimbu he.

⁴Ono rungorungo boro adú nga dagba roni te, bambiko Yekova afú maku fu roni rogo gu ringara nga gu Yekova gaoni Mbori afu fu roni ka dia ha ni ringara,

⁵kina gu ka oni dege turoni nyanyaki sa fugo Yekova gaoni Mbori, ka kparia pa gu rugute rugu mi roni kuti ni ni gi uru re ka amangaha.

⁶Bambiko Yekova gaoni Mbori nikafu maku fu roni, a wa ko akido roni. Oni afú abape fu dungu arikaaboro, ono oni adía nga bape be boro tigaoni te; ono oni azóga dungu arikaaboro, ono i azóga nga roni te.

⁷“Ka rungorungo boro du dagba roni, nga wirinaroni, rogo gu gaoni kporo rogo gaoni ringara nga gu Yekova gaoni Mbori afu fu roni, ka oni anyákasa nga kpotoroni yo ya, ka oni akísa nga beroni be wirinaroni ya,

⁸ono oni aniza beroni aza fu ni, oni ki nifu bape fu ni, rengbe arengba na gani zingohe tipa gu he ni akpi nyemu he.

⁹Oni bánda tironi ka gbegberẽ berã du nga ngbaduroni yo ya, oni ki ya, ‘Gu saba garã, nga garã mbu pa bape, ragoho da’, berãroni ki du gbegberẽ fu rungorungo wirinaroni, ka oni afu nga bape fu ni ya, ni ki kpari fu Yekova kuti roni, si ki du ni ingapai fu roni.

¹⁰Oni ki nifu he afu fu ni zaza, ka oni arúngo nga kpotoroni yo ho oni nafu he ni fu ni ya; bambiko mbiko gu pai re Yekova gaoni Mbori ka fu maku ti ni fu roni rogo gaoni mangaapai dunduko, na rogo agu apai dunduko oni amánga.

¹¹Bambiko rungorungo aboro agó nga rogo gu ringara te re; si du rugu mi roni ti ni, niya, Oni aniza beroni aza fu awirinaroni, na fu gaoni airazingohe, na fu gaoni rungorungo aboro, rogo gaoni ringara.

¹²“Gu wirinaroni, nga boro Ebere, watadu de Ebere, ka du ni bagibagi boro fu roni, ni animangi sunge fu roni tipa garã sita, rogo gu saba garã oni ki mbu ni ni guari be roni ti sunge kanga.

¹³Ho oni ka nimbu ni ni ni guari be roni ti sunge kanga ka oni ambú nga ni ni ga ni ku beni ya.

¹⁴Oni anifu ahe fu ni kpaima dagba gaoni rimbasa akandoro, na rogo gaoni bataka zende ahe yo, na ti gaoni bapirã imekakue yo; wa Yekova gaoni Mbori nafu maku fu roni oni nifú he fu ni kina a wo.

¹⁵Oni ki nitingidi gu pai nga oni adu ni akanga ringara Ezipeta yo, Yekova gaoni Mbori ki tumo roni, si du rugu mi roni ti ni ti gi pai re ni gi uru re.

¹⁶Si adu were, ka ni ya fu roni. ‘Mi agúari nga pati roni te’, bambiko ni nakpi nyemu roni na gaoni aborokporo, bambiko ni wenengaĩ na oni,

¹⁷oni ki nidi kofodi ki koro tuni na ni kuti ngbadimo, ni ki du ni gaoni moyambu nye anye kindi. Oni animangi gaoni nagbindi kina wo a.

¹⁸Ka si adú nga ni nyanyaki Dai fu roni ya, ho oni ka mbu ni ni ni ga zezeredi; mbiko gu sunge ni amangi fu roni garã sita mosoroho adu nga fu ni wa ga aborosunge te, ono Yekova gaoni Mbori nikafu maku fu roni rogo agu apai dunduko oni amánga.

¹⁹“Gu bambata awiri anya nga abara dunduko ami ka vunga ra dagba gaoni rimbasa abagara na gaoni rimbasa akandoro, oni anikpara ra ziazia fu Yekova gaoni Mbori; oni animangi nga sunge na bambata vungu nga ga babagara te, ka oni akpé nga mange kpoto gu bambata wiru nga ga akandoro ya.

²⁰Oni aniri ru bara bangiri Yekova gaoni Mbori na gara na agarã rogo gu ba nga gu Yekova ka sia ha, oni na gaoni aborokporo.

²¹Ono ka serõ du ti ru, ka u du ni gbarĩgbarĩ ru watadu na vurari, watadu kere serõ ka du ti ru, oni anifu nga ru ni motumo fu Yekova gaoni Mbori te.

²²Oni aniri ru kina kpuroni yo; birikobiriko boro na gigiri boro a rengbe ka ri ru, wa ka u du ni gbangbaria, watadu nzungba.

²³Kina kureru oni ka niri nga ha ya; oni aniuka ha ku sande wa ime.