Read zande Pa Fu Rugute ni Ue he 16 Bible Online

Pa Fu Rugute ni Ue he 16 - zande bible

Pa Fu Rugute ni Ue he 16

¹“Oni nibérẽ pa gu diwi nga Abiba, ki ka kuti manga pa pumbo susiri fu Yekova gaoni Mbori; bambiko rogo gu diwi nga Abiba re, Yekova gaoni Mbori akusi roni ringara Ezipeta yo yuru.

²Oni ki nifu ũmotumo tipa pumbo susiri fu Yekova gaoni Mbori, dagba rimbasa akandoro na rimbasa abagara, rogo gu ba nga gu Yekova asia rimoko du rogo ho.

³Oni aniri nga ha na gu kpokuta du na agbooro ti ni te; oni aniri he na gu kpokuta adu nga na agbooro ti ni ya, tipa uru saba, nga gu kpokuta nga ga rungo ― bambiko oni akuru Ezipeta yo gburungagburunga ― ya oni tingidi pa gu uru oni akuru ti ni ringara Ezipeta yo ti agu arame dunduko wa oni ka du ni ungaroni.

⁴1 anibi nga agbooro rogo gaoni bangbandarago te tipa rame saba; a nga wiri pasio sa nga gu oni nifu ni motumo ti bambata nyemu, aninye nga rogo gu yuru re dunduko ki da ku wiso te.

⁵Ka oni ími nga nya pumbo susiri kpuroni yo ya, nga gu Yekova gaoni Mbori nafu fu roni;

⁶ono kina rogo gu ba Yekova gaoni Mbori asia ha rimoko du rogo ho, yo oni ka niimi motumo pumbo susiri ku ho ni nyemu, ho uru nati ni, ti kina gu rago oni akuru Ezipeta yo.

⁷Oni ki nipasi he apasa ka ri he rogo gu ba Yekova gaoni Mbori ka sia ha. Oni ki niguari wiso ka ga koyo du gaoni bamburoko ni.

⁸Rame sita oni nirí gu kpokuta adu nga na agbooro ti ni ya; ti saba rame bairisiirisi gbuu nikanidu fu Yekova gaoni Mbori; ka oni nimángi nga sunge ragoho wa sa ya.

⁹“Oni anigedi aposo saba; oni anitona geda ha ti gu rago oni atona ke zende ahe ki gedi aposo saba kina ho.

¹⁰Oni ki nika kuti pa manga gu pumbo nga ga aposo fu Yekova gaoni Mbori, ki nifu gaoni ruhe nga gu gamunihe du zaza mbiko nyemuhe, nga ga aũberoni, nga gu oni ka fu he wa Yekova gaoni Mbori nafu maku fu roni.

¹¹Oni ki ningi bara bangiri Yekova gaoni Mbori, oni na awironi na agu awironi nga ade, na gaoni amoyambu, na gaoni anagbindi, na gu Revi du kpuroni yo, na gu kungba boro, na gu wirinyaure, na gu dekurugbo ka du dagba gaoni aboro, rogo gu ba Yekova gaoni Mbori ka sia ha rimoko du rogo.

¹²Oni ki nitingidi gu pai nga oni adu ni akanga Ezipeta yo; oni ki niberẽ pa agi arugaapai re ka amanga ha.

¹³“Oni ki nika kuti pa manga gu pumbo nga ga abasura tipa rame saba, fuo dungura oni gaoni zende ahe batakaha yo na kakue bapirã imekakue yo.

¹⁴Oni ki ningi angi rago gaoni pumbo, oni na awironi, na agu awironi nga ade, na gaoni amoyambu, na gaoni anagbindi, na gu Revi na gu kungba boro, na gu wirinyaure, na gu dekurugbo ka du kpuroni yo.

¹⁵Oni anika kuti pa manga pumbo fu Yekova gaoni Mbori tipa rame saba kindi rogo gu ba nga gu Yekova ka sia ha; bambiko Yekova gaoni Mbori afú maku fu roni rogo gaoni zugazuga ahe, na rogo agu asunge nga ga beroni, oni ki du na ngbarago kpaima.

¹⁶“Gaoni akumba aniye rogo garã sa bara biata ku bara bangiri Yekova gaoni Mbori ku rogo gu ba ko ka sia ha; ti rago gu kpokuta adu nga na agbooro ti ni ya, na ti rago gu pumbo nga ga aposo, na gu pumbo nga ga abasura. Ka i niyé nga na ku beyo ku bara bangiri Yekova ya;

¹⁷aboro ni ba sa sa agáma he a wa rengbe omeni na ni, kina ku sangba gu maku nga ga Yekova gaoni Mbori, nga gu fu ko fu roni.

¹⁸“Abasapungbanga na abarumbatayo oni ka maa yo rogo gaoni akporo dunduko nga gu Yekova gaoni Mbori nafu fu roni, a wa du angbatungaroni, i ki nisari ngbanga fu aboro ni ruru sarangbanga.

¹⁹Oni aniirasi nga sarangbanga airasi te; ka oni abérã nga pa aboro kuti pa kindiga yo ya; ka oni adía nga marã mobirimo a ya, bambiko marã mobirimo navurasi bangiri iratatamana avurasi, ki sa gu rurupai nga ga ruru aboro.

²⁰Oni nipéke fuo kina agu apai du ni ndikidi ruru he, oni ki nye ni ungaroni, ki di kumbo gu ringara nga gu Yekova afu fu roni nga gaoni Mbori.

²¹“Ka oni nirũ nga ngbatunga gu ngua ni Asera nga ngbama pati gu bamotumo nga ga Yekova gaoni Mbori ya, nga gu oni ka amanga ni gaoni.

²²Ka oni adúa nga sese ambia tipa roni; nga gu Yekova gaoni Mbori nasoga ha ya.