Read zande Pa Fu Rugute ni Ue he 18 Bible Online

Pa Fu Rugute ni Ue he 18 - zande bible

Pa Fu Rugute ni Ue he 18

¹“Aboromotumo nga aRevi, zavura ngbatunga aRevi dunduko, i adú nga na bete he na ringara dagba aYisaraere te; i arí agu amotumo nga ga Yekova i nimangi he na we, na gu rũahe du fu ko.

²I adú nga na ringara dagba awirinayo te; ono Yekova afu gayo ahe fu yo, a wa ko agumba ha fu yo.

³Gere nikangia ga aboromotumo he be aboro, be agu yo nafu motumo, ka si ngia babagara watadu kandoro: i anifu abera fu aboromotumo, na biringa ngbara ue, na aũ vura yo.

⁴Gu makawa nga ga gaoni zende ahe na ga gaoni imekakue, na gaoni nzeme, na makawa gaoni mange akandoro, oni anifu he fu yo.

⁵Bambiko Yekova gaoni Mbori sia yo dagba angbatungaroni yo, i ru ka manga sunge ti rimo Yekova, i na awiriyo nye anye kindi.

⁶“Ka Revi sa ye ku kpuroni yo dagba ga aYisaraere akporo yo, rogo gu ringara ni nasunga rogo ― ki ye na nyemu gu ba ti ― ni ku rogo gu ba Yekova ka sia ha,

⁷ni ki nimangi sunge ti rimo Yekova gani Mbori, a wa agu aRevi nga awirinani namanga ha, nga agu yo ninaru bara bangiri Yekova.

⁸I adú na bete ahe beyo wa sa ka ri he, gbia kuti gu naye dagba agu ahe i abaga ha nga ga gayo igiigi ahe nga ga ringara.

⁹“Ho ka oni da ni ku rogo gu ringara Yekova gaoni Mbori ka fu he fu roni, oni awírika nga ka manga pai fuo gu kere gbegberẽ sino nga ga agu arikaaboro re te.

¹⁰A nga boro sa ka du dagba roni ka ida ka fu wirini ni susi rogo we wa motumo nga kumba watadu de te, na gu ni nara fu ngua, na gu ni namanga pa soroka, na adoavure, na abinza,

¹¹na abaziaboro ni biri a, na asana sangbaatoro, na airamangu, na agumba sangbaatoro na agu yo nagbata pai be agu yo nakpi a te.

¹²Bambiko gu ni namanga ngbatunga agi apai re, ni bangiri Yekova ni kere gbegberẽ sino boro bambiko mbiko gi gbegberẽapai re Yekova gaoni Mbori nado agu arikaaboro re ti ni barangba roni.

¹³Oni adú zanga pai ku ri roni bara bangiri Yekova gaoni Mbori.

¹⁴Bambiko agi arikaaboro re oni ka dia yo ni gaoni, naadega tuyo fu agu yo namanga pa soroka, na fu airamanga ngua. Ono tipa roni, Yekova gaoni Mbori aida nga ha fu roni oni mangi he te.

¹⁵“Yekova gaoni Mbori afú nebi sa fu roni dagba roni nga wirinaroni, wa mi ― ni oni ka dega turoni fu ni―

¹⁶tipa gu pai oni akpi nyemu he be Yekova gaoni Mbori Orebe yo rogo gu uru nga ga gbuu, niya, ‘Ka ani gí nga fugo Yekova berewe nga gaani Mbori ya, ka ani bi nga gi bakere we re berewe a ya, ani ka kpika.’

¹⁷Yekova ki ya fere, ‘I gumba gu pai wenengaĩ gumba yo.

¹⁸Mi afu nebi sa fu yo dagba awirinayo yo, wa mo; mi amáa gimi apai ku ngbani, ni agúmba agu apai dunduko fu yo nga gu mi ka ruga ni na ni.

¹⁹Si ayé ka du wa gere, ya gu boro nikadega nga tuni sa gu gimi apai gu nebi re ka pe he ti rimore ya, mi asána kina ni ti ni.

²⁰Ono gu nebi nikape pai ni ruka ti rimore, nga gu pai mi aruga nga ni ni gumba ha ya, watadu ni nikagumba pai ti rimo kura ambori, gu nebi re akpí akpi.’

²¹Ka oni ya ku kpotoroni yo, ‘Waĩ ka ani ini gu pai nga gu Yekova agumba nga ha ya?’―

²²ho nebi nagumba pai ni ti rimo Yekova, ka gu pai re aye nga ki mangi, ka si adu nga a ya, gure ka ngia gu pai Yekova agumba nga ha ya. Gu nebi re ni nigumba ha ni ruka, ka oni agúnde nga be ni ya.