Read zande Pa Fu Rugute ni Ue he 19 Bible Online

Pa Fu Rugute ni Ue he 19 - zande bible

Pa Fu Rugute ni Ue he 19

¹“Ho Yekova gaoni Mbori ka manga arikaaboro ni, nga agu yo Yekova afu gayo ringara fu roni, oni ki di ba yo, ki niraki rogo gayo abaakporo, na rogo gayo abambu;

²oni ka kparaka abaakporo biata ni gaoni dagba gaoni ringara, nga gu Yekova gaoni Mbori afu fu roni oni rogo ho.

³Oni ambákada agenehe tipa roni, ki kparaka abangbanda gaoni ringara, nga gu Yekova gaoni Mbori aidi he fu roni oni rogo ho, ki kparaka rogo ho biata, ya abaimiaboro ni ba sa sa nioro koyo.

⁴“Gere nga gu pai dũ tipa gu baimiboro nikanioro koyo ki nye ni ungani. Gu ni imi kurani ni bino ninasoga nga ni mbata ya―

⁵wa ho boro nindu ni na kura ni ku bire yo ka de ngua, ni ki fo beni ti ngua na mangua ni nide ngua, mangua ki uru ti penehe ki de kura ni, ni ki kpi ni anioro kina ku rogo gu bakporo sa dagba agi abaakporo yo re ki nye ni ungani;

⁶bairibape kpio gu boro re ka do fuo baimiboro, ho ngbaduni niimi ni, ki zi ni, bambiko pa gbanga gene, ki imi ni ni ba sa, ho ni arengba nga ni na kpio ya, bambiko wa ni asoga nga ni mbata ya.

⁷Si du rugu mi roni ti ni, niya, Oni kpáraka abaakporo biata tipa roni.

⁸Ka Yekova gaoni Mbori kiisi gaoni ngbandarago, wa ko azunga he fu abaroni, ka fu gu ringara fu roni dunduko ko akido pa ha ka fu he fu abaroni―

⁹ka oni ka kuti rugute dunduko ka manga ha, nga gu rugu mi roni na ni ni gi uru re, oni nikpí nyemu Yekova gaoni Mbori ka peka fuo gako apai na uru dũ ― oni ki moi kura abaakporo biata tipa roni gbia kuti gi du biata re,

¹⁰ya ka kure boro wenesa uka nga rogo gaoni ringara ya, nga gu Yekova gaoni Mbori afu fu roni ri gaoni, ka kureni adu nga ku ri roni ya.

¹¹“Ono ka gu boro asoga kura ni mbata, ki gbu ka sunguda ni, ki guari kuti ni, ki mangi ni nzunzu ni ki kpi akpi, ni ki oro ku rogo gu bakporo sa dagba agi abaakporo re;

¹²si du abaakumba gu bakporo re ki kedi sunge i gbata ni yo, ki kusi ni fu bairibape kure, ya i imi ni.

¹³Nungani animangi nga roni te, ono oni anibatasi boro wenesa abatasa ringara aYisaraere yo, si ki du ni wenepai fu roni.

¹⁴“Ka oni gbísi nga bangbandarago nga ga akuaroni ya, nga gu i amoi he bakuru yo, rogo gaoni angbi rogo gu ringara nga gu Yekova gaoni Mbori afu fu roni oni rogo ho.

¹⁵“Boro anidu nga ni dezire kuti boro tipa irairapai te, watadu tipa ingapai, tipa gu ingapai mangi ni; kina ku ngba adezire ue watadu ku ngba adezire biata, i ka nimbakadi pai ku ngbayo yo.

¹⁶Ka iraira dezire gumba pai kuti boro, nga ni mangi gbegberẽpai,

¹⁷si du agu aboro ue re, nga agu yo du paa dagba yo ki ru bara bangiri Yekova, na bara bangiri aboromotumona abasaringbanga, nga agu yo ka du ni gu rago re.

¹⁸Abasaringbanga aniwisigi he wenengaĩ. Oni ngére, ka dezire du ni irazire dezire, ki gumba pai ni zire kuti wirinani,

¹⁹oni ki mangi fu ni, wa ni aberẽ pa manga fu wirinani. Si du oni ka nidi gbigbitapai adia ti ni ku sa yo dagba roni.

²⁰Agu akura yo gí he, ki gunde, ka i amánga nga pai berewe ku mbata yo ni ngbatunga gu gbigbitapai re dagba roni yo ya.

²¹Ka nungani adú nga ti roni a ya; unga nikadu ku ba unga, bangirise ku ba bangirise, rinde ku ba rinde, be ku ba be, ndue ku ba ndue.