Read zande Pa Fu Rugute ni Ue he 2 Bible Online

Pa Fu Rugute ni Ue he 2 - zande bible

Pa Fu Rugute ni Ue he 2

¹“Si du ani ki sa tirani, ki ndu nunguro ku ngbakungba yo ngba gu gene ndu ku Zamba Baime yo, a wa Yekova agumba ha fere; ani ki nike pati Bagangara Seira tipa dungu arame.

²Yekova ki gumba pai fere, ki ya,

³‘Oni ke pati gi ringara abaagangara re tipa gbanga rago rengbe; oni ária tironi ku nodiyo.

⁴Mo ki rugu aboro, niya, Oni nikasusa rogo bangbandarago nga ga awirinaroni nga awiri Esau, agu yo naraka Seira yo; ono i agúnde be roni. Si du oni bánda tironi;

⁵ka oni só nga vura na yo ya; bambiko mi afú nga gayo ringara fu roni te; oó; ni wiri toni he wa gu nga gu ndu nduroni auru he te, bambiko mi fu Bagangara Seira fu Esau ni gako ũkumbo.

⁶Oni angbé riahe be yo na kina marã, nga gu oni ka ri; oni angbé ime angbe a be vo ni marã a, nga gu oni ka mbira.

⁷Bambiko Yekova gaoni Mbori fu maku fu roni rogo gaoni mangaapai dunduko nga ga beroni, ko mi pa gaoni ta rogo gi bakere ngbakungba re; agi agarã 40 re Yekova gaoni Mbori adu na oni; zingohe amanga nga roni wa sa te.’

⁸Si du ani ki susi pati awirinaroni nangia awiri Esau nga agu yo naraka Seira yo, ti gene kpasakpasa rago Erata yo na Ezionagebere yo. “Ani ki aria tirani ki susi ngba gu gene ngbakungba du Moaba yo.

⁹Yekova ki ya fere. ‘Ka mo fúdi nga aMoabo ya, ka mo sáki nga pa vura na yo a ya, bambiko mi afu nga gayo ringara foro mo di he te, bambiko mi fu Are fu awiri Roto ni gayo ũkumbo.’

¹⁰AEmi naaraka yo mbata, nangia bakere aboro ni dungu yo, ni gbangagbanga yo wa kina aAnaka;

¹¹i niya ti yo aRefa a wa kina aAnaka, ono aMoabo naya ti yo aEmi.

¹²AOri anaaraka Seira yo mbata a, ono awiri Esau ki di ba yo; ki gbarasi yo ku sa yo, ki niraki ku ba yo; a wa aYisaraere amangi fu gu ringara nga gayo, nga gu Yekova afu fu yo. Yekova ki ya,

¹³‘Oni gúari awere, ki si ku mbiti gu wiridi yo nga Zerede.’ Si du ani ki si Zerede.

¹⁴Were agu arame fuo guari ani Kadesa-baranea yo, daho ani asi wiridi Zerede ni, si adu wa garã 38, daho rikaaboro dunduko nga aborosovura anyasi ni dagba aboro bataya, a wa Yekova azunua he fu yo.

¹⁵Ku ri agi apai re be Yekova adu na zinga kuti yo, ka gbarasa yo dagba aboro bataya, ki da ho i anyasi ni dunduko.

¹⁶“Si du, ho aborosovura anyasi ni dunduko ki kpiki dagba aboro.

¹⁷Yekova ki gumba pai fere, niya.

¹⁸‘Oni sí Are ni gi uru re, nga bangbandarago nga ga aMoabo ringara.

¹⁹Ono ho oni ka mbeda ni na bangbandarago ringara aAmono ka oni fúdi nga yo ya, ka oni só nga vura na yo a ya, bambiko mi afu nga gu ringara fu roni nga ga aAmono ni gaoni ũkumbo te; bambiko mi fu he fu awiri Roto ni gayo ũkumbo.’

²⁰I naya ti gu ringara re, ringara aRefa; aRefa naaraka yo mbata, ono aAmono naya ti yo aZamezuma,

²¹ni bakere aboro ni dungu yo, ni gbangagbanga yo wa kina a Anaka; ono Yekova agbarasi yo barangba yo dũ. I ki di ba yo, ki niraki ku ba yo;

²²a wa Yekova amangi he tipa awiri Esau, naaraka Seira yo, ho ko agbarasi aOri ni barangba yo, i ki di ba yo, ki niraki ku ba yo daku areme.

²³AAvo naaraka rogo akporo ki da ku Gaza yo, aKafatora naaye Kafatora yo agbarasi yo, ki niraki ku ba yo Yekova ki ya,

²⁴‘Oni gúari ka ndu gaoni nunguro, ki susi rogo gu ngboongboorago nga Arenona. Oni ngére, mi fu Siona fu roni nga boro Amora nangia bakindo Esebona, na gako ringara a; oni tóna ka dia ha ni gaoni, ki so vura na ko.

²⁵Ni gu uru re mi abá kiki roni na gunde roni ti aboro nga agu yo du tii ngbangbaturũ no nikagia pande roni, ki nikio, ki du na fudifudipai be roni.’

²⁶“Mi akedi asunge ngbakungba Kedemota yo koyo du Siona ni nga bakindo Esebona na pa zereda, niya,

²⁷‘Mo ídi he fere mi susi rogo ga ringara; mi andú kina ngba bagene, mi asá nga tire ku kumbabe na ku garebe yo a te.

²⁸Mo abága riahe fere tipa kina marã a, mi ri he. Mo afú ime fere tipa kina marã a, mi mbiri he; ono mo ídi he fere mi susi ni kina ndure,

²⁹wa agu awiri Esau naaraka Seira yo, na agu aMoabo naaraka Are yo amangi fere; daho mi ka si Yaradene ni ku rogo gu ringara Yekova gaani Mbori nafu he fu rani.’

³⁰Ono Siona nga bakindo Esebona akpi nga nyemu ka ida ha fu rani ani susi pati ko te; bambiko Yekova gaani Mbori anyakasi toroko, ki nyakasi kpotoko yo a, ya ko afu ko ku be roni wa du he ti gi rago re.

³¹Yekova ki ya fere, ‘Mo ngére, mi tona ka kusa Siona na gako ringara fu roni; oni tóna ka dia ha, oni ki di kumbo gako ringara.’

³²Si du Siona aye sa rani ti ni, ko na gako aboro dunduko, sa sovura ku Yasa yo.

³³Ono Yekova gaani Mbori atu ko ku be rani; ani ki ai be ko na be awiriko na gako aboro dũ.

³⁴Ani arogo gako abaakporo dunduko ni gu rago re, ki gbarasi agu abaakporo i araka rogo kpakaya, na akumba na ade na rukutu agude; ani ambu nga boro sa te;

³⁵kina zogozogo anya ani arogo ra ni zizi ane tipa rani, na gu gbugbu ahe ani arogo rogo abaakporo yo.

³⁶Yekova gaani Mbori akusi aboro fu rani dunduko ku barangba rani Aroere yo, nga gu du ti digida ngboo ngboorago Arenona, na ti gu bakporo du ngboongboorago yo, da kina ku Birada yo, a nga bakporo ho nadu ni bakere he susi fu rani te.

³⁷Ono oni ambeda nga na ringara awiri Amona sa te, si nga pavuru gu di dunduko nga Yaboka, na agu abaakporo du ringara abaagangara yo, yo Yekova gaani Mbori aza rani tipa ndu ku ho ni.