Read zande Pa Fu Rugute ni Ue he 20 Bible Online

Pa Fu Rugute ni Ue he 20 - zande bible

Pa Fu Rugute ni Ue he 20

¹“Ho oni ka niguari ni ka ndu sa avuraroni, ki bi afarasi na angbagida vura, na aboro nge ki susi roni, oni anigunde nga be yo te; bambiko Yekova gaoni Mbori du na oni, nga gu ko naakusi roni ringara Ezipeta yo.

²Si adú were, ho oni ka nimbedi ni na vura, boromotumo animbedi ki fura na aboro,

³ki ya fu yo. ‘Ako aYisaraere, oni gí he, oni mbedi areme na vura kuti avuraroni; ka he máki nga roni kpotoroni yo ya; ka oni gúnde nga ya, ka oni kío nga a ya, ka gbudagbuda zí nga roni be yo a ya;

⁴bambiko Yekova gaoni Mbori ko nga gu ko nandu na oni, ka so vura fu roni kuti avuraroni, ka batasa roni.’

⁵Abarumbatayo anigumba pai fu aboro, niya, ‘Gini boro du ho dua vovo bambu, ka ni akpara nga ha fu Yekova ya? Ni gá ku kpuni yo, ni ka kpi ti ngba vura, kura boro ki kpara ha fu Yekova.

⁶Gini boro du ho rũ bakakue, ka ni ata ri nga zuzuhe ya? Ni gá ku kpuni yo, ni ka kpi ti ngba vura yo, kura boro ki ri gu zuzuhe re.

⁷Gini boro du ho napazua de, ka ni adia nga ri ya? Ni gá ku kpuni yo, ni ka kpi ti ngba vura yo, kura boro ki di ri.’

⁸Abarumbatayo anigumba kura pai fu aboro, i ki niya. ‘Gini boro du ho nagunde, he amaka ni kpotoni yo? Ni gá ku kpuni yo, ngbadu awirinani ka zera wa kina gani.’

⁹Si ki du were, ho abarumbatayo ka nidigisi fugo ni fu aboro, i ki ringbisi abarutiri arimbasa aborosovura ku ri aboro.

¹⁰“Ho oni ka nimbedi ni sa bakporo ka so vura kuti ni, oni ki tingidi pa zereda fu aboro gu bakporo re.

¹¹Si adú were, ka i idi pa zereda fu roni nikaraga pai, ki za ngbadimo fu roni, agu aboro dunduko oni ka bi yo yo, oni asá yo ni gaoni azogo, i ki nimángi sunge fu roni.

¹²Ono ka i aída nga pa zereda fu roni ya, ono kina pa sovura kuti roni, oni ki ru nguru pati bakporo;

¹³ho Yekova gaoni Mbori ka fu he ni ku be roni, oni ki imi akumba ni ba sa sa ni basape,

¹⁴ono ade, na agude, na zogozogo anya, na agu ahe dunduko du bakporo yo, na gu gbugbu he nga gaha, si oni ka nirogo ho ni gaoni zizi ahe. Oni ki niri gu zizi ahe nga ga avuraroni, nga gu Yekova gaoni Mbori afu he fu roni.

¹⁵Were oni ka nimángi fu agu abaakporo dunduko nga gu du tuturu na oni, angia nga agu abaakporo nga ga agi arikaaboro re ya.

¹⁶Ono agu abaakporo nga ga agi aboro re, nga gu Yekova gaoni Mbori nafu fu roni ni gaoni, oni anibatasi nga gu he du na ome unga ti ni wa sa te.

¹⁷Ono oni aniba tungayo aba kpakaya, nga aEto, na aAmoro, na aKanano, na aPereso, na aIvo, na aYebuso, a wa Yekova gaoni Mbori arugu roni kuti ni;

¹⁸ka i yúgu nga pai fu roni oni mangi gayo kere gbegberẽ sino ya, nga gu mangi yo fu gayo ambori, ka oni amánga nga ingapai wo, kuti Yekova gaoni Mbori ya.

¹⁹“Ho oni ka niru nguru ni pati bakporo tipa gbanga rago, niso vura kuti ni ka dia ha, ka oni nigbárasi nga agu angua du yo ni dewa ha na mangua ya; bambiko oni ari zuzuhe arí, oni anidewe nga ha ku sande te. Angua bire yo wa boro oni ka zia ha?

²⁰Ono kina agu angua ini oni he ya riahe nga ha te, oni ka nigbarasi he ki dewe he ku sande. Oni ki nidua nyanyaki ngapa vura na ni kuti gu bakporo naso vura kuti roni, daho si ka ti ni.