Read zande Pa Fu Rugute ni Ue he 23 Bible Online

Pa Fu Rugute ni Ue he 23 - zande bible

Pa Fu Rugute ni Ue he 23

¹“Gu kumba hõ ti õrõni, watadu mangu õrõni sari, ko aríma nga ku rogo ga Yekova gbuu yo te.

²“Wiri badia aríma nga ku rogo ga Yekova gbuu yo te; gani boro arima nga ku rogo ga Yekova gbuu yo daho rikayo ka du ni bawe te.

³“Boro Amona watadu boro Maoba aríma nga ku rogo ga Yekova gbuu yo te; ka si vura du wa rikayo da bawe ku mbata yo vurũ, a nga boro sa nga gayo yo nikarima ku rogo ga Yekova gbuu yo nye anye kindi te,

⁴bambiko i aye nga na riahe na ime fu roni ku gene ho oni akuru ni Ezipeta yo te, na bambiko i angbe Birama wiri Beora du Peoro Mesopotamia yo, ko tiwa roni.

⁵Wa si avura du wo Yekova gaoni Mbori akpi nga nyemu ka dega tuko fu Birama te; ono Yekova gaoni Mbori asa gu motiwa re ni maku fu roni, bambiko Yekova gaoni Mbori akpi nyemu roni.

⁶Oni agbáta nga zereda tipa yo na wenepai wa du oni ni ungaroni nye anye kindi te.

⁷“Ka oni asóga nga aEdome ya, bambiko i nga awirinaroni; ka oni asóga nga aEzipeto ya; bambiko oni adu ni kungba aboro rogo gayo aringara.

⁸Agu agude nga ga rika biata yo i avunga yo fu yo i nikarima ku rogo ga Yekova gbuu yo.

⁹“Ho oni ka nikuru ni bataya yo ka ndu sa avuraroni, oni ki banda tironi be gbigbitapai dũ.

¹⁰“Ka boro du dagba roni biriko be gu pai niye sa ni yuru, ni ki kuru ku gii bataya yo, ka ni ayé nga ku bataya yo ya.

¹¹Ono si adú were, ho nyemu ka nida ni, ni ki zundu tini, ho uru nati ni, ni ki yega ku bataya yo.

¹²“Oni adú na ba zegi yo ku gii bataya yo, yo oni ka nikuru ku ho ni.

¹³Oni ki nidu na bagita be roni dagba gaoni aũvura yo; si ki du were, ho oni ka nisungu ni nvuo yo, oni anige sende na ni yo, ki karaga tironi ka dada gu he nikuru vuroni yo.

¹⁴Bambiko Yekova gaoni Mbori nata dagba gaoni bataya, ka batasa roni, na ka fu avuraroni ku barangba roni, si du gaoni bataya ka nidu ti ni ziazia, ka ko bi nga birikobiriko pai dagba roni, ka sa tiko ku sa yo ti roni ya.

¹⁵“Ka oni akúsa nga merẽmerẽ kanga fu bairani ya;

¹⁶ni anisungu na kina roni, dagba roni, rogo gu ba ka ni sia dagba gaoni bakporo sa, ho ngba ti ni gbe. Oni anirungosi nga ni te.

¹⁷“Ka debari dú nga dagba awiri aYisaraere yo nga ade ya, ka boro bari dú nga dagba awiri aYisaraere nga akumba a ya.

¹⁸Ka oni yé nga na marã ngbengbe irabari, watadu gu mosoro nga ga gbigbita asino ku rogo ga Yekova gaoni Mbori bambu yo tipa pa kidohe ya; bambiko wa du he ue, si nga kere gbegberẽ sino ku bangiri Yekova gaoni Mbori.

¹⁹“Ka oni fú nga he ni bape na mokiisa fu wirinaroni ya; mokiisa nga ga marã, mokiisa nga ga aũngba, mokiisa ku ri agu ahe i afu he ni bape tipa mokiisa a ya.

²⁰Ono oni animoi mokiisa bape fu kina kungba boro, ono fu awirinaroni oni animoi nga mokiisa bape te; Yekova gaoni Mbori ki fu maku fu roni rogo gu ringara oni andu ka dia ha.

²¹“Ho oni ka nikido kidohe ni fu Yekova gaoni Mbori, oni aninyomoro nga tipa fu he te; bambiko Yekova gaoni Mbori naida ha be roni ni rengo; ono si ka du ni ingapai fu roni.

²²Ono ka oni akido nga he ya, si du nga ni ingapai fu roni te.

²³Gu pai kuru ngbaroni yo, gaoni pai nga ka wisiga ha ka amanga ha, wa oni akido he fu Yekova gaoni Mbori, nga gu gamahe oni afu zaza ni nyemuhe, oni akido he tipa ha ni ngbaroni.

²⁴“Ho oni ka niye ni ku rogo ga kuaroni ati bakakue, oni ki niri zuzu bakakue ki nimbiki wa ngba ha ti roni. Ono ka oni amáa nga gu ku rogo gaoni buma ya.

²⁵Ho oni ka niye ni ku rogo ga kuaroni ati zende ahe, oni ki nizura ha ni kina beroni. Ono ka oni aké nga ha na sape ya.