Read zande Pa Fu Rugute ni Ue he 25 Bible Online

Pa Fu Rugute ni Ue he 25 - zande bible

Pa Fu Rugute ni Ue he 25

¹“Ka pa paa du dagba akumba, i yé ku bangbanga yo, abasaringbanga ki sari ngbanga, i ki di pai ri boro wenesa, ki sari ngbanga kuti gu ni du na pai ku ri ni.

²Ka gu boro du na pai ku ri ni re na ta ni, basaringbanga ki ya fu ni, ni pi sande, i ta ni ku bangirini, kuti gedigedi he, rengbe na gu pai mangi ni.

³I ki ta ni wa 40, ono ka si súsi nga ha ya; ka i ta ni ku ri gere na dungu amandoro ki susi, wirinaroni adu bangironi wa kina kungba he.

⁴“Ka oni avó nga ngba babagara ho u nasimba zende ahe ni ya.

⁵“Ka awirina araka sa, gu ni ki kpi, ka wirini adu nga ti ni ya, dia gu ni nakpi anidi nga kungba kumba ku sa yo te; tame kumba ― ri nikanindu fuo ri, ki di ri ni diako, ki nimangi sunge tame kumba fu ri.

⁶Si anidu were, gu bambata gude ri ka vunga ru, ni nikanidi rimo gu bani naakpi, ka rimoni agbándaka nga dagba aYisaraere yo ya.

⁷Ono ka boro akpi nga nyemu ka dia dekurugbo wirinani ya, dekurugbo wirinani ki ndu koyo du abaakumba ni ku ngbadimo bakporo yo, ki ya. ‘Tame kumbami ka pa tumba rimo wirinako ku ari dagba aYisaraere; ko akpi nga nyemu ka dia dekurugbo wirinako nga mi a te.’

⁸Abaakumba gako bakporo ki yambu ko, ki gumba pai fu ko. Ka ko ka kindi, ki ya. ‘Mi aida nga ka dia ri te,’

⁹si du dekurugbo wirinako ki ye koyo du ko ni ku bara bangiri abaakumba, ki uru gako rakata nduko yo, ki suku sure ku kpakpuko yo; ri ki karaga pai ki ya, ‘Wo si ka manga fu gu boro adua nga ga wirinani bambu ya.’

¹⁰I ki yambu rimo kpuni dagba aYisaraere, Gu kporo nga ga gu ni i auru gani rakata.

¹¹“Ho akumba nata kpata ni, gu ni kuti kura ni, dia gu ni sa ki da ka batasa kumbari be gu ni namanga ko gbe, ki taĩ beri ki zi mangu õrõko,

¹²oni ki kati beri akata ku sa yo; ka nungari amánga nga roni ya.

¹³“Ka oni dú nga na angbatunga barõahe ue akia rogo gaoni mangu yo ya, bakere he na toni he a ya.

¹⁴Ka oni dú nga na angbatunga ũringbisaahe ue akia dimo kpuroni yo a ya, bakere he na toni he a ya.

¹⁵Kina ziazia barõahe du ni nzunzu he nikanidu be roni, na ziazia ũringbisaahe du ni nzunzu he nikanidu be roni; ya oni ima aima gbe rogo gu ringara nga gu Yekova gaoni Mbori afu fu roni.

¹⁶Bambiko agu yo dunduko namanga ngbatunga agu apai re, zavura agu yo namanga irairaapai dũ, i nga kere gbegberẽ sino aboro ku bangiri Yekova gaoni Mbori.

¹⁷“Oni tingidi gu pai Amareko amangi fu roni ngba gene ho oni akuru ni Ezipeta yo,

¹⁸wa ko agbia roni gene na vura, ki mangi agu aboro naadu sa yo ku gii roni yo, na agu yo naadu ni rurungbura yo mburu sa yo, ho he amaka roni ni na mbugo; ka ko agunde nga ti Mbori ya.

¹⁹Si du, ho Yekova gaoni Mbori ka fu ongoda ni fu roni be avuraroni kirikiri pati roni dunduko, rogo gu ringara Yekova gaoni Mbori afu fu roni ka dia ha ni gaoni, oni ki gbandaka gu tingidapai nga ga Amareko tii ngbangbaturũ no; bangironi ago nga ti ni te.