Read zande Pa Fu Rugute ni Ue he 27 Bible Online

Pa Fu Rugute ni Ue he 27 - zande bible

Pa Fu Rugute ni Ue he 27

¹AMose na ga aYisaraere abaakumba ki rugu aboro, niya, “Oni ka kuti gi rugute re dunduko rugu mi roni na ni ni gi uru re.

²Ni gu uru ho oni ka si Yaradene ni ku rogo gu ringara Yekova gaoni Mhori afu fu roni, oni adúdua bakere ambia, ki mbedi kpotoho na kuamba.

³Oni ki ke agu apai nga ga gi rugute re dunduko ti ni, ho oni ka si ni ka ndu ku rogo gu ringara Yekova gaoni Mbori afu fu roni, gu ringara du adu na mamuanya na nzeme anyege kpaima, a wa Yekova ga abaroni Mbori akido roni.

⁴Si adú were ho oni ka si Yaradene ni, oni ki dua agi ambia re, nga gu mi aruga roni tipa ha areme, ri Bagangara Ebara yo, oni ki mbedi he na kuamba.

⁵Oni ki dua bamotumo yo fu Yekova gaoni Mbori, bamotumo nga ga mbia; ka oni séke nga ha na marã sunge ya.

⁶Oni adúa gu bamotumo re na kungba ambia fu Yekova gaoni Mbori; oni ki nifu zozo amotumo ri he fu Yekova gaoni Mbori.

⁷Oni ki nifu amotumo zereda, ki niri riahe kina yo; oni ki ningi bara bangiri Yekova gaoni Mbori.

⁸Oni ki ke agu apai dunduko nga ga gi rugute re ti agu ambia re nzunzu.”

⁹AMose na aboromotumo nga aRevi ki gumba pai fu aYisaraere dunduko, niya, “Ako aYisaraere, oni óngo kii, ki dege turoni; areme sa oni tironi ni ga Yekova aboro gaoni Mbori.

¹⁰Si du oni ka gia fugo Yekova ti ni nga gaoni Mbori, ki nimangi gako arugute na gako rugaapai, nga gu rugu mi roni na ni ni gi uru re.”

¹¹Mose ki rugu aboro ni kina gu uru re, niya,

¹²“Ho oni ka si Yaradene ni, agi angbatunga re nikaru ri Bagangara Gerizima yo ka fu maku fu aboro: nga Simona, na Revi, na Yuda, na Yisasakara, na Yosefa, na Benyamina a.

¹³Agi angbatunga re nikaru ri Bagangara Ebara yo ka tiwa aboro: nga Rubena, na Gada, na Asera, na Zeburuna, na Dana, na Nafatari a.

¹⁴ARevi nikakaraga pai ni bakere fugo, ki ya fu aboro aYisaraere dunduko:

¹⁵“‘Tiwatiwa boro nga gu ni namanga sese kpiahe watadu kpiahe ni zaragasizaragasi marã nga kere gbegberẽhe bangiri Yekova, nga gu ũsunge nga ga bangbasia ki moi he ku ari ni okooko he.’ Aboro akáraga pai dũ, ki ya, ‘Amina’.

¹⁶“ ‘Tiwatiwa boro nga gu ni nawasi bani na nani.’ Aboro akáraga pai dũ, ki ya, ‘Amina’.

¹⁷“ ‘Tiwatiwa boro nga gu ni nagbisa ga kurani bangbanda kporo.’ Aboro akáraga pai dũ, ki ya, ‘Amina.’

¹⁸“‘Tiwatiwa boro nga gu ni naingisa iravurari ngba gani gene.’ Aboro akáraga pai dũ, ki ya, ‘Amina.’

¹⁹“‘Tiwatiwa boro nga gu ni nairasi sarangbanga airasi nga ga kungba aboro, na ga awirinyaure, na ga adekurugbo a.’ Aboro akáraga pai dũ, ki ya, ‘Amina.’

²⁰“‘Tiwatiwa boro nga gu ni nara na dia bani, bambiko ni uru ga bani baukadi.’ Aboro akáraga pai dũ, ki ya, ‘Amina.’

²¹“‘Tiwatiwa boro nga gu ni nara na nya.’ Aboro akáraga pai dũ, ki ya, ‘Amina.’

²²“‘Tiwatiwa boro nga gu ni nara na dawirini watadu na wiri vuru bani, watadu na wiri vuru nani.’ Aboro akáraga pai dũ, ki ya, ‘Amina.’

²³“‘Tiwatiwa boro nga gu ni nara nagbioni.’ Aboro akáraga pai dũ, ki ya, ‘Amina.’

²⁴“‘Tiwatiwa boro nga gu ni naimo kura ni rogo gbuko.’ Aboro akáraga pai dũ, ki ya, ‘Amina.’

²⁵“‘Tiwatiwa boro nga gu ni nadia marã mobirimo ka imo boro wenesa.’ Aboro akáraga pai dũ, ki ya, ‘Amina.’

²⁶“‘Tiwatiwa boro nga gu ni anyakasa nga agu apai nga ga gi rugute re ni manga ha ya.’ Aboro akáraga pai dũ, ki ya, ‘Amina.’