Read zande Pa Fu Rugute ni Ue he 28 Bible Online

Pa Fu Rugute ni Ue he 28 - zande bible

Pa Fu Rugute ni Ue he 28

¹“Si adú wa gere, ka oni dege turoni sirisiri ka gia fugo Yekova gaoni Mbori, ka berã pa manga gako arugute dunduko nga gu rugu mi roni kuti ni ni gi uru re, Yekova gaoni Mbori amáa roni ku ari gbe ku ri arikaaboro dunduko nga ga kpotosende yo.

²Agi amaku re ayé ku ri roni, ki dusia roni, ka oni dege turoni sa fugo Yekova gaoni Mbori.

³Oni adú ni aboro maku bakporo yo, oni ki du ni aboro maku ati yo a.

⁴Maku adú fu gu vungu oni ka vunga, na ku ri gu zuzuahe nga ga gaoni sende, na ku ri awiri gaoni zogozogo anya, ku ri pa zuga gaoni abagara, na ku ri awiri gaoni akandoro.

⁵Gaoni abaga adú na maku na gaoni apere puta riahe.

⁶Aboro maku nikangia oni ho oni ka arima ni, aboro maku nikangia oni ho oni ka akura ni a.

⁷“Yekova amánga avuraroni nga agu yo zingi kuti roni, oni ki di be yo. I ayé sa roni ngba gene sa, ki oro be roni ngba agene saba.

⁸Yekova arúga pa maku ku ri gaoni agbamu, na ku ri agu ahe dunduko oni ka maa beroni ka manga ha. Ko afú maku fu roni rogo gu ringara nga gu Yekova afu fu roni nga gaoni Mbori.

⁹Yekova ambákada roni ni kparakpara ziazia aboro fu ko, a wa ko azunga he fu roni, ka oni ka kuti agu arugute nga ga Yekova gaoni Mbori, ka apeka fuo gako apai.

¹⁰Aboro dunduko nga ga kpotosende yo ki bi he ya i ayambu roni ni rengo ni rimo Yekova; i ki du na gunde roni ti yo.

¹¹Yekova ki ngeesi roni rogo wenepai, na rogo gu vungu oni ka vunga, na rogo awiri gaoni zogozogo anya, na rogo gu zuzuahe nga ga gaoni sende, rogo gu ringara Yekova azunga he fu abaroni ka fu he fu roni.

¹²Yekova azá gako pai ũkumuko fu roni ngbangbaturũ yo ka fu mai ku rogo gaoni ringara ti regboho, ka fu maku ku ri agu ahe dũ oni amánga ha ni beroni. Oni afú abape fu dungu arikaaboro, ono oni tigaoni anidi nga bape wa sa te.

¹³Yekova amáa roni ni ri he, ni sa he te; oni ki du kina ku ari, ka oni adu nga ku tii be yo ya; ka oni dege turoni sa ga Yekova arugute nga gaoni Mbori, nga gu rugu mi roni kuti ni ni gi uru re, ka berã pa ha ka amanga ha,

¹⁴ka oni ária nga tironi ku bani ti agu apai rugu mi roni kuti ni ni gi uru re ya, ku kumbabe watadu ku garebe yo, ka ndu fuo kura ambori ka amanga pa ha.

¹⁵“Ono si adu wa gere, ka oni adéga nga turoni sa fugo Yekova gaoni Mbori ya, ka berã pa gako arugute dũ ka amanga ha na gako rugaapai nga gu rugu mi roni kuti ni ni gi uru re; agi amotiwa re dunduko ayé ku ri roni, ki dusia roni.

¹⁶Oni anidu bakporo yo ni tiwatiwa roni, oni anidu ati yo ni tiwatiwa roni a.

¹⁷Gaoni abaga anidu ni tiwatiwa ha na gaoni apere puta riahe.

¹⁸Gaoni avungu anidu ni tiwatiwa yo, na gu zuzuahe nga ga gaoni sende, na gu gaoni abagara nazuga, na awiri gaoni akandoro.

¹⁹Oni anidu ni tiwatiwa roni ho oni ka arima ni, na ni tiwatiwa roni ho oni ka akura ni.

²⁰“Yekova akéda motiwa ku ri roni, na wasiro, na zaahe, rogo agu ahe dũ moi oni beroni sa ni, ka amanga ha, daho i ka gbarasa roni ni, na daho oni ka kpika ni ni ipo; bambiko gaoni gbegberẽ mangaapai, nga gu mbu oni re kuti ni.

²¹Yekova amánga tata kaza gberãngbi si ka kuti roni, daho ko ka ba tungaroni ni kpakaya rogo gu ringara re yo oni andú ku ho ni ka dia ha.

²²Yekova amánga roni ni akaza nikarunasi roni, na kaza faakpoto, na kaza abagita, na rururu faarago, na ugure, na pa ngbiimi ahe, na kuko ahe ati yo. I adó roni daho oni ka kpika ni.

²³Agu angbangbaturũ du ba ri roni adu wa kina sirigi, na gu sende du oni ri he adu wa kina marã.

²⁴Yekova asá gu mai nga ga gaoni ringara wa ngungo wa nvutu a; ngbangbaturũ yo si ka ye ni ku ri roni, daho si ka gbarasa roni ni dunduko.

²⁵“Yekova aída ha fu avuraroni i di be roni. Oni anindu ngba gene sa kuti yo, oni ki oro be yo ngba agene saba. Oni adu wa ugbudagbuda fu angbi du nga ga kpotosende.

²⁶Kangbaroni adu ni pasio fu azire ari, na fu agu anya nga ga kpotosende ra. Boro adu nga ho sa nikado ra te.

²⁷Yekova amánga roni ni agu abagita nga ga Ezipeta, na hikihiki ahe, na ndaka, na kperenga kpoto, nga gu oni arengba nga ka hu be he ya.

²⁸Yekova amánga roni na nzanga, na vurari, na kiga kpoto yo.

²⁹Oni ki nitataraga bebere uru wa iravurari ku bitimo, oni aú nga rogo gaoni apai te. Ono oni adú ni kina rungosirungosi roni, i nigbú roni na uru, boro adú nga ho nikabatasa roni wa sa te.

³⁰Oni apázua ade, kura akumba akia ki ra na yo. Oni adúa abambu, ka oni ará nga rogo ho ya. Oni arú bakakue ati yo, ka oni ari nga zuzuhe ya.

³¹I aímo gaoni abaabagara kina ku bangironi, ka oni ari nga pasiora ya. I adĩ gaoni adongi ni zuu kina ku bangironi, ka i akáraga nga ra berewe fu roni ya. I afú gaoni akandoro fu avuraroni, ka boro adú nga ho ka unda roni ya.

³²I afú awironi nga akumba na awironi nga ade fu kura aboro, bangironi abí he abi, ki nimbu be nyemu yo na auru dũ; ka ome adú nga ti roni ka za ha ya.

³³Gu rikaaboro oni aina nga yo ya, i aríta gu zuzuahe nga ga gaoni sende, na ga gaoni asunge dũ. Oni adú ni kina rungosirungosi roni ni kandasikandasi roni dedede.

³⁴Si du nzanga azía roni be agu apai oni ka abi ni bangironi.

³⁵Yekova amánga roni rogo arukusuroni yo, na rogo anduroni yo, na kere pikipiki ahe, nga gu oni ka arengba nga na hu be he ya, tona kpanduroni yo ki da ti rironi.

³⁶“Yekova ayé na oni, na gaoni bakindo oni ka maa ko ku ri roni a, fu gu rikaaboro oni aina nga yo ya, oni na abaroni a ya; yo oni ka irisa kura ambori ni, nga ngua na mbia.

³⁷Oni ki du wa ũkiga, ni sanza, ni kere gbegberẽhe, dagba agu aboro dunduko yo Yekova ka do roni ku ho ni.

³⁸Oni atínda bakere tunga ku ati yo, oni ki dungura ha toni gbua; bambiko ayere ayé ki riti he.

³⁹Oni aru bakakue ati yo ki nimbakadi he, ono oni ambíra nga imekakuehe te, ka oni adúngura nga rindi bakakue a ya; bambiko agbiro aríta ha.

⁴⁰Oni adú na ngua eraya rogo gaoni bangbandarago dunduko, ono oni ambéda nga tironi na nzemehe te; bambiko gaoni eraya abáfa zuzuhe.

⁴¹Oni avúnga akumbagude na adegude, oni i adú nga ni gaoni yo te; ono i andú na yo ni zizi yo.

⁴²Gaoni angua dunduko na gaoni zuzuahe nga ga gaoni sende dunduko, kina ayere nikarita ha.

⁴³Gu kungba aboro ka du dagba roni i akúmuko ki susi roni asusa; gaoni pai ki zorõ ku sende, pa roni ki paya apaya.

⁴⁴I afú bape fu roni, ka oni afú nga bape fu yo tigaoni ya. I adú ni ri he, oni ki du ni sa he.

⁴⁵Agi amotiwa re dunduko nikaye ku ri roni, ki nido roni, ki nidusia roni, daho oni ka du ni ni gbarasigbarasi roni; bambiko oni adega nga turoni sa fugo Yekova gaoni Mbori te, ka ka kuti gako arugute na gako rugaapai nga gu ko arugu roni kuti ni a te.

⁴⁶Si adú ku ri roni ni yuguyuguhe ni iiriwo yuguyuguapai, na ku ri ngbatungaroni nye anye kindi.

⁴⁷“Wa oni amanga nga pa Yekova gaoni Mbori ni ngbarago ya, na kpotoroni yo pusiapusia a ya, na bambiko wa du ahe be roni kpaima,

⁴⁸si du oni ka ra ti ni fu avuraroni, nga agu yo Yekova ka keda yo sa roni, rogo pa gomoro, na pa gomoro ime, na pa zingo roko, na pa zingo ahe dunduko. I amáa gonga marã ku gorõroni, daho i ka gbarasa roni ni.

⁴⁹Yekova ayé na rikaaboro kuti roni gii ngbi yo, digida sende yo, wa dingimo nagu, gu rikaaboro oni aruga nga tironi na pa fugoyo ya,

⁵⁰nga gu rikaaboro du na kere kpakpuyo, nikaaberã nga pa gbinza aboro ya, i ayúgo nga ngbanya fu aparanga a te.

⁵¹I arita awiri gaoni zogozogo anya, na gu zuzuahe nga ga gaoni sende, daho i ka gbarasa roni ni. I ambú nga zende ahe fu roni a te, imekakue, watadu nzeme, na gaoni zugazuga abagara, watadu awiri gaoni akandoro a te, daho i ka nyasa roni ni, oni ki kpiki.

⁵²I arú nguru pati gaoni akporo dũ, daho gaoni gbangagbanga ngapa bakporo ka tiwa ni ku sande, rogo gaoni ringara dunduko, nga gu oni nakida kuti ni. I arú nguru pati roni pati gaoni akporo dunduko rogo gaoni ringara, nga gu fu Yekova fu roni nga gaoni Mbori.

⁵³Oni arí kina awironi, pasio awironi nga akumba na ade nga agu yo Yekova gaoni Mbori afu yo fu roni; bambiko pa zia roni na rago dingisaro, nga gu pai avuraroni ka dingisa roni na ni.

⁵⁴Gu kumba anyaka nga dagba roni yo ya, du rurungbura ki susi, ni abi wirinani gbegberẽ, na diani a du be ni, na yangara awirini nga agu yo nye be ni.

⁵⁵Si du ni afú nga pasio awirini fu gu ni sa dagba yo yo te, nga gu ni ka ni niri he, bambiko he ho nye fu ni te, bambiko pa zia roni na rago dingisaro, nga gu avuraroni ka dingisa roni na ni rogo gaoni akporo dunduko.

⁵⁶Gu de anyaka nga dagba roni yo ya, du rurungbura, akpi nga nyemu ka maa nduri ri sende ya tipa rungbura na zanga nyaka, ri abí kumbari du ri be ko gbegberẽ, na wiriri nga kumbagude na gu wiriri nga degude,

⁵⁷nga gu rikikpo naakuru kina vuri yo, na agu agude ri avunga yo, bambiko ri arí yo ni gbuko be zingo ahe du; bambiko pa zia roni na rago dingisaro, nga gu avuraroni ka dingisa roni na ni rogo gaoni akporo.

⁵⁸“Ka oni akpí nga nyemu ka berã pa agu apai dunduko nga ga gi rugute re nga gu du ni keke he rogo gi kitabu re ka amanga ha ya, ya oni nigunde ti gi taasitaasi rimo du ni iiriwoho, nga Yekova gaoni Mbori.

⁵⁹Si du Yekova ka amanga roni ti ni na agberãngbi ni iiriwopai, na gberãngbi ku ri awironi, ni bakere agberãngbi nga gu nikadu tipa gbanga rago na imisiri akaza nga gu nikadu tipa gbanga rago a.

⁶⁰Ko ayé na agu akaza dunduko nga ga Ezipeta ku ri roni berewe, nga gu oni adu na gunde be he; si aká kuti roni.

⁶¹Akaza ni ba sa sa a wo, na agberãngbi, nga gu adu nga ni keke he rogo gu kitabu nga ga gi rugute re ya, si Yekova ka ye na ni ku ri roni, daho i ka gbarasa roni ni.

⁶²Wa oni adu wa akerekuru nga ga ngbangbaturũ ra tipa rimbasa roni; oni ki nye ni kina zogoro roni; bambiko oni adega nga turoni sa fugo Yekova gaoni Mbori te.

⁶³Wa Yekova angi tipa roni ka manga pa roni wenengaĩ, ka ngeesa roni, wo Yekova nikangi ku ri roni ka manga roni ka gbarasa roni oni kpiki. Ko aróga roni ku sa yo rogo gu ringara oni andu ka dia ha.

⁶⁴Yekova agbándaka roni dagba aboro dunduko, tona ti gu digida kpotosende ku bani, ki da ti gu digida kpotosende ku bani a; yo oni ka amanga pa kura ambori ni, nga agu ahe oni aina nga pa ha ya, oni na abaroni a ya, nga kina ngua na mbia.

⁶⁵Oni abí nga zereda dagba agi arikaaboro te re, ongoda adú nga yo tipa kpanduroni yo a te. Ono Yekova afú gu ngbaduse nakio fu roni, vurari azía bangironi, na rungo ki du fu tororoni.

⁶⁶Oni abáka bangironi tipa ungaroní Oni ki nigunde uru na yuru, ka oni aina nga pai nzunzu tipa ungaroni ya.

⁶⁷Wiso oni aniya, ‘Ka Mbori akpi nyemu he si du nga yuru!’ nyemu oni aniya, ‘Ka Mbori akpi nyemu he si du nga wiso!’ bambiko gu gunde nga ga ngbaduroni nga gu oni ka gunde he, na bambiko agu apai oni ka abi ni bangironi.

⁶⁸Yekova ayé na oni berewe ku Ezipeta yo rogo abaakurungba, ngba gu gene yo mi agumba pa ha fu roni, ya oni abí nga ha berewe te; yo oni aída ka baga tironi ni fu avuraroni ni akanga ni akanga nga ade a, ono boro angbé nga roni te.”