Read zande Pa Fu Rugute ni Ue he 32 Bible Online

Pa Fu Rugute ni Ue he 32 - zande bible

Pa Fu Rugute ni Ue he 32

¹“Ako angbangbaturũ, oni yé turoni, mi agúmba pai; kpotosende gí agu apai du ngbare.

²Gi yugopai ná wa mai, gi fura ti wa ndomo, wa moromoro mai ku ri wesewese nvuo, wa mikamika mai ku ri banambu.

³Bambiko mi atáka pande pa rimo Yekova. Oni gúmba pa kia gaani Mbori!

⁴“Ko nga Mbia, gako manga sunge du ziazia; bambiko gako apai dunduko du ni ruru sarangbanga. Mbori nga irayososopai zanga irairapai, nga irarengo ni ruru ko.

⁵I mangi pai fu ko ni wasiwasi he, awiriko nga yo berewe te, bambiko gayo serõhe; i nga keretukeretu aboro ni iraira rikaaboro.

⁶Ako mumungo aboro azanga tatamana, oni nakaraga pai fu Yekova were? A nga ko nga baroni nangbe roni, ki mangi roni, ki nyakasi roni, te?

⁷Oni tíngidi pa agu arago naadu mbata, oni berẽ pa agu agarã nga ga dungu arikaaboro; oni sána baroni, ko ayúgo ho fu roni; gaoni abaakumba, i agúmba ha fu roni.

⁸Ho gu Ko nga Bahe ki susi afu aringara ni fu arikaaboro, ho ko akparaka wiri aboro ni, ko ki moi bangbandarago fu aboro kuti gedigedi awiri aYisaraere.

⁹Bambiko ga Yekova aboro nga gako mosoro, Yakoba nga bete pa gako mosoro a.

¹⁰“Ko abi ko rogo ngbi ngume, na rogo gu bakere iiriwo ngbakungba; ko aru pati ko kirikiri, ko nabanda ko, ko abanda ko wa rindi bangiriko.

¹¹Wa gu dingimo nawo ti bambu ru, ki nipedi rago ku ri awiru, ki zaraga puporu, ko ki zi ra, ko ki tindi ra ri puporu,

¹²kina wo Yekova ni sako nangbe fu Yakoba ku mbata yo, kura kungba mbori adu nga ho na ko te.

¹³Yekova aidi he fu ko ko oro ri bagbangagbanga aba nga ga kpotosende, ki niri gu zugazuga ahe nga ga ati; Yekova aidi he fu ko ko nyoro nzeme anyege ti mbia, na nzeme ti mbia we.

¹⁴Nzeme mamu abagara, na mamu akandoro, na nzeme wiri akandoro na ga abaakandoro, rimbasa abagara Basana, na ameme, na ridiridi ngungo zende ahe― mo ambiri ime rindi bakakue du wa kure.

¹⁵“Ono Yesuruna ki nikii akia, ki nifoko tiko afoka; mo ki kii akia, ki nisono kpirikpiri, kpotoro ki du mbuyumbuyu; fuo ho ko ambu Mbori namangi ko, ki niberẽ pa gako Mbia bata gbua tataa.

¹⁶I ki zingisi ko na kungba ambori ko de ringo; i ki gara gako zinga kuti yo na kere gbigbita sino.

¹⁷I ki nifu motumo fu adaimona angia nga ambori ya; fu agu ambori i aina nga ha ya, fu vovo ambori pa yo akura kusa, nga gu he kiki he ati nga ti abaroni ya.

¹⁸Gu Mbia navungu roni oni aberã nga pa ha te, bangironi ki go ti gu Mbori navungu roni.

¹⁹“Yekova abi he ki sogo yo, bambiko awiriko nga akumba na ade azingi kuti ko.

²⁰Ko ki ya, ‘Mi aóka kpakpure ti yo, mi abí waĩ gayo digidapai ka du, bambiko i nga gbegberẽ ringi rikaaboro, agu agude adu nga na yososopai ya.

²¹I wo ti re sa deringo ni agu ahe angia nga mbori ya; i agara gi zinga kuti yo ni gayo kungba ahe. Mi awó ti yo a sa deringo na agu yo adu nga ni aboro ya; mi azíngisa yo a sa zinga ni mumungo rikaaboro.

²²Bambiko we kĩ be gi zinga, ki nigbi ki da ku mburu Baatoro kpikpi aboro yo, ki niriti kpotosende na agu ahe nazuga rogo ho, ki tigi we ti mburu abaagangara.

²³“‘Mi abá gbigbitaapai ku ri yo; mi abá gimi aguanza dunduko ku ri yo;

²⁴i aúguda be gomoro, ki riti be gbigbi faarago na kere tata kaza; mi akéda kere anya rinde kuti yo, na gu kere ngua du ti agu agbiro nagbe tira nvutu yo.

²⁵Zegi yo basape ka imo aboro ni, dimo ya gunde ka du ni, si agbárasa paranga akumba na ngasu ade a, ahamai a na gu gbinza kumba du na nvue ti riko.

²⁶Ka mi aya fu yo, “Mi agbándaka yo tuturu, mi amánga pai tingida pa yo si go dagba aboro,”

²⁷ka si adu nga wa mi agunde be zingisapai nga ga avura ya, avurayo ka berã kungba pai, i ka ya, “Berani di be pai, bambiko Yekova amánga nga gure dũ te.” ’

²⁸“Bambiko i nga gu rikaaboro zanga rugapai, ka rugatinapai adu nga rogo yo yo ya.

²⁹Ako! ka i angia airatatamana, ka i arugu tiyo na gere, ka i aini pa digida gayo apai!

³⁰Waĩ ka boro sa do aboro 1,000, aboro ue ki mangi aboro 10,000 i oro? Kina gu ka gayo Mbia bagi yo, Yekova ki kusi yo ku be yo.

³¹Bambiko gayo mbia wa gaani Mbia te, kina avurarani ni tiyo du ni abasapungbanga.

³²Bambiko gayo bakakue aenge ti gu bakakue nga ga Sodomo, na rogo agu aati du Amora yo; gayo rindi bakakue du ni hihii rindihe, zuzu akpura gayo bakakue ni kina nirãnirã ha;

³³gayo imekakue nga gu kere ngua naimo nyaime du wa kpaka, na gu kere ngua nga ga awo.

³⁴“ ‘A nga gere kina ku bere, baigaahe yo, ni dikadika ha dagba gimi aũkumuko yo te?

³⁵Pa irabape nga gimi, na pa fu mosoro, ni gu rago ho nduyo ka zerenga ni; bambiko uru gayo gberãngbi nambeda, na agu apai nikaye ku ri yo naipisa tihe.’

³⁶Bambiko Yekova asápa ngbanga fu gako aboro, nunga gako amoyambu aau ti ko, ho ko ka bi he ni ya gayo tandu ga, ka boro anye nga wa sa ya, ni kanga watadu ni ranirini a ya.

³⁷Ko ayá, ‘Wari du gayo ambori ni, gu mbia i nakida kuti ni;

³⁸nga agu ambori nari nzeme gayo amotumo, ki mbiri gu imekakue nga ga gayo mbirimbiri motumo? I gúari ku ari ka unda roni, i dú ni ababanda roni!

³⁹“ ‘Oni bí he awere ya mi, kina re, nga ko, a nga kura mbori ho fuo re te; kina mi naimo he, kina mi nafu unga fu ahe a; mi nahoga he, kina re ki wiisi he; a nga boro ho sa ka kusi he be re te.

⁴⁰Bambiko mi tumba bere ku ngba ngbaturũ yo, ki ya, Wa nye mi anye kindi,

⁴¹ka mi bedi gi imaima basape, bere ki zadi sarangbanga, mi aíra bape ti avurare, ki fu mbusa fu agu yo nasoga re.

⁴²Mi amánga gimi aguanza ami kpi kure, gi basape arita pasio aboro― nga kure imiimi yo na zizi yo, tona ti ri abarumbatayo nga ga vurayo.’

⁴³“Ako, oni arikaaboro, oni támbua gako aboro; bambiko ko naira bape kure gako amoyambu ki iri bape ti avurako, ki fu motumo tipa gako ringara, tipa gako aboro a.”

⁴⁴Mose ki ye ki gumba agi apai dunduko nga ga gi bia re ku tu aboro yo, ko na Yosua wiri Nuna.

⁴⁵Ho Mose adigisi pa gumba agi apai re ni dunduko fu aYisaraere dunduko,

⁴⁶ko ki ya fu yo, “Oni mói berãroni tipa agi apai dunduko nga gu gumba mi pa ha ni dezire fu roni ni gi uru re; si du oni ka ruga awironi na ni, i berẽ pa manga agu apai dũ nga ga gi rugute re.

⁴⁷Bambiko a nga si nga kungba pai fu roni te, ono si nga boro ungaroni, mbiko gi pai re oni ka ima ti ni rogo gu ringara, yo oni ka si Yaradene ku ho ni ka dia ha ni gaoni.”

⁴⁸Yekova ki gumba pai fu Mose ni kina gu uru re, ki ya,

⁴⁹“Mo bíti ku ri gi bagangara yo re nga Abarima, nga Bagangara Nebo, nga gu du ringara Moaba no, nangera ku Yereo yo; ka bi gu ringara nga Kanana, nga gu mi nafu fu awiri aYisaraere i di he ni gayo.

⁵⁰Mo ki kpi ri gu bagangara yo biti mo ku ho ni, tororo ki ga koyo du atitaro ni, a wa Arona wirinamo akpi ri Bagangara Oro yo, toroko ki ga koyo du atitako ni,

⁵¹bambiko oni ati ndika kuti re dagba awiri aYisaraere pati aime Meriba yo du Kadesa yo, ngbakungba Zina yo; bambiko oni akpara nga re ziazia dagba awiri aYisaraere te.

⁵²Bambiko mo abi gu ringara re ku barangba ro; ono mo andú nga ku rogo gu ringara nga gu mi nafu fu awiri aYisaraere te.”