Read zande Pa Fu Rugute ni Ue he 33 Bible Online

Pa Fu Rugute ni Ue he 33 - zande bible

Pa Fu Rugute ni Ue he 33

¹Gere nga pa gu maku, nga gu Mose aíu fu awiri aYisaraere mbata fu kpi ko nga ga Mbori kumba.

²Ko ki ya, Yekova aye Sinai yo, ki guari Seira yo ki ye koyo du yo ni; wa ko adu ri Bagangara Parana ko ahasi rago, ko aye yo du gu 10,000 ziazia yo ni, kere ndika wa we ki du ku kumbabeko yo fu yo.

³Ii, ko akpi nyemu aboro, gako ziazia aboro dunduko i kina ku be ro; i asungu sande pati nduro, aboro ni ba sa sa adi rugapai be ro,

⁴ho Mose arugu rani ni na ndika, nga ũkumbo tipa gu gbuu nga ga Yakoba.

⁵Yekova adu ni bakindo Yesuruna yo, ho abarumbatayo adungura tiyo ni, angbatunga aYisaraere dunduko ki du yo kina sa.

⁶“Rubena nyé ni ungako, ka ko kpi nga ya, ka gako aboro adú nga ni umba yo a ya.”

⁷Gere nga ga Yuda maku; ko ki ya, “Ako, Yekova mo gí fugo Yuda, ki rimisi ko fuo gako aboro; ko so vura ni beko tipa kina ko, mo ki du ni mounda fu ko kuti avurako.”

⁸Tipa ga Revi pai ko aya, “Mo fú ga Tumima fu Revi na ga Urima fu ga ziazia ni, nga gu ko mo aasadi ko Masa yo, mo aso vura na ko ti aime Meriba;

⁹naaya tipa bako na tipa nako, ‘Mi aberã nga pa yo te’; ko aida nga na awirinako a te, ka ko aina nga boro awiriko a ya. Bambiko i aberẽ pa ga pai, ki ka kuti ga mokido.

¹⁰I ayúgo gamo asarangbanga fu Yakoba, na ga rugute fu aYisaraere; i amáa fuõngua ku bara bangiro, na zozo motumo na baha ku ri ga bamotumo.

¹¹Ako Yekova, mo fú maku ku ri gako ahe ki idi pa gu sunge nga ga beko; ki kuadi dimo agu yo nga avurako; na ga agu yo nasoga ko, ya ka i gúari nga berewe ya.”

¹²Tipa ga Benyamina apai ko aya, “Gu ko Yekova akpi nyemu ko, ko aráka rogo zereda pati ko; ko nabanda ko na uru pitipiti, ko ki niraki dagba kpurunga beko.”

¹³Tipa ga Yosefa apai ko aya, “Yekova fú maku ku ri gako sende; ku ri gu kikiipa ahe nga ga ngbangbaturũ mbiko ndomo, na gu du ngirimo yo du tii he yo,

¹⁴na ku ri gu kikiipa ahe nazuga be uru, na gu kikiipa ahe nasona na adiwi,

¹⁵na gu bawene ahe nga ga kuru abaagangara, na gu kikiipa ahe nga ga nyebaru agangara,

¹⁶na gu kikiipa ahe nga ga kpoto sende dunduko na gaha ahe dunduko, na gu weneringise nga ga gu ko naraka yegbende ngua yo. Agi amaku re yé ku ri Yosefa, na ku ri gu ko naadu ni kparakpara ko ku ri awiribako.

¹⁷Gu bambata vungu nga ga gako babagara, taarimo du ti ru, agbangaru nga agbanga gbẽe; ko atúrã aboro na ni, i dunduko ku digida kpotosende yo; wo du pa ga Efuraima akutu bawe yo, na pa ga Manase akutu yo a.”

¹⁸Tipa ga Zeburuna pai ko aya, “Zeburuna, mo ngí, rogo ga kura ku zegi yo; na Yisasakara a, rogo gamo abamburoko.

¹⁹I ayámba aboro ku ri bagangara yo; i atúmo yo na amotumo nga ga rurupai; bambiko wa i ari aũ baime, na gu okooko aũkumuko nga ga ngume.”

²⁰Tipa ga Gada pai ko aya, “Boro maku nga gu ni nakiisa pa Gada! Gada napi wa nabahu, ko nasipa be ringara, na bebere he yo a.

²¹Ko asia bawene papara ha tipa ko, bambiko bete he adu kina ho ni bandabanda ha nga ga bafurugute; ko ki ye koyo du abarutiri aboro ni, ko asari ngbanga rogo ga Yekova rurupai, na gako asarangbanga fu aYisaraere.”

²²Tipa ga Dana pai ko aya, “Dana nga wiri bahu, nga gu ru naguka Basana yo.”

²³Tipa ga Nafatari pai ko aya, “Ako Nafatari, mo rengbe na irisa, ki hi be ga Yekova maku, ono mo dí rago ku dioyo na ku sudiyo a.”

²⁴Tipa ga Asera pai ko aya, “Boro maku nikangia Asera ku ri wiri aboro; pa ko angbá bangiri awirinako ki susi, ko zogo nduko ku nzeme yo.

²⁵Ga ngbongbosusu adú ni marã na sirigi; wa gamo arame ka adú, ga ome adú a wo.

²⁶“Ako Yesuruna, a nga kura ni ho wa Mbori te, naora ri ngbangbaturũ tipa unda ro, na rogo gako iriwo ti vuro angbangbaturũ.

²⁷Nyenye Mbori nga ga baraka, tii he yo du nyenye be ni. Ko aturã vuraro ku sa yo bara bangiro, ki ya, I gbárasi yo.

²⁸Si du aYisaraere araki ti ni rogo zereda, gu gugaabi nga ga Yakoba ki du ni sa ha, rogo ringara nga ga zende ahe na imekakue; ii, gako angbangbaturũ nauka ndomo ku sende no.

²⁹Ako aYisaraere! oni na ngbarago! Da du wa oni, nga agu aboro Yekova abatasi yo, nga vurakube tipa unda ro, nga gu basape nga ga ga iriwo! Avuraro ará ni riyo foro ni bawagi; mo asímba ri gayo bagbangagbanga arago.”