Read zande Pa Fu Rugute ni Ue he 34 Bible Online

Pa Fu Rugute ni Ue he 34 - zande bible

Pa Fu Rugute ni Ue he 34

¹Mose ki guari rogo gu kpasakpasa rago du Moaba yo sa Bagangara Nebo, ku ri Pisega yo, gu nangera ku Yereo yo. Yekova ki yugu ringara Girada fu ko dunduko, daku Dana yo,

²na Nafatari dunduko, na gu ringara nga ga Efuraima na ga Manase, na gu ringara dunduko nga ga Yuda, da kuti gu Baime du ku Dioyo,

³na ku Negebe yo na gu Kpasakpasa rago du ngboongboorago Yereo yo nga bakporo angua mbiro, ki da ku Zoara yo.

⁴Yekova ki ya fu ko, “Gere nga gu ringara mi azunga he fu Abarayama, fu Yisaka, na fu Yakoba tipa ha ki ya, ‘Mi afú he fu atitaroni.’ Mi rugu ro mo bi he ni kina bangiro,, ono mo asi nga koyo te,”

⁵Si du Mose nga ga Yekova moyambu ki kpi yo rogo gu ringara nga Moaba, kuti sangba Yekova,

⁶Yekova ki kpisidi ko rogo ngboongboorago du Moaba yo nangera ku Bete-peora yo, ono a nga boro sa naini bara murãko daku areme te.

⁷Garã Mose adu wa 120 ho ko akpi ni; ka bangiriko adu nga tataita ya, omeko adu na kina baha, si aumba nga te.

⁸Awiri aYisaraere ki kpari Mose akpara rogo gu kpasakpasa rago du Moaba yo rame ki du 30; si du uru kpara Mose rogo rungo ki digi.

⁹Yosua win Nuna ki hi be toro tatamana bambiko Mose amoi beko ri ko; awiri aYisaraere ki nidege tuyo fu ko, ki nimangi a wa Yekova arugu Mose.

¹⁰A nga nebi ho sa nadu dagba aYisaraere wa Mose, Yekova aini ko i ki ningere bangiriyo te.

¹¹Boro adu nga ho wa ko rogo yuguyuguhe na iiriwo yuguyuguapai, nga gu Yekova anakeda ko ko nimangi he rogo ringara Ezipeta, fu Faro na fu gako amoyambu du, na fu gako ringara dũ;

¹²na ni nyanyaki be na rogo bakere kiki nga gu Mose anaamanga ku bangiri aYisaraere dunduko te.