Read zande Pa Fu Rugute ni Ue he 5 Bible Online

Pa Fu Rugute ni Ue he 5 - zande bible

Pa Fu Rugute ni Ue he 5

¹Mose ki yambu awiri aYisaraere dunduko, ki ya fu yo. “Ako a Yisaraere, oni gí he, gu rugaapai na gu asarangbanga nga gu gumba mi ku turoni yo ni gi uru re, ya oni wiriki he, ki niberẽ pa manga ha.

²Yekova gaani Mbori amangi mokido na ani Orebe yo.

³Yekova amanga nga ui mokido re na abarani te; ono na kina rani, nga agu rani du ni ungarani dunduko ni gi uru re.

⁴Yekova afu na oni, oni ta bi kpakpuko, ko nibi kpakpuroni ri bagangara bebere we yo;

⁵mi tigimi aru dagba Yekova na oni ni gu rago re, ka yugo ga Yekova pai fu roni; bambiko oni agunde be we, ka oni abita nga ku ri bagangara yo ya. Ko ki ya.

⁶“ ‘Mi nga Yekova nga gaoni Mbori, nga gu ko nakusi roni ringara Ezipeta yo, rogo kporo akanga yo.

⁷“ ‘Ka kura Mbori dú nga be ro fuo kina re ya.

⁸“ ‘Ka mo mángi nga sese kpiahe ya, na kpia gu he du ngbangbaturũ ari yo, na gu du sende no, na gu du ime yo tii sende yo wa sa ya;

⁹ka mo anúgadi nga fu he ya, ka mo ainsa nga ha a ya; bambiko mi Yekova nga gamo Mbori nga iraringo Mbori. Mi nambusa wiri aboro ti gu irairapai nga ga abayo da kina ho rikayo ka du ni biata na biama nga agu yo nasoga re,

¹⁰ono mi ki niyugu inapai fu agu yo ni dungu yo nakpi nyemu re, ka kuti gi rugute.

¹¹“ ‘Ka mo yámbu nga rimo Yekova nga gamo Mbori gbua ya: bambiko Yekova ambu nga gu ni niyambu rimoko gbua te.

¹²“ ‘Mo nitíngidi pa rago sabiti, ka kpara ha ziazia, wa Yekova gamo Mbori arugu ro.

¹³Mo nimángi sunge rame ki du sita, mo ki nimángi ga sunge dunduko;

¹⁴ono saba rame nga rago sabiti nga ga Yekova gamo Mbori; ragoho ka mo amánga nga sunge wa sa ya, mo, na wiro, na gu wiro nga de, na ga moyambu, na ga nagbindi, na ga babagara, na ga dongi, na gamo zogozogo anya, na gu kungba boro ka du kpuro yo, ya ga moyambu na ga nagbindi ongodi wa kina ro

¹⁵Mo ki tingidi gu pai nga mo adu ni kanga ringara Ezipeta yo, Yekova gamo Mbori ki kusi ro ni nyanyaki beko, ni taã ko beko; si du Yekova gamo Mbori arugu ro ti ni mo ka kuti manga pa rago sabiti.

¹⁶“‘Mo niírisi bamo na namo, wa Yekova gamo Mbori arugu ro; mo ki ima aima gbe, pai ki nidu foro wenengaĩ rogo gu ringara Yekova afu foro nga gamo Mbori.

¹⁷“‘Ka mo ími nga boro ya.

¹⁸“‘Ka mo mángi nga bari a ya.

¹⁹“‘Ka mo dí nga he a ya.

²⁰“‘Ka mo gúmba nga zire kuti kuaro a ya.

²¹“‘Ka mo kpí nga dia kuaro ya; ka mo kpí nga nyemu ga kuaro kporo ya, na gani ati, watadu gani moyambu, watadu gani nagbindi, na gani babagara, watadu gani dongi, na agu ahe dũ nga ga kuaro.’

²²“Agi apai re Yekova agumba ha fu gaani gbuu dunduko ri bagangara bebere we yo, na bakere fugo, dubo ki du, na nduunduu bitimo. Ko agbia nga kura pai kuti ni te. Ko ake he auru kpasakpasa ambia ue, ki fu he fere.

²³“Si ki ta du wa gere, ho oni agi fugo ni bebere bitimo yo, ho bagangara agbi ni be we, oni ki ye mbembedi koyo du mi ni, gaoni abarumbatayo nga ga angbatungaroni, na gaoni abaakumba a;

²⁴oni ki ya fere, ‘Mo ngére, Yekova gaani Mbori yugu gako taarimo fu rani na pa du ko ni bahe, ani gi fugoko bebere we yo. Ani bi he rogo gi uru re ya Mbori nafura na boro, ni ki nye ni ungani.

²⁵Si du awere gini he ani ka kpika ti ni? Bambiko gi bakere we re nikarita rani; ka ani gi fugo Yekova gaani Mbori berewe, ani akpíka akpika.

²⁶Bambiko da du ho dagba aboro dunduko, nagi fugo unga Mbori ko nifura bebere we yo, wa ani agia ha, ki nye ni ungani kindi?

²⁷Mo mbédi koyo, ka gia agu apai dunduko nga gu Yekova gaani Mbori ka gumba; mo ki gumba agu apai dunduko fu rani Yekova gaani Mbori ka gumba ha foro; ani agia ha ngbaro ki nimángi he.’

²⁸“Ono Yekova agi fugoroni na gaoni apai, ho oni agumba ha ni fere; Yekova ki ya fere, ‘Mi gi iugo agu aboro re na agu apai nga gayo, nga gu gumba yo foro; i gumba apai dunduko wenengaĩ.

²⁹Ako ka berã nidu ti yo wa gu du kpotoyo yo awere, ka i agúnde ti re na ni, ka ka kuti gimi arugute kindi, ka pai adu ni wenepai fu yo, na fu awiriyo nye anye kindi!

³⁰Mo ndú ka ya fu yo, “Oni káraga tironi ku rogo gaoni abamburoko.”

³¹Ono tipa ro, mo rú erẽ pati re, mi agúmba rugute foro dunduko, na rugaapai, na asarangbanga, nga gu mo ka yugo ho fu yo, ya i nimángi he rogo gu ringara fu mi fu yo i di he ni ũkumbo.’

³²Si du oni ka berã pa manga ha ti ni wa Yekova gaoni Mbori arugu roni; ka oni asá nga tironi ku bani ku kumbabe watadu ku garebe yo ya.

³³Oni apéka kina agu apai dunduko nga gu Yekova aruga roni kuti ni, oni ki nye ni ungaroni, si ki du ni wenepai fu roni, oni ki niima aima gbe rogo gu ringara oni nikaroga ha.