Read zande Pa Fu Rugute ni Ue he 8 Bible Online

Pa Fu Rugute ni Ue he 8 - zande bible

Pa Fu Rugute ni Ue he 8

¹“Gu rugute dunduko rugu mi roni na ni ni gi uru re, oni ka berã pa ha ki nimángi he, oni ki nye ni ungaroni ki nge ange, ki ndu ka dia gu ringara nga gu Yekova azunga he fu abaroni tipa ha.

²Oni ki nitingidi pa agu agene dunduko nga gu Yekova angbe fu roni Ku mbata yo ngba ha rogo agu agarã 40 re ngbakungba yo, ko naumbasi gaoni berã, ka asada roni, ka ina gini pai naadu kpotoroni yo, watadu oni akpi nyemu ka ka kuti gako arugute, watadu wo te.

³Ko ki umbasi roni, ki mbu roni fu gomoro, ki nirigi roni na manu nga gu oni aina nga pa ha ya, abaroni aina nga pa ha a ya; ya oni ki ini he ya boro anye nga ni ungani bambiko kina riahe te, ono be agu apai dunduko nakura ngba Yekova yo du boro ni ungani mbiko ho.

⁴Gaoni aroko akpataka nga ti kpotoroni te, nduroni ahika nga a te, rogo agu agarã 40 re.

⁵Si du oni bérẽ pa ha kpotoroni yo, wa boro naruga wirini, wo Yekova gaoni Mbori aruga roni.

⁶Oni ki nika kuti agu arugute nga ga Yekova gaoni Mbori, ka peka fuo gako apai, ki nigunde ti ko a.

⁷Bambiko Yekova gaoni Mbori naye na oni ku rogo wene ringara, gu ringara nga ga awiriadi, agugaabi na angirimo nafu afu ku rogo angboongboorago na agangara,

⁸ringara nganu na he wa mapunga, na abakakue na avurumo, na ngbatunga zuzuhe wa andavu, ringara nga ga ngua aeraya na nzeme anyege,

⁹gu ringara oni ka ri riahe rogo yo zanga zingohe, zingohe amánga roni rogo ho te, gu ringara du gaha ambia nga kina marã, rogo gaha agangara yo oni ka geteka sirigi ni.

¹⁰Oni ki niri he ki nimbiki, oni ki nisambua Yekova gaoni Mbori tipa gu wene ringara fu ko ho fu roni.

¹¹“Oni bánda tironi bangironi ka go ti Yekova gaoni Mbori, ka oni aká nga kuti gako arugute ya, na gako asarangbanga, na gako rugaapai, nga gu rugu mi roni na ni ti gi uru re:

¹²ho oni ka ri he ni ki mbiki, ki nidua wene abambu ki niraki rogo ho,

¹³ho ka gaoni rimbasa abagara na gaoni rimbasa akandoro ka nge ni, gaoni feda na dahabu ki moi pai, agu ahe dunduko du be roni ki du ni ngenge he,

¹⁴ngbaduroni ki du na ruka, bangironi ki go ti Yekova gaoni Mbori, nakusi roni ringara Ezipeta yo, kporo akanga yo,

¹⁵nga gu ko nangbe ku mbata yo fu roni rogo bakere iiriwo ngbakungba, yo kere awo wa we adu ni na angerembia, ni ngbi gomoro ime, yo ime adu nga ni ya, nga gu ko nakusi ime fu roni ti mbia we.

¹⁶Ko nga gu ko naariga roni ngbakungba yo na manu, nga gu abaroni aina nga pa ha ya, ko umbasi roni ki asadi roni ka manga pa roni wenengaĩ ti digida gaoni rago giza.

¹⁷Oni bánda tironi oni ka ya ku kpotoroni yo, ‘Gaani tandu na gu ome nga ga berani fu gi ũkumuko re fu rani.’

¹⁸Ono oni ki nitingidi pa Yekova gaoni Mbori, bambiko ko nga gu ko nafu tandu fu roni oni bi kumuko; ya ko nyakasi gu gako zungahe ko azunga ha fu abaroni, wa du he areme re.

¹⁹Si adú were, ka bangironi go ti Yekova gaoni Mbori, oni ki nipeke fuo kura ambori, ki nimangi pa ha, ki niirisi he, mi gumba ha fu roni areme ya oni akpíka akpika ni rengo.

²⁰Wa kina agu arikaaboro nga agu yo Yekova namanga yo ki niimi yo barangba roni, wo ka oni kpiki bambiko oni akpi nga nyemu ka dega turoni sa fugo Yekova gaoni Mbori te.