Read zande Pa Fu Rugute ni Ue he 9 Bible Online

Pa Fu Rugute ni Ue he 9 - zande bible

Pa Fu Rugute ni Ue he 9

¹“Ako aYisaraere oni gí he; oni nikasi Yaradene areme, ka ndu ka dia arikaa boro du ni bakiki pa yo nga airaome, ki susi roni, na bakikindigi abaakporo na ngapa pati he da kina ku ngbangbaturũ yo,

²na bakere aboro ni gbangagbanga yo, nga awiri Anaka, ini oni pa ko, oni agi pa ko i aya ti ko, ‘Da rengbe na ru barangba awiri Anaka?’

³Si du oni ini he ni gi uru re, ya Yekova gaoni Mbori ko du nandu ku mbata yo fu roni wa kina gu we narita ahe; ko agbárasa yo, ki bafu yo ku sande barangba roni; si du oni ka do yo ti ni ku sa yo, ki mangi yo i kpiki ni ipo, a wa Yekova agumba ha fu roni.

⁴“Ka oni gúmba nga pai ku kpotoroni yo, fuo bafa Yekova gaoni Mbori yo ku sa yo barangba roni ya; ki ya, ‘Bambiko gaani rurupai Yekova aye na ani ti ni kono tipa dia gi ringara re’; ono du he mbiko gu gbegberẽpai nga ga agi arikaaboro re Yekova ado yo ti ni barangba roni.

⁵Tipa gaoni rurupai te, watadu tipa gu rurupai du ngbaduroni yo a te, ndu oni mbiko ho ka dia gayo ringara; ono du he tipa gu gbegberẽapai nga ga agi arikaaboro re Yekova gaoni Mbori ado yo ti ni barangba roni, ya ko nyakasi gu pai Yekova azunga he fu abaroni tipa ha, fu Abarayama, fu Yisaka, na fu Yakoba a.

⁶“Si du oni íni he, ya Yekova gaoni Mbori afu nga gi wene ringara re fu roni oni di he mbiko gaoni rurupai te; bambiko oni nga nyanyakiri rikaaboro.

⁷“Oni tíngidi he, ka bangironi gó nga ti waĩ oni azingisi Yekova gaoni Mbori ko zingi ngbakungba yo ya; tona ti gu uru oni akuru Ezipeta yo, ki da ti da oni ku rogo gi ba re, oni adu na samungu kuti Yekova.

⁸A wo Orebe yo oni azingisi Yekova ko zingi, Yekova adu na zinga na oni ki mbedi ka gbarasa roni.

⁹Ni gu rago mi andu ku ri bagangara yo ka roga kpasakpasa ambia, kina agu ambia nga ga gu mokido nga gu Yekova amangi na oni, mi ki sungu ri bagangara yo uru 40 na yuru 40 a; mi ari nga riahe ki mbiri ime a te.

¹⁰Yekova ki fu kpasakpasa ambia ue fere, boro wirinzaga Mbori ake he; apai adu ni keke he ti ni wa kina agu apai dunduko Yekova agumba fu roni ri bagangara bebere we yo ti gu uru nga ga gbuu.

¹¹Si ki ta du wa gere ti digida rame 40 na yuru 40. Yekova ki fu gu kpasakpasa ambia ue re fere, nga ambia nga ga mokido.

¹²Yekova ki ya fere, ‘Mo gúari, mo zórõ erẽ ni ipo; bambiko gu gamo aboro mo akusi yo Ezipeta yo wasi tiyo; i sa tiyo ni ngarã ti gu pai mi arugu yo kuti ni; i mangi kpiahe ni zaragasizaragasi marã tipa yo.’

¹³“Ku ri agi apai re Yekova ki gumba pai fere, niya, ‘Mi bi agi aboro re, mo ngere, nyanyakiri rikaaboro nga yo;

¹⁴mo mbú re, mi gbarasi yo, ki gbandaka rimoyo zegino; ki sa ro ni rikaaboro nga airaome ni bangenge aboro ki susi yo.’

¹⁵Si du mi ki aria tire ki zorõ ri bagangara yo ku pa di no, bagangara ki nigbi be we; gu kpasakpasa ambia ue re nga ga mokido ki du be re.

¹⁶Mi ki ngereke, oni ngere, oni ingi pai kuti Yekova gaoni Mbori; oni mangi kpia wiri bagara ni zaragasizaragasi marã tipa roni; oni asa tironi ni ngarã ti gu pai nga gu Yekova arugu roni kuti ni.

¹⁷Mi ki zadi agu ambia ue re, ki bafu he wa s, adu rogo bere ue, ki kuadi he ku bangironi.

¹⁸Mi ki ti sande bara bangiri Yekova wa mbata, uru ki du 40 na yuru 40 a; mi ari nga riahe ki mbiri ime a te, tipa gu ingaapai dunduko nga gaoni nga gu mangi oni, rogo manga gu pai nga gbegberẽ he bangiri Yekova, ka gara gako zinga kuti roni.

¹⁹Bambiko mi adu na gunde be gu zinga na gu fafoi era, nga gu pai Yekova adu na zinga ti ni kuti roni ki mbedi ka gbarasa roni. Ono Yekova adege tuko fere ni gu rago re a.

²⁰Yekova adu na bakere zinga kuti Arona ki mbedi ka gbarasa ko agbarasa; mi ki kpari tipa Arona a ni kina gu rago re a.

²¹Mi ki di gu gaoni ũingapai re, gu kpia wiri bagara oni amangi he, ki zo ho, ki simbi he, ki sa ha ridiridi daho si afurũ ni wa nvutu; mi ki uka ngungo ho ku wiridi yo nagita ti bagangara.

²²“Ono Tabera yo oni azingisi Yekova ni sa zinga, na Masa yo, na Kiburota-atava yo a.

²³Ho Yekova akedi roni ni Kadesabaranea yo, ki ya, ‘Oni ndú ka dia gu ringara nga gu fu mi fu roni,’ oni ki sa mungu kuti sangba Yekova gaoni Mbori, ka oni aida nga pa ko ya, ka oni adega nga turoni sa fugoko a ya.

²⁴Oni ki du ni kina airasamungu kuti Yekova tona ti kina gu uru mi aini roni.

²⁵“Si du mi api sande ti ni bara bangiri Yekova uru ki du 40 na yuru 40 a, bambiko Yekova aya ko agbarasa roni agbarasa.

²⁶Mi ki kpari fu Yekova, ki ya, ‘Ako Gbia MBORI, ka mo gbarasi nga gamo aboro nga boro gamo yo ya, nga agu yo mo atumo yo mbiko pa kia ro, nga agu yo mo akusi yo Ezipeta yo ni nyanyaki bero.

²⁷Mo tíngidi pa gamo amoyambu nga Abarayama, na Yisaka, na Yakoba; ka mo ngere nga kuti gu nyakari nga ga agi aboro re ya, sa gayo gbegberẽpai na sa gayo ingapai a ya,

²⁸aboro gu ringara mo akusi rani rogo ho ka ya, “Bambiko Yekova arengba nga na ye na yo ku rogo gu ringara nga gu ko akido he fu yo tipa ha te, bambiko ko asogo yo asoga, si du ko ye na yo ka imo yo aimo ngbakungba no.”

²⁹Ono i nga kina gamo aboro nga boro gamo yo, nga agu yo mo akusi yo be ga bakere tandu na be taĩtaĩ bero.’