Read zande Yoane 1 Bible Online

Yoane 1 - zande bible

Yoane 1

¹Mbata rago nikaenga Pai adu kina ho, aPai adu na Mbori, Pai adu ni Mbori.

²I adu na Mbori mbata rago nikaenga.

³I amangi ahe dũ kina rogo ko yo; agu ahe dunduko namangi si amanga nga gii bangiriko wa sa te.

⁴Unga adu rogo ko yo; unga ki du ni ga aboro imarago.

⁵Imarago nahasa rago bitimo; bitimo aruga nga tihe na ni te.

⁶Kumba aye yo, i akedi ko yo du Mbori ni, rimoko angia Yoane.

⁷Ko aye ni dezire, ka du ni dezire imarago, aboro idi paha kina mbiko ko dũ.

⁸Imarago nangia ko te, ko aye ka du ni dezire imarago.

⁹Ndikidi imarago nadu, nga gu imarago natiga aboro dunduko, i niye ku zegino.

¹⁰Pai adu zegino, i amangi zegino kina rogo ko yo, aboro aina nga ko zegino te.

¹¹Ko aye ku rogo gako ahe, agu yo nangia gako yo i adia nga ko ku gume te.

¹²Ono agu yo nadi ko ku gume, ko aasia pa yo i du ni awiri Mbori, nga agu yo naida pa rimoko;

¹³agu yo i avunga nga yo be kure ya, na gu nyemuhe nga ga kpoto ya, na gu nyemuhe nga ga boro ya, kina be Mbori.

¹⁴Pai asa tiko asa ni boro, ki niraki dagba rani. Ko ahi be undahe na rengo. Ani angana gako taarimo, nga gu taarimo Bako afu fu ko nga ga bangisa vungu. [

¹⁵Yoane nadu ni dezireko, ko ki ta paa ku ari niya, “Ko du mi aya tipa ko, ‘Gu ko naye fuo re ko ru mbata yo fere; bambiko ko nadu mbata fere.’ ”]

¹⁶Bambiko i afu he fu rani dunduko kina yo du gako hibepai ni, undahe k u ri undahe.

¹⁷Bambiko i afu rugute rogo Mose yo; undahe aye na rengo be Yesu Kristo.

¹⁸A nga boro sa nabi Mbori wa sa te; gu bangisa Vungu, du ti ngbadu Mbori nga Ba, ko gumba pa ko.

¹⁹Ga Yoane dezirepai du re ho aYudo akedi aboromotumo ni na aRevi Yerusarema yo i sana ko ya, “Da nga mo?”

²⁰Ko ki kusi he akusa, ka ko ati nga kangu ya, ko akusi he ya, “Kristo nga mi te.”

²¹I ki sana ko, “Wãi tie? Eriya nga mo?” Ko ki ya, “Ko nga mi te.” “Nga gu nebi re?” Ko ki karaga ha ki ya, “Oó.”

²²I ki nimo ka ya fu ko, “Da nga mo? Ani gumba sangbaro fu agu yo nakedi rani. Ya mo wãi tipa tiro?”

²³Ko ki ya, “Mi nga fugo boro napaa ku ari ngbakungba yo, ya, ‘Oni rúrugu ga Gbia gene,’ wa gu nebi agumba ha nangia Yesaya.”

²⁴I akedi yo yo du aFarusi ni.

²⁵I ki sana ko, ki ya fu ko, “Wa adu nga mo ni Kristo ya, ka mo adu nga ni Eriya ya, ka mo adu nga ni gu nebi re ya, tipagine mo abapatizi aboro ti ni tie?”

²⁶Yoane ki karaga ha fu yo, ki ya, “Mi nabapatizi yo ni ime. Gu ni ru dagba roni oni aina nga ni te,

²⁷nga gu ni naye fuo re, mi are nga na zaka giri gako rakata te.”

²⁸Agi apai amangi re Betania yo mbiti Yaradene yo, yo Yoane abapatizi aboro ni.

²⁹Rago ki ya giri Yoane ki bi Yesu ko niye koyo du ko ni, ko ki ya, “Oni bí, gu Wiri Kandoro nga ga Mbori ru, nadia gu ingapai nga ga zegino ku sa yo!

³⁰Ko du re mi agumba pa ko ya, ‘Gu kumba naye fuo re ko ru mbata yo fere; bambiko ko nadu mbata fere.’

³¹Mi aina nga ko te; ono mi aye ka bapatizi aboro ni ime bambiko gi pai re nga, i yugu ko fu aYisaraere.”

³²Yoane nangia dezire, naya, “Mi bi Toro ko nizorõ ngbangbaturũ yo wa mbipo; ko ki nye ri ko.

³³Mi aina nga ko te. Ono gu ko nakedi re mi bapatizi aboro ni ime, ko naya fere, ‘Gu ni mo ka bi Toro ko nizorõ ku ri ni, ki nye ri ni, ni nga gu ni nabapatizi aboro ni Ziazia Toro.’

³⁴Mi bi he, mi nga dezire ko a, ya Wiri Mbori nga ko.”

³⁵Rago ki ya giri berewe a Yoane ki ru, na gu gako abawiriki ue;

³⁶ko ki ngere koyo du Yesu ni wa ko ata, ko ki ya, “Oni ngére, ga Mbori Wiri Kandoro!”

³⁷Agu abawiriki nadu ue, i agi he ko nigumba ha, i ki nipe Yesu.

³⁸Yesu ki sa tiko, ki bi yo i nipe ko, ko ki ya fu yo, “Gine oni agbata?” I ki ya fu ko, “Rabi” (si wa ka i ya, Bayugupai), “mo nidu wari?”

³⁹Ko ki ya fu yo, “Oni yé ka bi ho.” I ki nimo ka ye ki bi ho ko anidu ni; i ki sungu na ko ni gu rago re. Si adu wa ka saa biama nga ga nyemu du.

⁴⁰Agu yo nadu ue, gu ko agi he sa, Yoane nigumba ha, ki nipe ko, ko angia Andarea nga wirina Simona Petero.

⁴¹Ko ki nigbata kina wirinako mbata nga Simona ki bi ko, ki ya fu ko, “Ani bi Masiya” (si wa ka i ya, Kristo).

⁴²Ko ki ye na ko koyo du Yesu ni. Yesu ki ngere koyo du ko ni, ki ya, “Simona nga mo nga wiri Yoane. I ayámba rimoro nga Kefa”, (si wa ka i ya, Petero).

⁴³Rago ki ya giri Yesu ki nikpi nyemu ka ndu ku Gariraya yo, ko ki bi Firipo. Yesu ki ya fu ko, “Mo péke re.”

⁴⁴Were Firipo anidu Betesaida yo, nga gu bakporo nga ga aAndarea na Petero.

⁴⁵Firipo ki gbata Natanaere ki bi ko, ki ya fu ko, “Ani bi gu ko aMose ake pa ko rugute yo, na anebi, nga Yesu nga boro Nazareta, nga wiri Yosefa.”

⁴⁶Natanaere ki ya fu ko, “Ka wene he kuru Nazareta yo?” Firipo ki ya fu ko, “Mo yé ka bi nga ha.”

⁴⁷Yesu ki bi Natanaere ko niye koyo du ko ni, ki ya tipa ko, “Oni ngére ndikidi Yisaraere, biriki ti ko te!”

⁴⁸Natanaere ki ya fu ko, “Ini mo re wari?” Yesu ki karaga ha fu ko ki ya, “Mi nibi ro abi mbata Firipo nikayamba ro, ho mo nidu ni tii vurumo.”

⁴⁹Natanaere ki karaga ha fu ko ki ya, “Bayugupai, Wiri Mbori nga mo! Mo nga Bakindo aYisaraere!”

⁵⁰Yesu ki karaga ha fu ko ki ya, “Kina gu ya mi foro, mi nibi ro tii vurumo, si idi mo pa re tini? Mo abíapai abi nikasusa gere.”

⁵¹Ko ki ya fu ko, “Mi nagumba ha foro ni rengo, ni rengo, oni abí ngbangbaturũ abi si naza, ga Mbori amaraika ki ta ga ku ari yo nizorõ ku ri Wiri boro.”