Read zande Yoane 10 Bible Online

Yoane 10 - zande bible

Yoane 10

¹“Mi nagumba ha fu roni, ni rengo, ni rengo, gu ni ka rima nga ti ngbadimo ku rogo ndugu akandoro yo ya, biti ho akia, ni nga iradĩ nga batuka.

²Ono gu ni ka rimi ti ngbadimo ni nga babanda akandoro.

³Boro pangbadimo niuru he fu ni; akandoro ki nigi fugoni. Ni ki niyambu gani akandoro ti rimora, ki ngbe fu ra mbata yo ku zegi yo.

⁴Ho ni nisa gani ra ni mbata yo dũ, ni ki nindu mbata yo fu ra, akandoro ki nipeke ni; bambiko ami ini fugoni.

⁵Ami napeka nga kungba boro te, ami nioro be ni; bambiko ami aina nga fugo kungba aboro te.”

⁶Gi sanza Yesu agumba fu yo re; ono i aruga nga tiyo na agu apai ko agumba fu yo te.

⁷Yesu ki nimo ka ya fu yo, “Mi nagumba ha fu roni, ni rengo, ni rengo, mi nga ngbadimo tipa akandoro.

⁸Agu yo dunduko naye mbata fere i nangia airadĩ nga abatuka; akandoro agia nga pa yo te.

⁹Mi nga ngbadimo; ka boro rimi mbiko re, ni bati abata, ki nita rima koyo nikuru yo, nibi banambu.

¹⁰Iradĩ naye nga gbua te, ni niye ka dĩ kina ra, na ka imo ra, na ka gbarasa ra. Mi aye ami du ni ungara, ungara ki du na ome rengbe arengba

¹¹Mi nga wene babanda akandoro. Wene babanda akandoro nabaga kpioni tipa akandoro.

¹²Gu ni nga kungba boro, angia nga babanda akandoro ya, adu nga akandoro ni gani ra ya, ni bi waru u niye, ni ki he akandoro, ki gbidi, waru ki zi ra ki gbataka ra agbataka.

¹³Ni nigbidi bambiko ni nga kungba boro, pa akandoro adu nga bangirini a te.

¹⁴Mi nga wene babanda akandoro; mi ini gimi ra, ami ki ini re a,

¹⁵wa ini Buba re, mi ki ini Buba a. Mi nabaga kpiore tipa akandoro.

¹⁶Gu kura akandoro du be re, adu nga rogo gi ndugu re ya; mi ayé aye na ami a, ami agía fugore agia; rimbasara adú adu sa, babanda akandoro ki du sa.

¹⁷Buba nakpi nyemu re, bambiko mi nazoga ungare, ka dia ha berewe.

¹⁸A nga boro sa ka di he be re te, kina mi nazoga ha ni tire. Mi rengbe na zoga ha, mi rengbe na dia ha berewe a. Gi rugute re mi adi he be Buba.”

¹⁹AYudo ki kparaka akparaka dagba yo berewe bambiko agi apai re.

²⁰Agu yo ki ya ni dungu yo, “Daimona ti ko, iranzanga nga ko, tipagine oni agia pako ti ni?”

²¹Akura yo ki ya, “Agi apai re si adu nga ti gu boro du na daimona ti ni te. Ka daimona hasi bangiri iravurari?”

²²Rago pumbo Kpara Yekaru nadu Yerusarema yo; ragozere nadu.

²³Yesu ki nita yekaru yo rogo ga Soromo gbanga ngbadimo.

²⁴AYudo ki nimo ka ye ka vo gbu pati ko, ki ya fu ko. “Rame wãi mo nimbusi rani na pa ro? Si ngia Kristo nga mo gúmba ha fu rani nzunzu.”

²⁵Yesu ki karaga ha fu yo ki ya, “Mi agumba ha fu roni, ka oni aida nga pa re ya. Agu apai mi amanga ni rimo Buba, si nga dezirere.

²⁶Gimi akandoro nga oni te, si du oni aida nga pa re ti ni ya.

²⁷Gimi akandoro nagia fugore, mi ini ra, ami ki nipeke re.

²⁸Mi nafu nyenye unga fu ra; ami akpíka nga berewe te, a nga boro sa ka tuka ra be re te.

²⁹Buba nafu ra fere, ko nga babe ti aboro dũ; a nga boro sa ka tuka ra be Buba te.

³⁰Ani na Buba sa.”

³¹AYudo ki rogo ambia berewe ka zumuda ko na ni.

³²Yesu ki karaga ha fu yo ki ya, “Dungu wene apai yugu mi fu roni be Buba; agu apai re gini gu oni azumuda re ti ni?”

³³AYudo ki karaga ha fu ko ki ya, “Ani azumuda nga ro tipa wene pai te, kina gberãngba yo; na bambiko wa du mo ni kina boro, mo ki sa tiro ni Mbori.”

³⁴Yesu ki karaga ha fu yo ki ya, “A nga si ni keke he rogo gaoni rugute yo ya, ‘Mi aya, ambori nga oni’ te?

³⁵Ka ko aya ti agu yo ga Mbori pai aye fu yo, ambori bambiko ka Ziazia Kekeapai asa nga tihe te,

³⁶oni ya ti gu ko Bako akpara ko ki kedi ko ku zegino, ‘Mo nagberã ngbaro yo;’ bambiko mi aya, ‘Wiri Mbori nga mi?’

³⁷Si ngia mi amanga nga agu apai nga ga Buba te, ka oni idi nga pa re ya.

³⁸Ono ka mi amanga ha amanga, oni avura ida nga pa re ya, oni idi kina pa mangaapai; ya oni ini he ki rugu tironi aruga na ni ya Buba rogo re yo, mi ki du rogo Buba yo.”

³⁹I ki nikpi nyemu ka zia ko berewe; ono ko ki birikpo be yo.

⁴⁰Ko ki ndu ku mbiti Yaradene yo berewe ku rogo gu ba Yoane anabapatizi rogo ni bambata ha; ko ki nye yo.

⁴¹Dungu aboro ki ye koyo du ko ni; i ki ya, “Yoane amanga nga gu pai i aina pai ti ni wa sa te; ono agu apai Yoane agumba tipa gi kumba re si adu ni rengo.”

⁴²Dungu aboro ki idi pa ko yo.