Read zande Yoane 11 Bible Online

Yoane 11 - zande bible

Yoane 11

¹Were kumba adu na kaza, nga Razaro nga boro Betania, nga gu kporo nga ga Maria na wirinari nga Marata.

²Gu Maria nambedi Gbia ni nzeme, ki wege kpenduko ni mangeriri, ri, kawiri adu na kaza nga Razaro.

³Adawiriko ki nimo ka keda sunge koyo du Yesu ni, kiya, “Gbia mo ngére gu ko mo nakpi nyemu ko, ko na kaza.”

⁴Ho Yesu agi he ni, ko ki ya. “Gi kaza re si andu nga sa kpio te, ono si tipa kina ga Mbori taarimo, i taasi rimo Wiri Mbori mbiko ho.”

⁵Were Yesu anakpi nyemu Marata akpi, na wirinari, na Razaro.

⁶Ho ko agi he ni ya ko na kaza, ni gu rago re ko ki raki ue kina ku rogo gu ba ko adu ni.

⁷Fuo gere ko ki ya fu abawiriki tie, “Ani ndú ku Yuda yo berewe.”

⁸Abawiriki ki ya fu ko, “Bayugupai, aYudo naakpi nyemu zumuda ro azumuda ni ambia mbembedi awere; mo nandu koyo berewe?”

⁹Yesu ki karaga ha ki ya, “A nga saa kina rogo gu uru sa bawe na ue te? Ka boro ta uru ni koto nga te, bambiko ni nabi imarago nga ga gi zegino re.

¹⁰Ono ka boro ata yuru, ni koto akota, bambiko imarago kpotoni yo te.”

¹¹Agi apai ko agumba re; fuo gere ko ki ya fu yo, “Badiangbarani ti ni rame nga Razaro, mi nandu ka zingisa ko rame yo.”

¹²Abawiriki ki nimo ka ya fu ko, “Gbia, si ngia ko ti ati ni rame, ko abáta abata.”

¹³Were Yesu agumba ha tipa kpioko; ono i aya ti gu ko nagumba ha tipa ongoda rame yo.

¹⁴Yesu ki nimo ka ya fu yo nzunzu, “Razaro kpi.

¹⁵Rago nangba angba ti re mbiko roni wa mi adu nga yo ya, oni idi pa re; pai te ani ndú koyo du ko ni.”

¹⁶Toma, nangia Bi, ko ki nimo ka ya fu akurako nga abawiriki wẽ, “Ani ndú a tigaani, ani kpi na ko.”

¹⁷Ho Yesu aye ni tie, ko agi he ya ko ima raka ku murã yo biama.

¹⁸Were Betania adu na Yerusarema mbembedi, si adu wa ka akirometere du biata koyo.

¹⁹Dungu aYudo aye koyo du aMarata ni na Maria, ka ngarasa yo be pa kawiriyo.

²⁰Marata, ho ri agi he ni ya Yesu naye, ri ki nimo ka ndu ki gbia ko. Ono Maria asungu asunga dimo yo zaa.

²¹Marata ki nimo ka ya fu Yesu, “Gbia, ka mo adu erẽ, ka kawire akpi nga te.

²²Mi ini aina kina awere ya, gu he mo akpara fu Mbori tipa ha, Mbori afú he afu foro.”

²³Yesu ki ya fu ri, “Kawiro azínga azinga berewe.”

²⁴Marata ki ya fu ko, “Mi ini aina ya ko azínga azinga berewe rago zingabekpio ti yangara rame.”

²⁵Yesu ki ya fu ri, “Mi nga zingabekpio, nga unga. Gu ni ka idi pa re, ka ni vura kpi akpi ni du adu ni ungani.

²⁶Gu ni ka du ni ungani ki idi pa re ni kpi nga te. Mo idi pa gere?”

²⁷Ri ki ya fu ko, “Ii Gbia; mi idi pa ro ya Kristo nga mo, nga Wiri Mbori, nga gu ko naye ku zegino.”

²⁸Ho Marata agumba gi ni re, ri ki ndu ki yambu Maria nga wirinari ni gbuko, ki ya, “Bayugupai erẽ, ko nayamba ro.”

²⁹Maria, ho ri agi he ni, ri ki nimo amo ku ari ni ipo, ki ndu koyo du Yesu ni.

³⁰Yesu ada nga ho kporo yo te, ko adu kina rogo gu ba Marata agbia ko ni.

³¹Agu aYudo nadu na ri dimo yo, nangarasi ri, ho i abi Maria ni, ri namo amo ku ari ni ipo ki kuru ku zegi yo, i ki nipe ri, i ki ya ti gu ri nandu ku pati murã yo ka kpara ni aume yo.

³²Maria, ho ri aye ni ku ho Yesu adu ni, ki bi ko, ri ki nimo ka ti pati nduko, ki ya fu ko, “Gbia, ka mo adu erẽ, ka kawire akpi nga te.”

³³Ho Yesu abi ri ni ri nikpari ni aume, agu aYudo naye na ri i ki nikpari ni aume a tigayo, nunga ki zi ko toroko yo, ko ki nirungo a.

³⁴Ko ki ya, “Wari moi oni ko ni?” I ki ya fu ko, “Gbia, mo yé ka bi ho.”

³⁵Yesuki nikpari ni aume.

³⁶AYudo ki nimo ka ya, “Oni ngére, wa ko anakpi nyemu ko!”

³⁷Agu yo ki ya, “Gi kumba re nga gu ko nahasi bangiri gu kumba nadu na vurari, ka ko abatasa nga gi kumba be kpio a te re?”

³⁸Nunga ki zi Yesu kpotoko yo berewe wa ko aye ku pati murã yo. Were simbia nadu, mbia ki pi ti ngbadimoho.

³⁹Yesu ki ya, “Oni dí mbia ku sa yo.” Marata, nga dawiri gu ko nakpi, ri ki ya fu ko wẽ, “Gbia, ko nafũ afũ wa du rago re; bambiko wa kpi ko ko raki biama.”

⁴⁰Yesu ki ya fu ri, “Mi naya nga foro, ka mo idi pa re, mo bi ga Mbori taarimo, te?”

⁴¹Si du i adi mbia ti ni ku sa yo. Yesu ki ngere ku ari, ki ya, “Buba, mi tambua ro wa gi mo pa re.

⁴²Mi ini aina ya mo nagia pa re a waragoagira; ono gumba mi he gu rimbasa ru vo gbu, i idi pa gu pai nga mo nakedi re.”

⁴³Ho ko agumba ha ni were, ko ki poi ku ari ki ya, “Razaro, mo kúru.”

⁴⁴Gu kumba nakpi ko ki kuru, na kãikãi beko ni remu murã na nduko: kpakpuko ki du ni kãikãi he ni tambara. Yesu ki ya fu yo. “Oni záki ko, ko ndú.”

⁴⁵Agu aYudo naye koyo du Maria ni, i ki bi gu pai ko amangi, i ki nimo ka ida pa ko ni dungu yo.

⁴⁶Ono agu yo ki ndu koyo du aFarusi ni, ki gumba agu apai fu yo Yesu amangi.

⁴⁷Abairamotumo ki nimo ka dungura abororondo na aFarusi, ki ya, “Ani amánga wãi? Bambiko gi kumba namanga dungu agu apai i aina pai ti ni.

⁴⁸Ka ani he ko were, aboro aida pa ko aida dunduko; aRomo ki ye ki di ba rani na ngbatungarani a.”

⁴⁹Ono gu ko adu sa dagba yo, nga Kayafa, nadu ni gbiamotumo ti ngba gu garã re, ko ki ya fu yo, “Oni aina nga pai wa sa te,

⁵⁰oni aruga nga tironi na ni ya kpi boro sa tipa aboro ngba ti roni te, ngbatungarani dunduko ka i akpi nga ya.”

⁵¹Were ko agumba nga gi ni tiko te re; gbiamotumo nangia ko ti ngba gu garã re. Ko agumba ya Yesu nikakpi tipa ngbatungayo;

⁵²tipa kina ngbatungayo sa te, ko dungura agu awiri Mbori adungura sa anagbandaka tuturũ.

⁵³Si du i atona ta bura ko ti ni ni gu rago re ka imo ko.

⁵⁴Si du Yesu ata nga ti ni berewe dagba aYudo gbayaga ya, ko ki guari ho ki ndu ku ringara yo mbembedi ku ngbakungba yo, ku rogo gu bakporo i aniya ti ni Efuraima; ko ki raki koyo na gako abawiriki.

⁵⁵Were ga aYudo pumbo susiri ambeda. Dungu aboro ki kuru ringara yo ka ndu ku Yerusarema yo mbata pumbo susiri nikada, ka girisa tiyo.

⁵⁶I ki nimo ka gbata Yesu, ki ya dagba yo, wa i aru yekaru yo, “Gini pai oni aberã? Ya ko aye nga sa pumbo te?”

⁵⁷Were abairamotumo arú ndika na aFarusi, ya, ka boro ini ho du ko ni, ni ki yugu ho, i zi ko.