Read zande Yoane 13 Bible Online

Yoane 13 - zande bible

Yoane 13

¹Were mbata rago pumbo susiri nikada, Yesu ki niini ya ragoko da ko guari rogo gi zegino re ka ga koyo du Bako ni, ko nakpi nyemu gu gako aboro akpi nadu zegino, ko anakpi nyemu yo akpi kindi dati yangara rago.

²Wa i ari gu riahe nga ga yuru, bakitingbanga naima duaga kpoto Yuda Keriota yo, nga wiri Simona, ko kusi ko,

³Yesu ki niini ya Bako afu ahe ku beko dunduko, ko aye yo du Mbori ni, ko nandu koyo du Mbori ni a.

⁴Ko ki guari pati gu riahe nga ga yuru, ki di gako remu ku sa yo; ki di kitambara, ki ba ha ti ko.

⁵Ko ki uka ime ku akoro gira yo tie, ki tona zunda kpendu abawiriki, niwege he ni gu kitambara ko aba ha ti ko.

⁶Ko ki nimo ka da ti Simona Petero. Simona ki ya fu ko, “Gbia, mo nazunda kpendure azunda?”

⁷Yesu ki karaga ha fu ko ki ya, “Gu pai mi amanga mo aina nga ha awetere; mo arúga tiro na ni giza.”

⁸Petero ki ya fu ko, “Mo azunda nga kpendure wa sa te.” Yesu ki karaga ha ki ya fu ko, “Ka mi azunda nga ro ya, mo adu nga ni dikumbo na mi te.”

⁹Simona Petero ki ya fu ko, “Gbia, kina kpendure sa te, bere a na rire.”

¹⁰Yesu ki ya fu ko, “Gu boro zundu tini zingo zunda ti ni te, kina zunda kpenduni sa, ni ki giri agira dunduko; giri oni agira, ono dunduko te.”

¹¹Bambiko ko aini gu ko aina naye ka kusa ko; si du ko aya ti ni, “Oni gigiri dunduko te.”

¹²Ho ko azundu kpenduyo ni, ki di gako remu, ki sungu berewe, ko ki ya fu yo, “Oni ini gu pai mangi mi fu roni?

¹³Oni niya ti re, Bayugupai, Gbia; oni nagumba ha nzunzu; bambiko wo du mi.

¹⁴Wa du mi tie, ni Gbia ni Bayugupai, zundu kpenduroni, oni ka zunda kpendu akuaroni a.

¹⁵Bambiko mi yugu pai fu roni, oni nimangi wa mangi mi fu roni.

¹⁶Mi nagumba ha fu roni, ni rengo, ni rengo, moyambu nakia nga susi bairani te; na gu ni i akedi ni ni akia nga susi gu ni nakedi ni te.

¹⁷Ka oni ini agi apai re, rago ngba angba ti roni ka oni amanga ha.

¹⁸Mi agumba nga ha tipa roni dunduko te; mi ini agu yo aina mi asia yo; gu Ziazia Kekeapai da ti rengo naya; ‘Gu ni nari gi riahe ni tumba gidoni sare.’

¹⁹Mi nagumba ha fu roni wa du rago re mbata si nikada, ya, ho si ka da ni, oni ki idi pa re aida ya mi nga ko.

²⁰Mi nagumba ha fu roni, ni rengo, ni rengo, gu ni ka di gu ni ku gume kedi mi ni ni di re ku gume; gu ni ka di re ku gume ni di gu ko ku gume nakedi re.”

²¹Ho Yesu agumba ha ni were, ko ki nirungo arungo toroko yo, ko ki ya ni dezire, “Mi nagumba ha fu roni, ni rengo, ni rengo, gu ni dagba roni yo sa nikakusa re.”

²²Abawiriki ki ningereke dagba yo, ka i aruga nga tiyo na gu ni ko agumba ha kuti ni ya.

²³Gu ga Yesu bawiriki adu sa namegedi kuti ngbaduko pati mbisa, gu ko Yesu anakpi nyemu ko.

²⁴Simona Petero ki nimo ka baya ko, ki ya fu ko, “Mo gúmba nga pa gu ni fu rani ko agumba ha kuti ni.”

²⁵Ko ki megedi amegeda, kina ku ho, ti ngbadu Yesu ki ya fu ko, “Gbia, da du?”

²⁶Yesu ki nimo ka karaga ha ki ya, “Ni, mi anogoda he na wiri bakinde, ki fu he fu ni.” Ho ko anogodi, he ni na wiri bakinde, ko ki di he ki fu he fu Yuda, nga wiri Simona Keriota.

²⁷Fuo wiri bakinde, Satana ki duaga kpoto Yuda yo tie. Yesu ki nimo ka ya fu ko, “Gu pai mo amánga mo mángi he ni ipo.”

²⁸Were a nga boro sa nadu pati mbisa naini gu pai ko agumba gi ti ni fu ko te re.

²⁹Bambiko agu yo aya ti gu, wa du mangu be Yuda, Yesu aya fu ko, “Mo ngbéke agu ahe zingo ho amanga rani sa pumbo”; na, ko fu he fu rungorungo aboro.

³⁰Ko ki kuru akura ni ba sa ko nadi wiri bakinde; yuru nadu.

³¹Ho ko andu ni ku zegi yo, Yesu ki nimo ka ya, “Wiri boro ni taasitaasi rimoko awere, Mbori ni taasitaasi rimoko rogo ko yo.

³²Mbori atáasa rimoko ataasa rogo ko yo ni tiko, ko atáasa rimoko ataasa ni ba sa.

³³Rukutu agude, ani aima na oni ngbutuko. Oni agbata re agbata; wa mi aya fu aYudo, ‘Ho mi andu ku ho ni, ka oni ye nga ku ho te’; si mi agumba fu roni awere.

³⁴Vovo rugute fu mi fu roni nga, oni kpi nyemu akuaroni akpi; a wa mi akpi nyemu roni, oni kpi nyemu akuaroni a wo.

³⁵Ka oni akpi nyemu akuaroni, si ka aboro ini ti ni dunduko ya gimi abawiriki nga oni.”

³⁶Simona Petero ki ya fu ko, “Gbia, mo nandu ku wari?” Yesu ki karaga ha ki ya, “Ho mi andu ku ho ni, ka mo peke nga re ku ho awetere; ono mo apéka re ku ho giza.”

³⁷Petero ki ya fu ko, “Gbia, tipagine ka mi apeka nga ro ti ni ku ho awere ya? Mi abaga kpio re abaga tipa ro.”

³⁸Yesu ki karaga ha ki ya, “Mo abága kpioro abaga tipa re? Mi nagumba ha foro, ni rengo, ni rengo, bakondo akúa nga akua, mbata mo nikaora rimore bara biata te.”