Read zande Yoane 16 Bible Online

Yoane 16 - zande bible

Yoane 16

¹“Gumba mi agi apai fu roni re, oni ka kota.

²I adó roni ado bambutiria yo. Ii, ragoho nada ya gu ni ka imi roni ni ya aya ti gu ni narũ he arũ fu Mbori.

³I amánga agi apai re, bambiko i aina nga rani na Ba te.

⁴Ono gumba mi agi apai fu roni re, ya ho ragoho ka da ni, oni ki tingidi he ya mi agumba ha fu roni. “Agi apai re, mi agumba nga ha fu roni mbata te bambiko ani adu na oni.

⁵Mi nandu koyo du gu ko ni awere nakedi re; a nga gu ni sa dagba roni yo sana re ya. ‘Wari mo andu ku ho ni te?’

⁶Nunga moi pai kpotoroni yo, bambiko kina agi apai gumba mi fu roni re.

⁷Pai te rengo mi agumba fu roni; ndu mi ngba fu roni: bambiko ka mi andu nga ya, Mounda ye nga kono du oni ni te; ka mi ndu mi kedi ko akeda kono du oni ni.

⁸Ko, ho ko ka ye ni, ko arúga aboro zegino ti gbegberẽpai, na rurupai, na sapangbanga:

⁹kuti gbegberẽpai, bambiko i aida nga pa re te;

¹⁰kuti rurupai, bambiko mi nandu koyo du Buba ni ka oni abi nga re berewe ya;

¹¹kuti sapangbanga, bambiko kindo gi zegino re i ima sapa ngbanga ko.

¹²“Dungu apai du ngbare mi ka gumba fu roni, ka oni arengba nga na pa ha awere ya.

¹³Ho ko ka ye ni, nga gu Toro nga irarengo, ko angbe fu roni mbata yo sa rengo dunduko; bambiko ko agúmba nga pai ni tiko te; kina agu apai ko ka gia, kina ha ko ka gumba. Ko ayúgo agu apai fu roni nikaye.

¹⁴Ko atáasa rimore ataasa; bambiko ko adía gimi, ki yugu he fu roni.

¹⁵Agu ahe dunduko du be Buba gimi du; si du ya mi ti ni, ko adía gimi, ki yugu he fu roni.

¹⁶“Mi naima ngbutuko, ka oni abi nga re berewe ya; mi aima ngbutuko berewe, oni ki bi re.”

¹⁷Gu gako abawiriki Ki nimo ka ya dagba yo, “Gini pai nga gi ko agumba fu rani re ya, ‘Mi naima ngbutuko, ka oni abi nga re ya; mi aima ngbutuko berewe, oni ki bi re;’ na, ‘bambiko mi nandu koyo du Buba ni’?”

¹⁸I ki nimo ka ya, “Gini pai nga gi ko agumba re ya, ‘Mi naima ngbutuko’? Ani aina nga gu pai ko agumba te.”

¹⁹Yesu aini aina ya i nakpi nyemu ka sana ko, ko ki ya fu yo, “Oni nasana he asana dagba roni tipa gi pai gumba mi re ya, ‘Mi naima ngbutuko, ka oni abi nga re ya, mi aima ngbutuko berewe, oni ki bi re’?

²⁰Mi nagumba ha fu roni, ni rengo, ni rengo, oni akpára akpara ni aume ki nikpari ku ari, ono rago angba angba ti aboro zegino. Nunga amánga roni amanga, ono gaoni nunga asá tihe ni ngbarago.

²¹Ho gude nizuba de ni nunga namanga ri amanga, bambiko ragori da; ono ho ri nivungu gude ni, ri natingida nga pa bakere ima berewe te, bambiko rago nangba angba ti ri ya ri vungu boro ku zegino.

²²Nunga namanga roni awere a; ono mi abi roni abi berewe, rago ki ningba angba kpotoroni yo, a nga boro sa nikadia gaoni ngbarago ti roni te.

²³Ni gu rago re oni asána nga re tipa he wa sa te. Mi nagumba ha fu roni, ni rengo, ni rengo, gu he oni ka nikpari pa ha fu Buba, ko afu he afu fu roni ni rimore.

²⁴Oni akpara nga pa he ni rimore mbata wa sa te; oni kpári pa he, oni adia ha adia, gaoni ngbarago moi pai.

²⁵“Gumba mi agi apai fu roni re ni sanza; ragoho nada, ho mi ka gumba nga pai ni fu roni ni sanza berewe ya, mi agúmba pa Buba agumba fu roni nzunzu.

²⁶Ni gu rago re oni akpára akpara ni rimore. Mi agumba nga ha fu roni ya, mi akpára akpara fu Buba tipa roni te;

²⁷bambiko Buba nakpi nyemu roni akpi ni tiko, bambiko oni kpi nyemu re, ki idi pa re ya mi aye yo du Buba ni.

²⁸Mi aye yo du Buba ni, ki ye ku zegino; were, mi naguari zegino, ki ndu koyo du Buba ni.”

²⁹Gako abawiriki ki ya, “Mo ngére, mo nagumba ha awere nzunzu, mo agumba nga ha ni sanza te.

³⁰Ani ini awere ya mo ini apai dunduko, zingo boro amanga nga ro ni sana ro te; si idi ani pa ro ti ni ya mo aye yo du Mbori ni.”

³¹Yesu ki karaga ha fu yo ki ya. “Oni idi pa re awere?

³²Oni ngére, ragoho nada, ii, si da, oni agbándaka agbandaka yasika dunduko ku kpuroni yo, ki he re ahe ni sa re. Mi ni sa re te, bambiko ani na Buba.

³³Gumba mi agi apai fu roni re, oni du zezeredi rogo re yo. Oni narungo arungo zegino; ono oni wása awasa; mi di be zegino.”