Read zande Yoane 17 Bible Online

Yoane 17 - zande bible

Yoane 17

¹Agi apai re Yesu agumba; ko ki ningere ku ngbangbaturũ vo, ki ya, “Buba, ragoho da; mo táasi rimo wiro, wiro táasi rimoro;

²wa asia mo pa aboro fu ko dũ, ya agu yo fu mo yo fu ko, ko fu nyenye unga fu yo.

³Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.

⁴Mi taasi rimoro rogo kpotosende, mi nyasi gu sunge fu mo fere mi mangi he.

⁵Ako Buba, mo táasi rimorani na mo awere ni gu taarimo ani adu na ni na mo mbata zegino nikadu.

⁶“Mi yugu rimoro fu agu aboro mo afu yo fere zegino. Gamo yo nadu, mo ki fu yo fere; i ka kuti ga pai.

⁷I ini awere ya agu apai fu mo fere dũ si ye yo du mo ni;

⁸bambiko agu apai fu mo fere mi fu he fu yo; i ki di he, i ki ini ni rengo ya mi aye yo du mo ni, i ki idi pa re ya mo nakedi re.

⁹Mi nakpara tipa yo; mi akpara nga tipa aboro zegino te, ono tipa agu yo fu mo yo fere; bambiko gamo yo du.

¹⁰Agu ahe dunduko nga gimi gamo du, gamo nga gimi; mi ni taasitaasi rimore rogo yo yo.

¹¹Mi zegino berewe te, agi yo du zegino re, mi naye koyo du mo ni. Ako Ziazia Buba, mo ká kuti agu yo fu mo yo fere ni rimoro, i du adu sa wa kina rani.

¹²Wa ani adu na yo, mi aka kuti yo ni gu rimoro fu mo fere. Mi abanda yo abanda, gu ni akpi nga wa sa te, kina wiri kpio; Ziazia Kekeapai da ti rengo.

¹³Mi naye koyo du mo ni awere; agi apai re mi nagumba ha zegino, gi ngbarago moi pai ti yo.

¹⁴Mi fu ga pai fu yo; aboro zegino asogo yo asoga, bambiko aboro zegino nga yo te, wa kina re adu nga ni boro zegino ya.

¹⁵Mi akpara nga foro mo rogo yo aroga zegino te, ono mo ka aka kuti yo ti gbegberẽ ko.

¹⁶Aboro zegino nga yo te, wa kina re adu nga ni boro zegino ya.

¹⁷Mo kpára yo rogo rengo yo; ga pai nga rengo.

¹⁸Wa mo akedi re ku zegino, kina wo kedi mi yo ku zegino.

¹⁹Mi kpara tire tipa yo, i du ni kparakpara yo a ni tiyo ni rengo.

²⁰“Mi akpara nga tipa kina agi yo sa te re, ono tipa agu yo a nikaida pa re mbiko gayo pai,

²¹i du adu sa dunduko; wa kina ro, Buba, du rogo re yo, mi ki du rogo ro yo, i du rogo rani yo a; aboro zegino idi pa re ya mo kedi re.

²²Gu taarimo fu mo fere mi fu be fu yo, i du adu sa, wa kina rani du adu sa;

²³mi du rogo yo yo, mo ki du rogo re yo, i mongo du adu sa; aboro zegino ini ya mo nakedi re, mo nakpi nyemu yo, wa kina gu mo nakpi nyemu re.

²⁴Buba, agu yo fu mo yo fere, mi nakpi nyemu ani du na yo ho du mi ni a; i bi gu gi taarimo fu mo fere, bambiko mo aima diga nikpi nyemu re mbata zegino nikadu.

²⁵Ako ruru Ba, aboro zegino aina nga ro te, mi naini ro; agi yo ini re ya mo nakedi re.

²⁶Mi yugu rimoro fu yo, mi ayúgo ho ayugo; ya gu nyemuse mo nakpi nyemu re na ni, si du rogo yo yo, mi ki du rogo yo yo.”