Read zande Yoane 18 Bible Online

Yoane 18 - zande bible

Yoane 18

¹Ho Yesu agumba agi apai ni re, ko ki ndu na gako abawiriki ku mbiti wiri di yo nga Kidirona, yo ati adu ni, ko ki ndu ku rogo yo, ni tiko na gako abawiriki.

²Were, Yuda nga gu ko nakusi ko, ko aini baraha a; bambiko Yesu anandu koyo na gako abawiriki dedede.

³Yuda ki niye na awe na abaro na amarã kpio tie, ko nadi rika vura abanzengere, na abaziaboro be abairamotumo na aFarusi.

⁴Yesu ki nimo ka ina agu apai dunduko naye sa ko, ko ki ndu mbata yo, ki ya fu yo, “Da oni agbata ni?”

⁵I ki karaga ha fu ko ki ya, “Yesu nga boro Nazareta.” Yesu ki ya fu yo, “Mi nga ko.” Yuda, nga gu ko nakusi ko, i ki mongo ru na yo a.

⁶Ho ko aya ni fu yo, “Mi nga ko,” i ki ndu andu ni giiyo, ki tiwi ku sande.

⁷Ko ki nimo ka sana yo berewe ki ya, “Da oni agbata ni?” I ki ya, “Yesu nga boro Nazareta.”

⁸Yesu ki karaga ha fu yo ki ya. “Mi nigumba ha fu roni ya mi nga ko. Si ngia mi oni agbata re, agi yo guari re.”

⁹Gu pai da ti rengo ko agumba ya, “Agu yo fu mo yo fere mi aingisa nga gu ni wa sa te.”

¹⁰Basape nadu be Simona Petero, ko ki nimo ka mo ho, ki de ga gbiamotumo moyambu na ni, ki kati kumbatuko akata. Were gu moyambu rimoko nangia Maruko.

¹¹Yesu ki nimo ka ya fu Petero. “Mo moi basape ku sirikpa ha yo, gu inga fu Buba fere ka mi mbiri nga he ti ngbaha, te?”

¹²Si du rika vura abanzengere azi Yesu ti ni, na banyaki na abaziaboro nga ga aYudo yo, ki vo ko,

¹³ki ngbe fu ko ku mbata yo koyo du Ana ni mbata; bambiko ko adu ni gbio Kayafa, gu ko nadu ni gbiamotumo ti ngba gu garã re.

¹⁴Were Kayafa nangia gu ko nagumba pai fu aYudo ya kpi boro sa tipa aboro ngba.

¹⁵Simona Petero ki nipe Yesu, kura bawiriki ki mangi a wo. Were gu bawiriki re gbiamotumo aini ko, i ki rimi na Yesu ku tii gu mbaraza nga ga gbiamotumo.

¹⁶Ono Petero aru kina pangbadimo zegi. Si du kura bawiriki akuru ti ni, nga gu ko gbiamotumo aini ko, ki gumba pai fu gu de nanidu pangbadimo, ki rimisi Petero.

¹⁷Gu de nanidu pangbadimo ri ki nimo ka ya fu Petero, “Mo nidu a dagba ga gi kumba abawiriki yo re?” Ko ki ya, “Oó,”

¹⁸Were amoyambu arundu kina ho na abaziaboro, i naginda kingiri we; bambiko rago zere nadu; i ki niawu we; aPetero ki du na yo a, ki ru niawu we.

¹⁹Gbiamotumo ki nimo ka sana Yesu tipa gako abawiriki, na gako yugopai.

²⁰Yesu ki karaga ha fu ko ki ya, “Mi gumba ha agumba gbayaga fu aboro zegino; mi ayugu pai waragoagira rogo bambutiria, na yekaru yo, ho aYudo nidungura tiyo ku ho ni dunduko; mi agumba nga pai ni gbuko wa sa te.

²¹Tipagine mo asana re ti ni? Mo sána agu yo nagi pare ya, gini pai mi agumba fu yo; mo ngére, agi yo ini agu apai mi agumba re.”

²²Ho ko agumba gi ni re, gu baziaboro naru ho ko ki yawa Yesu ni beko, ki ya, “Mo nakaraga pai fu gbiamotumo were?”

²³Yesu ki karaga ha fu yo ki ya, “Si ngia mi gumba gbegberẽpai, mo yugu gu gbegberẽpai nga ha: ka si du nzunzu, yawa mo re tipagine?”

²⁴Ana ki nimo ka keda ko ni vodivodi ko koyo du Kayafa ni nangia gbiamotumo.

²⁵Were Simona Petero aru aru niawu we. I ki nimo ka ya fu ko, “Mo nidu dagba gako abawiriki yo, te?” Ko ki ti kangu he ati, ki ya, “Oó.”

²⁶Gu ga gbia moyambu, nga gume gu ko Petero akati tuko, ko ki ya, “Mi nabi nga roni na ko ati yo te?”

²⁷Petero ki nimo ka ti kangu he ati berewe; bakondo ki kua akua ni ba sa.

²⁸I ki nimo ka ngbe ku mbata yo fu Yesu yo du Kayafa ni ku bambu bazogo yo. Ngbatutu nadu. I arima nga ni tiyo ku tii bambu bazogo yo te, i ka biriko, ya i ri pumbo susiri.

²⁹Pirato ki nimo ka kura ku zegi yo du yo ni, ki ya, “Gini pai ye oni ka kita ngbanga gi kumba ti ni re?”

³⁰I ki karaga ha fu ko ki ya, “Ka gi kumba adu nga ni iragbegberẽpai re ya, ka ani fu nga ko foro te.”

³¹Pirato ki nimo ka ya fu yo, “Oni dí ko ni sa roni, ki sapu ngbanga ko ni sangba gaoni rugute.” AYudo ki ya fu ko. “Ru nga imo boro fu rani te.”

³²Gu ga Yesu pai ki da ti rengo, ko agumba, ka yugo gu kpio ko ka kpi.

³³Pirato ki nimo ka rima berewe ku bambu bazogo yo, ki yambu Yesu, ki ya fu ko, “Bakindo aYudo nga mo?”

³⁴Yesu ki karaga ha ki ya, “Watadu kina ro nagumba gi ni tiro re, na kura aboro gumba ha foro tipa re?”

³⁵Pirato ki karaga ha ki ya, “Yudo nga mi? Angbatungaro na abairamotumo fu ro fere: gine mangi mo?”

³⁶Yesu ki karaga ha ki ya, “Gi ngbi aenga nga rogo gi zegino te re; ka gi ngbi aenge rogo gi zegino re, ka gimi amoyambu naso vura tie, i ka fu re fu aYudo; were gi ngbi aenga nga etere.”

³⁷Pirato ki nimo ka ya fu ko, “Bakindo nga mo ake?” Yesu ki karaga ha ki ya, “A si mo agumba re ya bakindo nga mi. Gi pai i avungu re sa ni re, gi pai mi aye sa ni re ku zegino, nga ka du ni dezire rengo. Agu yo nga ga rengo yo i nagia fugore.”

³⁸Pirato ki ya fu ko, “Gine nga rengo?” Ho Pirato agumba gi ni re, ko ki kuru ku zegi yo du aYudo ni berewe, ki ya fu yo, “Mi abi nga irairapai ti ko wa sa te.

³⁹Sinoroni ningia kusa mi boro sa fu roni rago pumbo susiri. Si du oni akpi nyemu mi kusi Bakindo aYudo ti ni fu roni?”

⁴⁰I ki nimo ka paa ku ari berewe, ki ya, “Gi kumba te re, kina Baraba.” Were Baraba adu ni batuka.