Read zande Yoane 19 Bible Online

Yoane 19 - zande bible

Yoane 19

¹Pirato ki nimo ka dia Yesu tie, ki ta ko.

²Abanzengere ki tu kiwe ki kãi he ni kpakpari, ki moi he ku ri ko, ki ukadi ko ni ngungungu remu.

³I ki ye koyo du ko ni, ki ya, “Ako Bakindo a Yudo!” I ki ta ko ni beyo.

⁴Pirato ki kuru ku zegi yo berewe, ki ya fu yo, “Oni ngére, mi naye na ko ku zegi no fu roni, oni ini ya mi abi nga irairapai ti ko wa sa te.”

⁵Yesu ki nimo ka kura ku zegi yo, na kpakpari kiwe riko yo na ngungungu remu ti ko. Pirato ki ya fu yo, “Oni ngére, gi boro re!”

⁶Ho abairamotumo abi ko ni na abaziaboro, i ki nimo ka paa ku ari, niya, “Mo wági ko, mo wági ko!” Pirato ki ya fu yo, “Oni dí ko nisa roni, ki wagi ko; bambiko mi abi nga irairapai ti ko wa sa te.”

⁷AYudo ki karaga ha fu ko ki ya, “Rugute be rani, sangba gu rugute nga ko ka kpi akpi, bambiko ko aya Wiri Mbori nga ko.”

⁸Ho Pirãto agi gi pai ni re, ko ki nigunde agunde susi gu naadu mbata.

⁹Ko ki rimi ku bambu bazogo yo berewe, ki ya fu Yesu, “Mo aenge wari?” Ka Yesu akaraga nga pai fu ko wa sa ya.

¹⁰Pirato ki nimo ka ya fu ko, “Mo agumba nga pai fere te? Mo aina nga ya pa kusa ro be re, na pa waga ro te?”

¹¹Yesu ki karaga ha ki ya fu ko, “Pai ngbaro sa re te, kina gu ka i asia pa re foro ari yo; si du gu ni nafu re foro ni du na gbegberẽpai susi.”

¹²Ta da erẽ Pirato ki nikpi nyemu ka kusa ko. Ono aYudo ki nipoi ku ari niya, “Ka mo kusi gu kumba re, badia Kaisara nga mo te; gu ni ka sa tini ni bakindo ni sa mungu ti Kaisara.”

¹³Ho Pirato agi agi apai ni re, ko ki ye na Yesu ku zegi, ki sungu auru mbata sapangbanga rogo gu ba i aniya ti ni Kpasakpasa mbia Basunga, nga Gabata rogo pa Ebere.

¹⁴Were rago Mbakadaahe nadu sa susiri: si adu wa ka bebere uru du. Ko ki ya fu aYudo, “Oni ngére, gaoni Bakindo!”

¹⁵I ki nimo ka paa ku ari, “Mo dí ko ku sa yo, mo wági ko awaga.” Pirato ki ya fu yo, “Mi awága gaoni Bakindo?” Abairamotumo ki karaga ha ki ya, “Bakindo ku ri rani te kina Kaisara.”

¹⁶Ko ki nimo ka fu ko fu yo tie i wagi ko.

¹⁷I ki nimo ka dia Yesu. Ko ki kuru ku zegi yo, na gako wagiwagi ngua, ku rogo gu ba i aniya ti ni Ba memeri, i aniya ti ni Gorogota rogo pa Ebere.

¹⁸Ho i awagi ko ni, na agu yo ue na ko, gu ko ki du ku bani, Yesu ki du bangbanda.

¹⁹Pirato ki ke pako a, ki moi he ti wagiwagi ngua. Ko ake gu pai nga “Yesu nga boro Nazareta, bakindo aYudo.”

²⁰Dungu aYudo ki nimo ka geda gi pai re; bambiko gu ba i awagi Yesu rogo si ambedi ambeda na bakporo. I ake he pa Ebere yo, na pa Romo yo, na pa Giriki yo.

²¹Ga aYudo abairamotumo i ki nimo ka ya fu Pirato, “Ka mo ké nga, ‘Bakindo aYudo ya’; ono, kina ko aya, ‘Bakindo aYudo nga mi.’ ”

²²Pirato ki karaga ha ki ya, “Kina gu ke mi, mi ke he.”

²³Ho abanzengere awagi Yesu ni, i ki nimo ka roga gako remu, ki kparaka rogo biama dagba yo, ni ba sa sa; na baukadi a. Were baukadi adu nga ni rungurungu he te, si adu adu ni tutu he dunduko.

²⁴Si du i ki nimo ka ya ti ni dagba yo, “Ka ani síri nga ha asira ya, ono ani bá kina ake ti ni, gu ni di he;” Ziazia Kekeapai da ti rengo, wa si aya, “I akparaka gi remu dagba yo, ki ba ake ti gi baukadi.” Si du abanzengere amangi agi apai ti ni re.

²⁵Were anako arundu kina pati ga Yesu wagiwagi ngua, na wirinari, na gu Maria nga dia Keropa, na Maria Magadara.

²⁶Ho Yesu abi nako ni, na gu bawiriki naru ho, gu ko ko anakpi nyemu ko, ko ki nimo ka ya fu nako, “Na, mo ngére, wiro!”

²⁷Ko ki ya fu bawiriki wẽ, “Mo ngére, namo!” Ni gu rago re bawiriki ki di ri adia ku kpuko yo.

²⁸Fuo gere, Yesu ki niini ya apai nyasi awere dũ, ko ki ya, “Gomoro ime namanga re,” Ziazia Kekeapai da ti rengo.

²⁹He adu ho nahi be kakai imekakue; si du i amoi fakayofakayo he ti ni ku ngba usopo yo si nahi be kakai imekakue, ki ye na ni sa ngbako.

³⁰Ho Yesu adi kakai imekakue ni, ko ki ya, “Si nyasi;” ko ki zogo riko, ki fu toroko.

³¹Bambiko rago Mbakadaahe nadu, ka akangba anye nga ti wagiwagi ngua rago sabiti ya (bambiko rago gu sabiti re si adu ni bakumba rago), aYudo ki nimo ka sana Pirato i kuadi nduyo, i rogo yo ku sa yo.

³²Abanzengere ki nimo ka ye, ki kuadi ndu bambata ko, na ga gu kura ko i awagi yo na ko.

³³Ono ho i aye ni koyo du Yesu ni, ki bi ko ko naima kpi, ka i akuadi nga nduko ya.

³⁴Ono gu banzengere ki rũ ko ni baso pavuko, kure ki gbadi agbada ni ba sa na ime.

³⁵Gu ko nabi he ko nadu ni dezire he―ko adu ni dezire he ni rengo. Ko aini ya ko nagumba ha ni rengo―oni idi pa ko a.

³⁶Bambiko agi apai amangi re Ziazia Kekeapai da ti rengo naya, “Memeko akita nga wa sa te.”

³⁷Kura Ziazia Kekeapai ki ya berewe, “I angéra angera koyo du gu ko ni i narũ ko.”

³⁸Fuo agi apai re Yosefa nga boro Arimataya, nanidu ni ga Yesu bawiriki, ko ki sana Pirato, ni gbuko bambiko gunde aYudo, ko di kangba Yesu ku sa yo; Pirato ki idi he. Ko ki nimo ka ye, ki di kangbako ku sa yo.

³⁹Nikodemo ki ye a tigako, nga gu ko naye koyo du Yesu ni mbata yuru. Ko aye na wene fuõngua na aaroi du barõaha wa akiro 45.

⁴⁰Si du i adi kangba Yesu ti ni, ki kãi he ni pusi remu na wene fuõangua, wa du sino aYudo ka kpisida boro.

⁴¹Were gu ba i awagi ko rogo ati adu ho; vovo murã adu ati yo i ata piga nga boro rogo yo mbata ya.

⁴²I ki pigi Yesu kina yo tie bambiko ga aYudo rago Mbakadaahe nadu bambiko murã adu mbembedi.