Read zande Yoane 3 Bible Online

Yoane 3 - zande bible

Yoane 3

¹Were kumba adu yo dagba aFarusi, rimoko angia Nikodemo, nga gbia aYudo.

²Ko ki ye koyo du Yesu ni yuru, ki ya fu ko, “Rabi, ani ini ya bayugupai nga mo ye yo du Mbori ni; bambiko a nga boro sa ka mangi agi apai i aina pai ti ni mo amanga te re, kina gu ka Mbori du na ni.”

³Yesu ki karaga ha fu ko ki ya, “Mi nagumba ha foro ni rengo, ni rengo, ka boro bi nga ga Mbori ngbi te kina gu ka i vungu ni avunga berewe.”

⁴Nikodemo ki ya fu ko, “Ho boro nidu ni ni gbinza ni i niwiri pa vunga ni wãi? Ni nirimi arima ku rukumbu nani yo berewe i vungu ni?”

⁵Yesu ki karaga ha ki ya, “Mi nagumba ha foro ni rengo, ni rengo, ka boro rimi nga ku rogo ga Mbori ngbi yo te, kina gu ka i vungu ni avunga be ime na Toro.

⁶Gu vungu vungu yo be boro si nga boro boro; na gu vungu vungu yo be Toro, si nga toro.

⁷Ka mo báki nga bangiro ti gu pai ya mi foro, ‘I ka vunga roni avunga berewe’ ya.

⁸Yuge naya kina ku ho si akpi nyemu ni, mo ki nigi woroho agia, ono mo naina nga ho si aye ni, na ho si andu ku ho ni te; wo du gu boro i nivungu ni be Toro.”

⁹Nikodemo ki karaga ha fu ko ki ya, “Ka agi apai wiri pa du wãi re?”

¹⁰Yesu ki karaga ha fu ko ki ya, “Ga aYisaraere bayugupai nga mo, mo aruga nga tiro na agi apai te re?

¹¹Mi nagumba ha foro ni rengo, ni rengo, ani nagumba kina gu pai ini ani, ani nidu ni dezire kina gu pai bi ani. Oni adia nga gaani dezire ku gume te.

¹²Wa mi nagumba pa úzegino fu roni, ka oni aida nga ha ya, ka mi gumba pa ũngbangbaturũ fu roni, oni wiri pa ida ha wãi?

¹³A nga boro sa naga ku ngbangbaturũ yo te, kina gu ko nazorõ ngbangbaturũ yo, nga Wiri boro, du ngbangbaturũ yo.

¹⁴Wa Mose atumba wo ku ari ngbakungba yo, kina wo Wiri boro ka du adu ni tumbatumba ko ku ari,

¹⁵ya gu ni ka idi pa ko, nyenye unga du adu be ni.”

¹⁶Bambiko Mbori akpi nyemu aboro akpi zegino dú, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.

¹⁷Bambiko Mbori akeda nga Wiri ku zegino ko sapu ngbanga aboro zegino te. Ko akedi ko aboro zegino bati abata mbiko ko.

¹⁸Gu ni ka idi pa ko i sapu nga ngbanga ni te: gu ni ka ida nga pa ko ya i ima sapa ngbanga ni, bambiko ni aida nga pa rimo bangisa Wiri Mbori te.

¹⁹Sapangbanga nga gere, nga imarago ye ku zegino, aboro ki nikpi kina nyemu bitimo ku ba imarago; bambiko gayo apai nangia gbegberẽpai.

²⁰Bambiko gu ni nainga pai ni nasoga imarago asoga, ni naye nga ku imarago te, i ka za ni ti gani apai.

²¹Ono gu ni namanga rengo ni naye ku imarago, gani pai dũ ni yuguyugu he, bambiko wa ni nimangi he kina kpoto Mbori yo.

²²Fuo agi apai re a Yesu ki ye na gako abawiriki ku rogo gu ringara nga ga aYudo; ko ki nye yo na yo ki nibapatizi aboro.

²³Yoane anabapatizi yo a tigako Ainona yo mbembedi ku Sarima yo, bambiko bakere ime nadu yo. Aboro ki ye, ko ki bapatizi yo.

²⁴Bambiko i aba nga Yoane ho ku bambukisa yo te.

²⁵Sakapai ki nimo ka du dagba ga Yoane abawiriki na gu Yudo sa tipa girisa.

²⁶I ki ye koyo du Yoane ni, ki ya fu ko, “Bayugupai, gu ko oni adu na ko mbiti Yaradene yo, mo adu ni dezireko, mo bí, ko nabapatizi aboro, aboro naye koyo du ko ni dũ.”

²⁷Yoane ki karaga ha ki ya, “Ka boro di nga he ni tini wa sa te, kina gu ka i fu he afu fu ni ngbangbaturũ yo.

²⁸Oni nga adezirere ni tironi, wa mi aya, Kristo nga mi te, kedi yo re akeda mbata fu ko.

²⁹Gu ni du pazuapazua de be ni ni nga kumbari; ono gu badia kumbari naru ka gia pani, rago nangba angba ti ni bakere gbe bambiko fugo kumbari; si du moi gi gimi ngbarago pai ti ni re.

³⁰Pako ka kia, ono pare ka paya.”

³¹Gu ni naye ari yo ni susi aboro dũ. Gu ni enge sende no ni nga ga sende ni, ni nagumba pa úsende. Gu ni naye ngbangbaturũ yo ni susi aboro dũ.

³²Gu pai bi ni na gu gi ni, si du ni ni dezirehe; a nga boro sa di gani dezire ku gume te.

³³Gu ni di gani dezire ku gume ni nga dezire, ya Mbori nga rengo.

³⁴Bambiko gu ni Mbori akedi ni ni nagumba agu apai nga ga Mbori: bambiko ko aringbisa nga Toro aringbisa ka fu ko fu nite.

³⁵Mbori nga Ba nakpi nyemu Wiriko, ko fu ahe dunduko ku beko.

³⁶Gu ni ka idi pa Wiri nyenye unga du adu be ni; ono gu ni ka gia nga sangba Wiri ya, ni bi nga unga te, kina ga Mbori zinga nye ri ni.