Read zande Yoane 4 Bible Online

Yoane 4 - zande bible

Yoane 4

¹Ho Gbia aini ni ya aFarusi agi he ya Yesu aroga abawiriki ki nibapatizi yo susi Yoane,

²(ono Yesu abapatizi nga yo ni tiko te, kina gako abawiriki).

³Ko ki guari Yuda yo, ki ndu berewe ku Gariraya yo.

⁵Si du ko aye ti ni ku rogo gu bakporo nadu Somorona yo, i aniya ti ni Sukara, mbembedi na gu dagba rago Yakoba afu fu wiriko nga Yosefa;

⁶ga Yakoba guga adu yo. Yesu ki ta mbu ambu be gako nduge, ki nimo ka sunga kina ku ho pati guga. Si adu wa ka bebere uru du.

⁷De ki niye nga boro Somorona ka tu ime. Yesu ki ya fu ri, “Mo fú he fere mi mbiri he.”

⁸Bambiko gako abawiriki andu ku rogo bakporo yo ka ngbeka riahe.

⁹De nga boro Somorona ki nimo ka ya fu ko, “Wa du mo nga Yudo, si wãi mo asana re ti ni tipa ime ka mbira ha, wa du mi nga de nga boro Somorona?” Bambiko aYudo nangba nga dagba yo na aSomorono te.

¹⁰Yesu ki karaga ha fu ri ki ya, “Ka mo ini ga Mbori gamahe, na gu ko naya foro, ‘Mo fú he fere mi mbiri he’, ka mo sana ko, ko ki fu unga ime foro.”

¹¹De ki ya fu ko, “Gbia, he be ro ka mo tu he na ni te, guga ni dudungura ha; wari ka mo bi gu unga ime ni tie re?

¹²Mo nga bahe ti barani nga Yakoba nafu guga fu rani, nanambira ha ni tiko, na awiriko a, na gako abagara?”

¹³Yesu ki karaga ha fu ri ki ya, “Gu ni ka mbira gi ime re, gomoro ime mangi ni amanga berewe;

¹⁴ono gu ni ka mbiri gu ime ka mi fu fu ni gomoro ime mangi nga ni berewe te; gu ime ka mi fu fu ni si du kpotoni yo ni gugaabi niguku ku ari sa nyenye unga.”

¹⁵De ki ya fu ko, “Gbia, mo fú gi ime re fere, ka gomoro ime amánga nga re, mi ye ti gene kono ka tu he ya.”

¹⁶Yesu ki ya fu ri, “Mo ndú, ki yambu kumbamo, oni ki ye kono.”

¹⁷De ki karaga ha fu ko ki ya, “Kumba be re te” Yesu ki ya fu ri. “Gumba mo ho ni rengo ya, ‘kumba be re te’;

¹⁸bambiko mo arogo akumba bisue; gu ko du be ro awere nga kumbamo te; gumba mo gere ni rengo.”

¹⁹De ki ya fu ko, “Gbia, mi ini aina ya nebi nga mo.

²⁰Abarani anairisa ri gi bagangara re; oni ya Yerusarema yo nga gu ba ka aboro airisa rogo.”

²¹Yesu ki ya fu ri, “De, mo idi pa re, ragoho nada ho mo ka irisa nga Mbori nga Ba ni ri gi bagangara re, na Yerusarema yo a ya.

²²Oni nairisa gu he oni aina nga ya; ani nairisa gu he ini ani; bambiko bata aye yo du aYudo ni.

²³Ono ragoho nada, si awere, ho ndikidi aboro irisa ka irisa Mbori nga Ba ni ni toro na rengo, bambiko Mbori nga Ba nakpi nyemu kina yo i du ni gako aboro irisa.

²⁴Mbori nga Toro; agu yo nairisa ko i ka irisa ko ni toro na rengo.”

²⁵De ki ya fu ko, “Mi ini ya Masiya naye i niya ti ko Kristo; ho ko ka ye ni, ko agúmba pa ahe dunduko fu rani.”

²⁶Yesu ki ya fu ri, “Mi nga ko nagumba pai foro re.”

²⁷Ta da erẽ gako abawiriki ki ye; si ki niiriwo airiwo ti yo wa ko afura na de; a nga boro sa naya, “Gine mo akpi nyemu he?” na, “Tipagine mo nafura ti ni na ri,” te?

²⁸De ki nimo ka he gari runge, ki ga ku rogo bakporo yo, ki ya fu akumba,

²⁹“Oni yé, ka bi gu kumba, gumba agu apai fere dunduko mi namanga. Ka ko du ni Kristo te?”

³⁰I ki kuru bakporo yo, ki niye koyo du ko ni.

³¹Ti gu saa re abawiriki ki kpari fu ko, ki ya, “Bayugupai, mo rí he.”

³²Ko ki ya fu yo, “Riahe be re mi ari nga gu oni aina nga ya.”

³³Abawiriki ki nimo ka ya dagba yo, “Boro niye aye na he fu ko ko ri he?”

³⁴Yesu ki ya fu yo, “Gi riahe nga manga kina gu pai gu ko akpi nyemu he nakedi re, mi nyasi gako sunge.

³⁵Ya oni, ‘Diwi ata du nga biama, regbo ke he da’, te? Oni ngere, ya mi fu roni, oni tumba nga bangironi, ka ngera nga ku ati yo, si ima vura avura wa ka i ke he ake.

³⁶Gu ni nake he ni zi mosoro azia, ki nikafu rindi ngua sa nyenye unga; gu ni ka mi he na gu ni ka ke he rago amongo ngba ti yo.

³⁷Bambiko gi pai nga rengo re ya, ‘Bamitunga sa, bakehe akia.’

³⁸Mi akedi roni oni ke gu oni amanga nga sunge he ya, mangi kura aboro sunge he, ndu oni rogo fuo gayo sunge.”

³⁹Dungu aSomorono naidi pa ko rogo gu bakporo re bambiko gu pai nga ga de, gu ri naya, “Ko gumba pa agu apai dunduko mi namanga.”

⁴⁰Were ho aSomorono aye ni koyo du ko ni, i ki kpari fu ko ko nye na yo; ko ki raki koyo ue.

⁴¹Agu yo ki idi pa ko ni dungu yo mbiko gako pai.

⁴²I ki ya fu gu de re, “A were ani idi pa ko, a nga bambiko ga pai te; bambiko ani gi he ni tirani, ki ini ya gi kumba re nga Batasi aboro zegino ni rengo.”

⁴³Rame ki du ue ko ki guari ho ki ndu ku Gariraya yo.

⁴⁴Bambiko Yesu aya ni tiko ni dezire, nebi naira nga rogo gani ringara te.

⁴⁵Ho ko aye ni tie ku Gariraya yo, aboro Gariraya ki di ko ku gume, i nabi agu apai dũ ko amangi Yerusarema yo rago pumbo, bambiko i andu a tigayo sa pumbo.

⁴⁶Ko ki nimo ka ye berewe ku Kana yo du Gariraya yo, yo ko asa ime ni ni imekakue. Gu ga bakindo kumba ki du yo, wiriko adu na kaza Kaparanauma yo.

⁴⁷Ho ko agi he ni ya Yesu ye Yuda yo ku Gariraya yo, ko ki ndu koyo du ko ni, ki kpari fu ko ko ye ka batasa wiriko; bambiko he amaka ko amaka.

⁴⁸Yesu ki nimo ka ya fu ko, “Ka oni abi nga agu apai i aina pai ti ni na iiriwo apai ya, oni idi nga pa re wa sa te.”

⁴⁹Ga bakindo kumba ki ya fu ko, “Gbia, mo yé mbata wire nikakpi.”

⁵⁰Yesu ki ya fu ko, “Mo gá; wiro bati.” Gu kumba ki idi pa gu pai Yesu agumba fu ko re, ko ki ga.

⁵¹Wa ko andu, gako amoyambu ki gbia ko ki ya, wiriko bati.

⁵²Ko ki nimo ka sana yo ti gu saa ko atona bata ni. I ki nimo ka ya fu ko, “Kaza ago ti ko gba ti saa sa fuo bebere uru.”

⁵³Ba gude ki nimo ka ina ya ni kina gu saa re Yesu aya fu ko. “Wiro bati;” ko ki idi pa ko ni tiko, na kpuko dũ.

⁵⁴Gi nga ue gu pai i aina pai ti ni Yesu amangi berewe, ko naguari Yuda yo ki ye ku Gariraya yo.