Read zande Yoane 5 Bible Online

Yoane 5 - zande bible

Yoane 5

¹Fuo agi apai re pumbo ki du nga ga aYudo; Yesu ki ndu ku Yerusarema yo.

²Were munga du Yerusarema yo pati ngbadimo akandoro, i niya ti ni Beteseda pa aEbere yo, na gbanga ngbadimoho bisue.

³Yo rimbasa aboro apiki ni nga agu yo nadu na kaza, airavurari, na gbarĩgbarĩ aboro, na airauguda. [I ki nisungu tipa sungburasungbura ime.

⁴Bambiko maraika anizorõ ku munga yo ni gu rago, ki niwo ti ime: fuo wo ti ime, gu ni nanizorõ tie koyo mbata, ni anihu ahu be gu kaza nanizi ni.]

⁵Gu kumba ki du yo, garãko adu na gako kaza 38.

⁶Ho Yesu abi ko ni ko pi, ki ini ya ko naima ku ho gbe, ko ki ya fu ko, “Mo nakpi nyemu ka bata?”

⁷Gu kumba nakaza ko ki karaga ha fu ko ki ya, “Gbia, boro ti re ka moi re ku munga yo ho ime nasungbura ni te, mi nita ye aye kura boro ki ima zorã mbata fere.”

⁸Yesu ki ya fu ko, “Mo gúari, ki di ga ira, ki nita.”

⁹Kumba ki bati abata ni ba sa, ki di gako ira ki nita.

¹⁰Were ni gu rago re rago sabiti nadu. Si du aYudo aya ti ni fu gu ko i abatasi ko, “Rago sabiti du, ru nga dia mo ga ira te.”

¹¹Ko ki karaga ha fu yo ki ya, “Gu ko nibatasi re, ko niya fere, ‘Mo dí ga ira, ki nita.’ ”

¹²I ki sana ko, “Gini kumba niya foro, ‘Mo dí ga ira, ki nita’?”

¹³Gu ko i ahusi ko ko aina nga gu boro nadu te, bambiko Yesu adi tiko ku sa yo, rimbasa nadu rogo gu ba re.

¹⁴Fuo gere Yesu ki bi ko rogo yekaru yo, ki ya fu ko, “Mo ngére, mo hu! Ka mo mángi nga gbegberẽpai berewe ya, gu ka manga ro gberẽ agberã susi gere.”

¹⁵Kumba ki ndu, ki gumba ha fu aYudo ya Yesu du nabatasi ko.

¹⁶AYudo ki nimo ka rungosi Yesu, bambiko ko amangi agi apai re rago sabiti.

¹⁷Yesu ki karaga ha fu yo ki ya, “Buba namanga sunge amanga kindi a wa du rago re, mi nimangi sunge a.”

¹⁸Si du aYudo amo ti ni ka kpi nyemu imo ko bakere ti gu nadu mbata, bambiko ko agu nga kina auru rago sabiti sa te, ko aya a Mbori nga Bako, ko ringbisi tiko na Mbori.

¹⁹Yesu ki nimo ka karaga ha fu yo ki ya, “Mi nagumba ha fu roni ni rengo, ni rengo, ka Wiri mangi nga pai ni tiko wa sa te, kina gu pai ko abi Mbori nga Ba nimangi he. Bambiko agu apai ko amanga, si Wiriko amanga a wo.

²⁰Bambiko Ba nakpi nyemu Wiriko akpi, ki niyugu agu apai fu ko dũ ko amanga ni tiko. Ko ayugo bakere apai ayugo fu ko ki susi gere, si iriwo ti roni.

²¹Bambiko wa Ba nazingisa kangba aboro nifu unga fu yo, kina wo Wiriko afu unga a fu agu yo wa ko akpi nyemu he.

²²Bambiko Ba asapa nga ngbanga boro wa sa te, ko fu pa sapangbanga dunduko fu Wiriko;

²³aboro irisi Wiriko airisa dũ, wa kina gu i nairisa Mbori nga Ba. Gu ni airisa nga Wiriko ya ni airisa nga Bako nakedi ko te.

²⁴Mi nagumba ha fu roni, ni rengo, ni rengo, gu ni ka gi gi pai, ki idi pa gu ko nakedi re, nyenye unga du adu be ni, ni ye nga sa sapangbanga te, ni kuru akura kpio yo ku rogo unga.

²⁵“Mi nagumba ha fu roni, ni rengo, ni rengo, ragoho nada, si awere, ho kangba aboro ka gia fugo Wiri Mbori ni; agu yo ka gi he i du adu ni ungayo.

²⁶Bambiko wa du unga ti Mbori nga Ba ni tiko, kina wo ko afu he fu Wiriko a unga du ti ko ni tiko.

²⁷Ko aasia pa sapangbanga fu ko, bambiko Wiri boro nga ko.

²⁸Ka gi iriwo nga ti roni re ya, bambiko ragoho nada, ho agu yo ka gia fugoko ni dunduko du rogo amurã yo,

²⁹ki kuru; agu yo nanamanga wenepai sa gu zingabekpio nga ga unga; agu yo nanamanga gbegberẽpai, sa gu zingabekpio nga ga sapangbanga.

³⁰“Ka mi mangi nga pai ni tire te; mi nasapa ngbanga, wa mi agia ha; ru gi sapangbanga aru; bambiko mi agbata nga gu pai mi akpi nyemu he te, kina gu pai gu ko akpi nyemu he nakedi re.

³¹Ka mi du ni dezirere ni tire; gi dezire du nga ni rengo te.

³²Kura boro kina ho nga dezirere; mi ini ya gu dezire ko nagumba tipa re si du ni rengo.

³³Oni akedi sunge koyo du Yoane ni, ko ki du ni dezire rengo.

³⁴Ono mi adia nga ga boro dezire te. Mi nagumba agi apai re, oni bati.

³⁵Ko nangia gu we nakii ki nihasi rago. Oni akpi nyemu rago ngba ti roni ngbutuko rogo imako.

³⁶Ono gu dezire du be re si susi ga Yoane; bambiko agu apai fu Buba fere mi nyasi he, kina agu apai mi amanga, si nga dezirere, ya Buba kedi re.

³⁷Buba nakedi re, ko nangia dezirere. Oni agia nga fugoko ni gu rago wa sa te, oni abi nga kpiako a te.

³⁸Gako pai anye nga kpotoroni yo te, bambiko gu ko ko akedi ko, oni aida nga pa ko te.

³⁹Oni nawisiga Ziazia Kekeapai, bambiko oni naberã ha ya nyenye unga rogo yo; agu apai re si nga dezirere.

⁴⁰Oni akpi nga nyemu ye kono du mi ni ka du ni ungaroni te.

⁴¹Mi adia nga taarimo be aboro te.

⁴²Ono mi ini roni, ya nyemu Mbori kpotoroni yo te.

⁴³Mi ye ni rimo Buba, oni adia nga re ku gume te; ka kura boro ye ni rimoni ni tini, ni ka oni di ni ku gume.

⁴⁴Ka oni wiri pa ida pa re wãi, agu roni di irisa ku dagba roni, oni agbata nga gu irisa naye kina yo du bangisa Mbori ni te?

⁴⁵Ka oni bérẽ nga ha ya mi akita ngbanga roni fu Buba ya. Gu ni kina ho nakita ngbanga roni, nga Mose, ko du bangironi koyo du ko ni.

⁴⁶Bambiko si ngia oni aidi pa Mose, oni idi pa re; bambiko ko ake pa re.

⁴⁷Ono ka oni aida nga pa gako kekeapai ya, oni wiri pa ida pa gimi apai wãi?”