Read zande Yoane 7 Bible Online

Yoane 7 - zande bible

Yoane 7

¹Fuo agi apai re Yesu ki nita Gariraya yo; bambiko ko akpi nga nyemu ta Yuda yo te, bambiko aYudo agbata ko ka imo ko.

²Were ga aYudo pumbo, nga gu pumbo nga ga abasura, si ambeda.

³Awirinako ki nimo ka ya fu ko, “Mo gúari erẽ ki ndu ku Yuda yo, gamo abawiriki bi gu gamo apai mo amanga ha tigayo.

⁴Bambiko a nga boro sa namanga pai ni gbuko, ni kpi nyemu i ini ni gbayaga te. Si ngia mo namanga agi apai re, mo yúgu tiro fu aboro zegino.”

⁵Bambiko awirinako aida nga pa ko ate.

⁶Yesu ki nimo ka ya fu yo, “Ragore ata da nga te; ono ragoroni nada a waragoagira.

⁷Ka aboro sogo nga roni zegino te; mi i asoga re, bambiko mi nga dezire yo; ya gayo apai nga gbegberẽ pai.

⁸Oni ndú sa pumbo; mi ata ndu nga sa gi pumbo te re; bambiko ragore ata da nga te.”

⁹Ko ki nye kina Gariraya yo, ko nagumba agi apai fu yo re.

¹⁰Ono ho awirinako andu ni sa pumbo, ko ki ndu a tigako tie, gbayaga te, si adu wa si ni gbuko.

¹¹AYudo ki nimo ka gbata ko kporo pumbo yo, ki ya, “Ko wari?”

¹²I ki nigumba rimoko dagba yo bakere. Agu yo ki ya wẽ, “Wene kumba nga ko”; akura yo ki ya wẽ, “Wo te, ko naingisa rimbasa aingisa.”

¹³Were a nga boro sa nagumba pa ko gbayaga be gunde aYudo te.

¹⁴Ho pumbo ada ni bangbanda Yesu ki ndu ku rogo yekaru yo, ki yugu pai.

¹⁵Si ki nimo ka iriwo airiwo ti aYudo, i ki niya, “Gi kumba re ko awiri pa ina pa apai wãi, wa ko awirika nga pai ya?”

¹⁶Yesukinimo ka karaga ha fu yo, ki ya, “Gi yugopai nga gimi te, ono si nga ga gu ko nakedi re.

¹⁷Ka boro kpi nyemu ka amanga wa Mbori akpi nyemu he, ni aina pa yugopai, watadu si naye yo du Mbori ni, na mi nagumba ha ni tire.

¹⁸Gu ni ka gumba pai ni tini ni nakpi nyemu gani taarimo; ono gu ni ka kpi nyemu ga gu ko taarimo nakedi ni, ni du ni irarengo, irairapai ti ni te.

¹⁹Ati Mose afu rugute fu roni, a nga gu ni sa dagba roni yo namanga sangba rugute te? Tipagine oni agbata re ti ni ka imo re?”

²⁰Rimbasa ki karaga ha ki ya, “Daimona ti ro! Da nagbata ro ka imo ro?”

²¹Yesu ki karaga ha fu yo ki ya, “Mi amangi pai sa, si ki iriwo airiwo ti roni dũ.

²²Mbiko gere Mose afu yeratise fu roni bambiko si aenga nga ti Mose te, ti kina aba; oni nayera boro rago sabiti.

²³Ka i yere boro rago sabiti, ka ni agu nga auru ga Mose rugute ya; oni zingi fere, bambiko mi abatasi kumba rago sabiti?

²⁴Ka oni sápu nga ngbanga ni agba ha ya, oni sápu ngbanga ni ruru ngbanga.”

²⁵Agu yo ki nimo ka ya dagba yo nga aboro Yerusarema “A nga ko du re nga gu ko i agbata ko ka imo ko te?

²⁶Oni ngere, ko nafura afura gbayaga, ka i agumba nga pai fu ko wa sa ya. Azogokporo ini he ni rengo ya Kristo nga gi kumba re?

²⁷Ono ani ini ho gi kumba aye ni re; ono ho Kristo ka ye ni, a nga boro sa nikaina ho ko aye ni te.”

²⁸Yesu ki nimo ka paa ku ari rogo yekaru yo, wa ko ayugo pai ki niya, “Oni ini re, ki ini ho mi aye ni a; mi aye nga ni tire te, gu ko nakedi re ko nga ndikidi Mbori, gu ko oni aina nga ko ya.

²⁹Mi ini ko; bambiko mi du yo du ko ni, ko nakedi re.”

³⁰I ki nikpi nyemu ka zia ko; ono a nga boro sa namoi beni ti ko te, bambiko ragoko ada nga ho te.

³¹Ono agu yo aidi pa ko ni dungu yo dagba rimbasa yo; i ki ya, “Ho Kristo ka ye ni, ko amanga agu apai i aina pai ti ni si ki susi gu mangi gi kumba re?”

³²AFarusi ki gi pa rimbasa nigumba rimoko tipa agi apai re; abairamotumo na aFarusi i ki kedi abaziaboro i zi ko.

³³Yesu ki nimo ka ya, “Ani naima na oni ngbutuko, mi ki ndu koyo du gu ko ni nakedi re.

³⁴Oni agbáta re, ka oni abí nga re ya; ho du mi ni, ka oni ye nga ku ho te.”

³⁵AYudo ki nimo ka ya dagba yo, “Wari gi kumba ka ndu ku ho ni re ka ani abi nga ko ya? Ko andú koyo du Gbandakagbandaka aboro ni dagba aGiriki ki yugu pai fu aGiriki?

³⁶Gini pai nga gi ko agumba re ya wẽ, ‘Oni agbáta re ka oni abí nga re ya’; ‘Ho du mi ni, ka oni ye nga ku ho te’?”

³⁷Were ni gu yangara rame, nga bakere rago pumbo, Yesu ki ru ki nipoi ku ari, niya, “Si ngia gomoro ime namanga boro, ni ye kono du mi ni, ki mbiri he.

³⁸Gu ni ka idi pa re, wa Ziazia Kekeapai aya, ‘Di unga ime afuka afuka vuni yo’.”

³⁹Ko agumba gere tipa gu Toro, agu yo ka idi pa ko ka dia ko, bambiko i afu nga Toro ho te; bambiko Yesu adu nga ho ni taasitaasi ko te.

⁴⁰Ho agu yo agi he ni dagba rimbasa yo, i ki nimo ka ya, “Ko nga gu nebi re ni rengo.”

⁴¹Akura yo ki ya, “Kristo du.” Ono agu yo ki ya “E! Kristo ye Gariraya yo?

⁴²Ziazia Kekeapai aya nga Kristo aye ni ngbatunga Dawidi. Betereme yo rogo gu kporo yo Dawidi adu ni te?”

⁴³Si du rimbasa akparaka ti ni bambiko ko.

⁴⁴Agu yo ki nikpi nyemu zia ko; ono a nga boro sa namoi beni ti ko te.

⁴⁵Abaziaboro ki nimo ka ye koyo du abairamotumo ni na aFarusi; i ki ya fu yo. “Tipagine oni aye nga ti ni na ko ya?”

⁴⁶Abaziaboro ki karaga ha ki ya, “Boro agumba nga pai mbata wo te.”

⁴⁷AFarusi ki nimo ka karaga ha fu yo ki ya, “I ingisi roni a?

⁴⁸Abazogo aboro idi pa ko na aFarusi?

⁴⁹Ono gi rimbasa re nga agu yo aina nga rugute ya i tiwa yo.”

⁵⁰Nikodemo ki ya fu yo nga gu ko naye koyo du ko ni mbata, nidu dagba yo,

⁵¹“Gaani rugute nisapu ngbanga boro, mbata si nikagia kina sangbani ki ini gu pai mangi ni?”

⁵²I ki karaga ha fu ko ki ya, “Boro Gariraya nga mo a tigamo? Mo gbáta ha, ki bi he ya nebi aenga nga Gariraya yo te.” [

⁵³Aboro ki ndu andu ku kpuyo yo dunduko.