Read zande Yoane 8 Bible Online

Yoane 8 - zande bible

Yoane 8

¹Ono Yesu ki ndu ku ri gu bagangara yo nga ga Aeraya.

²Kina ngbatutu ko ki ye berewe ku yekaru yo, aboro ki ye koyo du ko ni dunduko; ko ki sungu, ki niyugu pai fu yo.

³Abakeapai ki ye na de na aFarusi, i azi ri na kumba; ho i amoi ri bangbanda ni,

⁴i ki ya fu ko, “Bayugupai, gi de re zi yo ri na kumba, ri nipi na ko.

⁵Were Mose arugu rani rogo rugute yo ya ngbatunga gu boro re i niimi ni ni ambia. Mo naya wãi tipa ri tie?”

⁶I agumba gere, ni asada ko, i kiti ngbanga ko akita. Ono Yesu ki nugadi, ki nike sende ni wirinzagako.

⁷Ho i adarã ko ni kindi, ko ki tumba tiko ku ari, ki ya fu yo, “Gu ni adu nga ingapai ti ni dagba roni yo ya, ni ba mbia koyo du ri ni mbata.”

⁸Ko ki nugadi berewe, ki nike sende ni wirinzagako.

⁹I, ho i agi he ni, i ki nikuru ni ba sa sa, ki tona ha ti kina garãyo wa i aenge, kuti yangara yo. Yesu ki du ni sa ko, na de kina ho ri adu ni bangbanda.

¹⁰Yesu ki tumba tiko ku ari, ki ya fu ri, “Na, I wari? A nga boro sa kiti ngbanga ro te?”

¹¹Ri ki ya, “A nga boro te, Gbia.” Yesu ki ya, “Mi asapa nga ngbanga ro a te. Mo gá; ka mo mángi nga gbegberẽpai berewe ya.”]

¹²Yesu ki nimo ka gumba pai fu yo berewe, ki ya, “Mi nga gu imarago nga ga zegino. Gu ni ka apeka re ni ta nga bitimo te, ni du adu na gu imarago nga ga unga.”

¹³AFarusi ki nimo ka ya fu ko, “Mo nga dezirero ni tiro; rengo nga ga dezire te.”

¹⁴Yesu ki karaga ha fu yo ki ya, “Ka mi vura du ni dezirere, gi dezire du adu ni rengo; bambiko mi ini ho mi aye ni, na ho mi andu ku ho ni; ono oni aina nga ho mi aye ni, na ho mi andu ku ho ni te.

¹⁵Oni nasapa ngbanga ni sangba borose; mi asapa nga ngbanga boro wa sa te.

¹⁶Ii, ka mi sapu ngbanga, gi sapangbanga du adu ni rengo; bambiko mi ni sa re te, ani na kina Buba nakedi re.

¹⁷Ii, si ni keke he rogo gaoni rugute yo, ya du aboro ue ni dezire nga rengo.

¹⁸Mi nga dezirere ni tire, na Ba nakedi re nga dezirere.”

¹⁹I ki nimo ka ya fu ko, “Bamo wari?” Yesu ki karaga ha ki ya, “Oni aina nga rani na Buba te, ka oni ini re oni ini Buba aina a.”

²⁰Ko agumba agi apai re rogo gu ba i anafu marã ku ho ni, wa ko ayugo pai yekaru yo. A nga boro sa nazi ko te; bambiko ragoko ada nga ho te.

²¹Yesu ki nimo ka ya fu yo berewe, “Mi namerã, oni agbáta re agbata, ki kpiki akpika na gaoni gbegberẽpai. Ho mi andú ku ho ni, ka oni ye nga ku ho te.”

²²AYudo ki nimo ka ya, “Ko aímo tiko aimo, wa ya ko, ‘Ho mi andú ku ho ni ka oni ye nga ku ho te’?”

²³Ko ki ya fu yo, “Oni naenge sende no; mi naenge ari yo; oni nga aboro gi zegino re; boro gi zegino re nga mi te.

²⁴Si du ya mi ti ni fu roni wẽ, oni akpíka akpika na gaoni gbegberẽapai; bambiko kina gu ka oni idi pa re ya mi nga ko, si ka oni akpika nga ti ni na gaoni gbegberẽapai ya.”

²⁵I ki nimo ka ya fu ko, “Da nga mo?” Yesu ki ya fu yo, “Kina gu pai mi aima diga nigumba ha fu roni a.

²⁶Dungu apai du ngbare mi ka gumba ka sapa ngbanga roni. Were gu ko nakedi re nga irarengo; agu apai mi agi ngbako, si mí agumba fu aboro zegino.”

²⁷I aruga nga tiyo na ni ya ko nagumba ha fu yo tipa Mbori nga Ba te.

²⁸Yesu ki nimo ka ya, “Ho oni ka tumba Wiri boro ni ku ari, oni aína aina tie ya mi nga ko, mi amanga nga pai ni tire a wa sa te, kina gu Buba ayugu fere, si mi agumba.

²⁹Gu ko nakedi re ani na ko; ko ahe nga re ni sa re te; bambiko mi namanga kina agu apai ngba ti ko waragoagira.”

³⁰Wa ko agumba agi apai re, dungu aboro ki idi pa ko.

³¹Yesu ki nimo ka ya fu agu aYudo naidi pa ko, “Ka oni nye na gi pai, oni du adu tie ni gimi abawiriki ni rengo;

³²oni aína rengo aina, ki ra ni rironi be rengo.”

³³I ki karaga ha fu ko ki ya, “Ani nga ngbatunga Abarayama, ani ara nga mbata na gorani fu boro wa sa te; win mo pa ya wãi, ‘Oni ará ni rironi’?”

³⁴Yesu ki karaga ha fu yo ki ya, “Mi nagumba ha fu roni, ni rengo, ni rengo, gu ni ka manga gbegberẽpai ni nga ga gbegberẽpai kanga.

³⁵Kanga nanye nga dimo yo kindi te; kina wiri irakporo nye yo kindi.

³⁶Si du ka oni ra ni rironi ti ni mbiko Wiri, oni ki ra ara ni rironi ni rengo.

³⁷Mi ini ya oni nga ngbatunga Abarayama, ono oni nakpi nyemu ka imo re, bambiko ba gi pai kpotoroni yo te.

³⁸Mi nagumba kina agu apai bi ani na Buba. Oni namanga kina agu apai a oni agi ngba baroni.”

³⁹I ki karaga ha fu ko ki ya, “Barani nga Abarayama.” Yesu ki ya fu yo, “Ka si ningia ngbatunga Abarayama nga oni, ka oni namanga agu apai nga ga Abarayama.

⁴⁰Ono oni nakpi nyemu ka imo re aimo awere, nga gu boro gumba gu rengo fu roni, mi agi ngba Mbori; Abarayama amanga nga gi te re.

⁴¹Oni namanga agu apai nga ga baroni.” I ki ya fu ko, “I avunga nga rani ni awiri tii nvuo te; barani sa nga kina Mbori.”

⁴²Yesu ki ya fu yo, “Ka si ningia Baroni nga Mbori, ka oni nakpi nyemu re; bambiko mi akuru ki ye yo du Mbori ni. Bambiko mi aye nga ni tire te, kina ko nakedi re.

⁴³Tipagine oni aruga nga tironi ti ni na fugore ya? Si nga bambiko ka oni gi nga gi pai te.

⁴⁴Awiri Bakitingbanga nga oni nga baroni, gu nyemuhe nga ga baroni si oni akpi nyemu manga ha. Ko adu ni baimiaboro ho rago ainge ni, ko anye nga na rengo te, bambiko rengo adu nga ti ko te. Ho ko nagumba zire ni, ko nagumba ha agumba ni tiko; bambiko irazire nga ko, nga baha.

⁴⁵Ono bambiko mi nigumba rengo, oni aida nga pa re te.

⁴⁶Da du nga dagba roni yo yugu go gbegberẽpai kuti re? Wa du rengo mi agumba, tipagine oni aida nga pa re ti ni ya?

⁴⁷Gu ni nga ga Mbori ni ni nagia ga Mbori apai, bambiko ga Mbori aboro nga oni te, si du oni agia nga ha ti ni ya.”

⁴⁸AYudo ki karaga ha fu ko ki ya, “Ani aya nga nzunzu boro Somorona nga mo, du na daimona te?”

⁴⁹Yesu ki karaga ha ki ya, “Daimona ti re te; mi nairisa Buba airisa, oni airisa nga re te.

⁵⁰Ono mi agbata nga gi taarimo te; gu ni kina ho nagbata ha nasapa ngbanga.

⁵¹Mi nagumba ha fu roni, ni rengo, ni rengo, ka boro ka kuti gi pai, ni bi nga kpio wa sa te.”

⁵²AYudo ki ya fu ko, “Ani ini aina awere ya daimona ti ro. Abarayama akpiki na anebi, ya mo, ‘Ka boro ka kuti gi pai, ni bi nga kpio wa sa te.’

⁵³Mo nga bahe ti barani nga Abarayama nakpi? Na anebi nakpiki! Sa mo tiro ni da?”

⁵⁴Yesu ki karaga ha ki ya, “Ka mi taasi rimore ni tire, gi taarimo du nga ni he te. Buba du nataasa rimore; gu ko ya oni, ko nga gaoni Mbori.

⁵⁵Oni aina nga ko te; mi ini ko; ka mi ya, mi aina nga ko te, mi du wa kina roni ni irazire; ono mi ini ko, ki ka kuti gako pai.

⁵⁶Rago angba angba ti baroni nga Abarayama ko bi ragore; ko ki bi he, rago ki ningba angba ti ko.”

⁵⁷AYudo ki nimo ka ya fu ko, “Wa garãro ata du nga 50 ya, mo bi Abarayama?”

⁵⁸Yesu ki ya fu yo, “Mi nagumba ha fu roni, ni rengo, ni rengo, mbata Abarayama nikadu mi adu kina ho.”

⁵⁹I ki nimo ka roga ambia ka zumuda ko na ni; ono Yesu ki birikpo, ki kuru yekaru yo.