Read zande Amokedi 1 Bible Online

Amokedi 1 - zande bible

Amokedi 1

¹Ako Teofiro, bambata geda pai mi ake tipa agu apai dunduko Yesu atona manga niyugu pa ha,

²dati kina rago dia ko ku ari yo, fuo ruga ko agu amokedi sangba Ziazia Toro yo, ko asia yo.

³Ko ayugu tiko fu yo a ni ungako fuo gako hipai nimangi dungu apai i ini ko ti ni, ki yugu tiko ayugo fu yo rame ki du 40 ki nigumba pa ga Mbori ngbi.

⁴Ko ki nirugu yo ni gu rago i atiria na ko ya ka i guari nga Yerusarema yo ya, i sungudi gu ũmokido nga ga Mbori nga Ba, nga gu ko aya fu yo, “oni agi paha ngbare,

⁵bambiko Yoane anabapatizi aboro ni ime ni rengo; ono oni araka ngbutuko i ki bapatizi roni ni Ziazia Toro.”

⁶Si du i asana ko ti ni ho i atiria ni, ki ya, “Gbia, mo agása ga aYisaraere ngbi fu yo wa du rago re?”

⁷Ko ki ya fu yo, “Sa gaoni naina rago ahe na gu regbo ahe Mbori nga Ba amoi sa kina gako tandu?

⁸Oni adia tandu ho Ziazia Toro ka ye ni ku ri roni. Oni adu ni adezirere, Yerusarema yo na Yuda yo a Somorona yo, na digida sende yo.”

⁹Ho ko agumba agi apai ni re, wa i angera ko ki ga ku ari yo, mai ki di ko ti bangiriyo.

¹⁰Wa i angera ku ngbangbaturũ yo kindi wa ko andu, akumba ki ru pati yo ue na pusi remu ti kpotoyo.

¹¹I ki ya; “Ako aboro Gariraya tipagine ru oni ti ni ka angera ku ngbangbaturũ yo? Gi Yesu re di yo ko adia be roni ku ngbangbaturũ yo ko ayé aye a wa oni abi ko ko nindu ku ngbangbaturũ yo re.”

¹²I ki karaga tiyo ku Yerusarema yo ri bagangara Aeraya, nambedi ambeda ku Yerusarema yo, ni ba nunguro rago sabiti.

¹³Ho i arimi ni i ki ndu ku rogo gu vuru bambu nadu ku ari, yo i araka ni; aPetero nadu na Yoane na Yakoba na Andarea, Firipo na Toma, Barutoromayo na Matayo, Yakoba nangia wiri Arafayo, a Simona Zerote, na Yuda nangia wiri Yakoba.

¹⁴Agi aboro re i animongo nikpari kina ku bani sa kindi, na agu ade, na Maria nga na Yesu na awirinako.

¹⁵Petero aru ku ari ni gu rago re dagba abawiriki rimbasa yo adu ho wa 120. Ko ki ya,

¹⁶“Awirinami, da Ziazia Kekeapai ti rengo nangba, gu pai Ziazia Toro agumba mbata ku ngba Dawidi tipa Yuda, gu ko nangbe mbata yo fu agu aboro nazi Yesu.

¹⁷Bambiko iagedi ko ku dagba rani, ko ki di gako sunge dagba gi mangapase re.”

¹⁸(Were gi kumba re nangia Yuda angbe ati ni mosoro gako ingapai; ko ki ya ti sande, vuko ki sari, reko ki gbadi agbada dunduko.

¹⁹Agu aboro naaima ku Yerusarema yo dunduko i ki ini he aina wa i aza ka yamba rimoho payo yo nga Akeradama, si wa ka i ya, Ati kure.)

²⁰“Bambiko si ni keke ho rogo kitabu Tambuahe yo ya,― ‘Kpuko dú ni bate, ka boro ima nga ku rogo wa sa ya’; ki ya,― ‘Kura boro dí gako sunge.’

²¹Were, dagba agu akumba nanasunga na ani ni gu rago gu Gbia ata dagba rani nga Yesu,

²²ho ga Yoane bapatiza aenge ni, dati kina gu rago i adi ko ku ari yo be rani, dagba agi yo re gu ni nikadu dagba yo sa na ani ni dezire zinga ko be kpio.”

²³I ki kpara agu yo ue, nga aYosefa i aniya ti ko Barusaba, kura rimoko ki ngia Yuseto, na Matia.

²⁴I ki kpari ki ya, “Ako Gbia, mo nga gu ko ini kpoto aboro yo dunduko, mo yúgu gu ni ka mo kuti ni dagba agi yo du ue re,

²⁵ni di ba dagba gi mangapase re na dagba amokedi, gu ba Yuda ati ti ni ka ndu ku bako yo.”

²⁶I ki ba ake tipa yo, ake ki yugu Matia; i ki gedi ko ku dagba agu amokedi yo nanidu bawe na sa.