Read zande Amokedi 10 Bible Online

Amokedi 10 - zande bible

Amokedi 10

¹Were kumba adu Kaisaria yo rimoko angia Korunerio, barukuri aboro 100 dagba gu rika vura i aniya ti ni Itaria,

²ni ruru kumba, ko anagunde agunde ti Mbori na kpuko du, ko anagama ahe agama fu aboro ni rengo, ki nikpari fu Mbori dedede.

³Ko ki bi ga Mbori maraika abi rogo yuguyugupai gbayaga ko niya fu ko, “Korunerio.” Si ki dũ wa ka saa biata nga ga nyemu nadu.

⁴Ko ki ta ngana ko, nigunde agunde, niya, “Gine du, Gbia?” Ko ki ya fu ko, “Gamo akpe na gamo agamahe si da ari yo barangba Mbori i nitingidi he.

⁵Awere mo kédi akumba ku Yapo yo, i ye na gu kumba nga Simona, du kura rimoko nga Petero;

⁶ko ku Simona yo nga barungburasi kpoto, du kpuko pavuru baime.”

⁷Ho gu maraika aga ni nagumba pai fu ko, Korunerio ki yambu gako amoyambu ue na ruru banzengere dagba agu yo yo nanamanga gako pai dedede;

⁸ho ko apeke agi apai ni re dunduko fu yo, ko ki kedi yo ku Yapo yo.

⁹Were rago ki ya giri wa i andu gayo nunguro, ki nimbedi ku bakporo yo, Petero abiti ku ri bambu yo ka kpara, si ki du wa ka bebere uru du.

¹⁰Gomoro ki nimangi ko amanga, ko ki nikpi nyamu ri he; wa i amanga ha ko ki rari musumo.

¹¹Ko ki bi ngbangbaturũ si naza, ko ki bi he si niye ari yo, wa kina bakere remu i nizogo ho ti pangbaha biama ku sende;

¹²yo ngbatunga agu anya adu ni nadu na ndura ni ba biama, na agbiro sende a azire ari, dunduko.

¹³Fugo ki poi koyo du ko ni, ya, “Mo gúari Petero; mo imi agu ra ka ri ra.”

¹⁴Ono Petero ki ya, “Wo te Gbia, bambiko mi ari nga nyakorokpa na birikobiriko he mbata te.”

¹⁵Fugo ki poi koyo du ko ni berewe ni ue he, ya, “Gu girisi Mbori ka mo sá nga ha ni nyakorokpa ya.”

¹⁶I amangi he bara biata; i ki di gu he adia ku ngbangbaturũ yo re ni ba sa.

¹⁷Were wa Petero abaka bangiriko ti gi yuguyugupai ko abi re ya gini pai dũ ti ni, mo ngére, agu akumba Korunerio akedi yo, i asana he tipa ga Simona bambu ki ru ngbadimo ho,

¹⁸ki yambu he ki sana he ya Simona du ho, du kura rimoko nga Petero.

¹⁹Wa Petero aberẽ pa yuguyugupai Ziazia Toro ki ya fu ko, “Mo ngére akumba biata nagbata ro.

²⁰Mo gúari ki zorõ ki ndu na yo, ka si du nga bangiro ya; bambiko mi akedi yo.”

²¹Petero ki zorõ koyo du agu akumba ni re, ki ya, “Oni ngére, mi oni agbata re; gini pai oni aye ti ni?”

²²I ki ya, “Korunerio, nga barukuri aboro 100, nga ruru kumba, nagunde ti Mbori, rika a Yudo nataka pande ko ataka na wene pai, ziazia maraika arugu ko ko kedi sunge fuo ro, mo ye ku kpuko yo, ko gi pai ngbaro.”

²³Ko ki yambu yo ku dimo yo tie, ki fu ba fu yo. Rago ki ya giri ko ki guari ki ndu na yo, agu yo ki ndu na ko dagba awirina Yapo yo.

²⁴Rago ki ya giri i ki rimi ku Kaisaria yo, Korunerio asunguda kina yo, ko nadungura agumeko na wene abadiako.

²⁵Were ho Petero arimi ni Korunerio ki gbia ko ki ti sande pati nduko ki irisi ko.

²⁶Ono Petero ki ta tumba ko, niya, “Mo rú; mi tigimi kina boro nga mi a.”

²⁷Wa i afura na ko, ko ki rimi ki bi dungu aboro natiria;

²⁸ko ki ya fu yo, “Oni ini tigaoni ya ru nga kpamiati kuti gu boro nga kura rika aboro na ndu koyo du ni ni fu gu boro nga Yudo te; ono Mbori ayugu gu pai fere nga ka mi ya nga ti boro wa sa nyakorokpa nga ni nga birikobiriko he ya.

²⁹Si du mi aye ti ni a ka pai adu nga ya ho i akedi sunge fuo re ni. Mi nasana he ti gu pai nga ha, mo akedi sunge fuo re sa gine?”

³⁰Korunerio ki ya, “Mbata rame fuo ho biama, dati kina gi saa re, mi akpari ti gu saa kpe nga biata nga ga nyemu. Mo ngére kumba ki ru barangba re na imaima remu,

³¹ni ki ya, ‘Korunerio, i agi ga kpe agia, i natingida pa gamo agamahe atingida ku bangiri Mbori.

³²Mo kédi sunge mbiko gere ku Yapo yo, i yambu gu Simona du kura rimoko nga Petero kono du mo ni; ko du ti gu bambu nga ga gu Simona nga barungburasi kpoto, du pavuru baime.’

³³Si du mi akedi sunge akeda ti ni fuo ro ni ba sa, mo mangi he wenengãi niye mo. Si du du ani ti ni erẽ bangiri Mbori dunduko ka gia agu apai dunduko Gbia arugu ro kuti ni.”

³⁴Petero ki tuka ngbako ki ya, “Mi ini ni rengo ya Mbori akpara nga aboro te;

³⁵ono dagba rika aboro yo dunduko gu ni nagunde ti ko, ki nimangi rurupai, kina ni ngba ti ko.

³⁶Gu pai ko akedi koyo du awiri aYisaraere ni, ko atungusi ni wene pangbanga zereda rogo Yesu Kristo yo nga Gbia aboro na ahe dú.

³⁷Oni ini gu pai aina ni tironi, nga gu i atungusi atungusa rogo Yuda dunduko, tona ti kina Gariraya, fuo pa gu bapatiza Yoane atungusi,

³⁸wa Mbori ambedi Yesu nga boro Nazareta ni Ziazia Toro na tandu; ko nanita ndu kirikiri nimangi wenepai, nihusi agu aboro dunduko bakitingbanga amangi yo; bambiko Mbori adu na ko.

³⁹Ani nga adezire agu apai ko anamanga ringara aYudo yo na Yerusarema yo, ko i aimi ko a niasa ko ti ngua.

⁴⁰Ko rame adu ue Mbori ki zingisi ko, ki yugu ko ayugo gbayaga,

⁴¹fu aboro dunduko te, fu kina agu adezire Mbori asia yo mbata, fu kina rani, nga agu aboro nari riahe ki mbiri he na ko fuo zinga ko be kpio.

⁴²Ko ki ya fu rani ani nitungusi he fu aboro, ki nigumba gu pai nga, ko du re nga gu ko ya Mbori ko du ni basapungbanga unga aboro na kangba aboro.

⁴³Ko anebi aya ni adezire, gu ni ka idi pa ko i gbandaka gani ingaapai agbandaka ni rimoko.”

⁴⁴Wa Petero agumba agi apai re, Ziazia Toro ki zorõ ku ri agu yo dunduko naagia ha.

⁴⁵Agu aYudo naidi pa ko si ki niiriwo airiwo ti yo a wa i aye na Petero, bambiko i afu gu gamahe nga Ziazia Toro fu aGendiria a.

⁴⁶Bambiko i agi payo i nifura afura ni ngbatunga afugo, i nitaasi rimo Mbori. Petero ki karaga ha, ki ya,

⁴⁷“Ka boro ka na ime ya i abapatizi nga agi yo fu yo Ziazia Toro fu yo wa kina rani te?”

⁴⁸Ko ki ya i bapatizi yo ni rimo Yesu Kristo. I ki kpari fu ko ya ko ima na yo ngbutuko.