Read zande Amokedi 11 Bible Online

Amokedi 11 - zande bible

Amokedi 11

¹Were agu amokedi nadu Yuda yo na awirina i ki gi he ya aGendiria adi ga Mbori pai a.

²Ho Petero aye ni ku Yerusarema yo agu aYudo naidi pase ki saki gu pai na ko,

³nga, “Tipagine mo arimi ti ni koyo du agu aboro ni i ayera nga yo ya ki ri riahe na yo.”

⁴Ono Petero ki ru pai, ki ringbisi he fu yo a wa si aenge, ki ya,

⁵“Mi adu rogo gu bakporo nga Yapo nikpari; ki bi yuguyugupai rogo musumo yo, nga, he niye ari yo, wa kina bakere remu i nizogo ho ngbangbaturũ yo ti pangbaha biama; si aye fu kina re.

⁶Ho mi adua bangire ni ti ni mi ki nibaki bangire abaka, mi ki bi agu anya sende nadu na ndura ni ba biama na anya nvuo, na agbiro a azire ari.

⁷Mi ki gi fugo a si niya fere, ‘Mo gúari Petero; mo imi agu ra ka ri ra.’

⁸Ono mi ki ya, ‘Wo te Gbia; bambiko nyakorokpa ada nga ngbare yo mbata na birikobiriko he wa sa te.’

⁹Ono fugo ki karaga ha berewe fere ni ue he ngbangbaturũ yo, ki ya, ‘Gu girisi Mbori ka mo sá nga ha ni nyakorokpa ya.’

¹⁰I amangi he bara biata, i ki gbe he agbe dunduko ku ngbangbaturũ yo berewe.

¹¹Oni ngére, akumba ki ye aye biata ni ba sa ki ru pati gu bambu ani adu tii he yo i akedi yo Kaisaria yo koyo du mi ni.

¹²Zia zia Toro ki ya fere ani ndu na yo, ka mi kpara nga boro ya. Agi awirina adu sita re ani andu andu na yo; ani ki da rum ku tii ga gu kumba bambu yo re.

¹³Ko ki gumba pa maraika fu rani wa ko abi ko niru ti gako bambu yo, ki ya, ‘Mo kédi sunge ku Yapo yo, i ye na gu Simona du kura rimoko nga Petero;

¹⁴ko nikagumba agu apai foro mo ka bata mbiko ho na kpuro dũ.’

¹⁵Wa mi aru pai ka gumba ha, Ziazia Toro ki zorõ ku ri yo, wa kina rani ho si aenge ni.

¹⁶Mi ki tingidi gu ga Gbia pai, wa ko agumba ha, ya, ‘Yoane nanabapatizi aboro ni ime ni rengo, ono i abapatizi roni ni Ziazia Toro.’

¹⁷Ka si du wa Mbori afu kina gu gamahe fu yo a ko afu fu rani, ho ani aidi pa Gbia ni Yesu Kristo, da ka ngia mi ka za Mbori?”

¹⁸Ho i agi agi apai ni re, i ki ongo aonga, ki taasi rimo Mbori, ki ya, “Mbori fu saberã sa unga fu aGendiria a tie.”

¹⁹Were agu yo nagbandaka be gu rungosi namanga tipa Setefano i ki ndu andu dati kina Poinike na Kupurio a Andiokia nitungusi pai fu kura aboro te, fu kina aYudo.

²⁰Agu yo adu dagba yo nangia aboro Kupurio na Kurene ho i ada ni Andiokia yo i ki gumba pai fu agu aYudo i abatika yo rogo kura aringara a ki nitungusi pa Gbia Yesu.

²¹Be Gbia adu adu na yo; agu aboro naidi pase ni dungu yo i ki sa tiyo fu Gbia.

²²Gayo pangbanga ki da ku tu gu kanisa yo nadu Yerusarema yo i ki kedi Barunaba ko ndu andu da Andiokia yo.

²³Ko, ho ko ada ni, ki bi ga Mbori undahe, rago ki ngba angba ti ko. Ko ki ngarasi yo angarasa dunduko, ki ya i ká kuti Gbia ni nyaka kpotoyo yo;

²⁴bambiko ruru boro nangia ko, ko ahi ahi be Ziazia Toro na idapase. I ki gedi dungu aboro fu Gbia.

²⁵Ko ki ndu ku Taruseu yo ka gbata Saura.

²⁶Ho ko abi ko ni, i ki ye na ko ku Andiokia yo. Were i ki dungura tiyo na kanisa ti kina gu garã sa, ki niyugu pai fu dungu aboro; i ayambu gu rimo abawiriki nga Akristano mbata kina Andiokia yo.

²⁷Were ni gu rago re anebi aye Yerusarema yo ku Andiokia yo.

²⁸Gu ko ki ru ku ari sa dagba yo yo rimoko angia Agabo, ko ki yugu gu pai fu yo sangba Toro yo nga bakere gberãngbi amánga amanga rogo ngbi dũ. Si ki da ti rengo ni gu rago Kuraudio azogo rago ni.

²⁹Abawiriki ki ya i nikakeda úgomoro fu agu awirina nadu Yuda yo, gu ni ki niringbisi gani na kina omeni.

³⁰I ki mangi he a, ki kedi he fu ga aYudo abaakumba ku be aBarunaba na Saura.