Read zande Amokedi 12 Bible Online

Amokedi 12 - zande bible

Amokedi 12

¹Were ni gu rago re Erode nangia bakindo ko atãi beko ka rungosi agu yo dagba kanisa.

²Ko ki imi Yakoba nangia wirina Yoane ni basape.

³Ho ko aini ni ya si nangba angba ti aYudo, ko ki niye ka zia Petero a. Gu rago re nangia rago gu kpokuta adu nga na agbooro ti ni ya.

⁴Ho ko azi ko ni, ko ki moi ko ka bambukisa yo, ki fu ko ku be agu abanzengere nadu ni ba biama bara biama, i nibanda ko; ko aya u nikakusa ko fu aboro fuo Pumbo Susiri.

⁵Si du i aka kuti Petero ti ni ku bambukisa yo. Kanisa ki nikpari akpara fu Mbori tipa ko kakaka.

⁶Ho Erode aya ni u nikakusa ko, ni gu yuru re Petero ki nira ara dagba abanzengere ue, ni vovo ko na azogbo ue; ababanda bambukisa ki nibanda ha kina ngbadimoho.

⁷Mo ngére, maraika Gbia ki ru pati ko, imahe ki hasi rago rago gu vuru bambu ahasa re; ko ki nari pavuru Petero, ki zingisi ko, ki ya. “Mo gúari ni ipo.” Gako azogbo ki tiwi beko yo.

⁸Maraika ki ya fu ko, “Mo tápa tiro, ki vodi ga rakata.” Ko ki mangi wo. Ko ki ya fu ko. “Mo úkadi tiro na ga roko, ki nipe re.”

⁹Ko ki kuru, ki nipe ko; ka ko aina nga ya rengo maraika amanga ya, ko ki ya ti gu yuguyugupai bi ko.

¹⁰Ho i asusi bambata bakisa ni na ue he i ki da ti gu kpuguru marã nadu ti ngbadimo bakporo; si ki za aza fu yo ni sa ha. I ki kuru, ki susi rogo bagene sa; maraika ki merẽ amerã pati ko ni ba sa.

¹¹Ho Petero amakia pa tiko ni, ko ki ya, “Mi ini aina tie awere ni rengo ya Gbia kedi gako maraika nibatasi re vuru be Erode na be ngera aboro aYudo.”

¹²Ho ko abaki bangiriko ni ti ni, ko ki ye ku gu Maria yo nangia na gu Yoane kura rimoko adu ho nga Marako; ho dungu aboro adungura tiyo ku ho ni, ki nikpari.

¹³Ho ko angoka kpuguru ngbadimo ni, de pangbadimo ki ye ka karaga pai koyo rimori angia Roda.

¹⁴Ho ri aini fugo Petero ni, ka ri aura nga ngbadimo ni ngbarago ya, ri ki oro kina ku dimo yo ki gumba pa Petero wa ru ko ngbadimo.

¹⁵I ki ya fu ri, “Iranzanga nga mo.” Ri ki gumba ha agumba kakaka ya wo du he. I ki ya, “Gako maraika du!”

¹⁶Petero ki ningoka ha kindi. Ho i aza ngbadimo ni i ki bi ko, si ki niiriwo airiwo ti yo.

¹⁷Ko ki za yo ni beko i ongo, ki gumba ha fu yo wa Gbia akusi ko bambukisa yo. Ko ki ya, “Oni gúmba agi apai re fu Yakoba na awirina.” Ko ki guari ki ndu ku rogo gu kura rago.

¹⁸Were rago ki ya giri, abanzengere ki nimangi amanga gbarakagbaraka gbe ya gine mangi Petero.

¹⁹Ho Erode agbata ko ni, ka ko agia nga pa Petero ya, ko ki sasana ababanda bambukisa. Si du ko aya i imi ababanda bambukisa. Ko ki guari Yuda yo ki ndu ku Kaisaria yo, ki du yo.

²⁰Were Erode aerẽ aerã fu aboro Tura na aboro Sidona ni rengo. I ki mongo ye koyo du ko ni, i ki sa Buraseto ni badiayo nangia baira ku bakindo, ki nikpari pa zereda bambiko gayo ngbi abi ahe kina mbiko ga bakindongbi.

²¹Nikinaguragoiaringbisi, Erode ki ukadi tiko ni remu bakindo, ki sungu auru mbata bakindo, ki gumba sangbako fu yo.

²²Aboro ki ningbika, niya, “Fugo gu mbori du, nga fugo boro te.”

²³Maraika Gbia ki yawa ko ayawa ni ba sa bambiko ko ahe nga taarimo fu Mbori te. Agbirẽ ki ri ko ari, ko ki fu mbisimoko.

²⁴Ono ga Mbori pai amoi pai aniaa ki nge ange.

²⁵ABarunaba na Saura i ki yega Yerusarema yo, ho i anyasi gayo mangapai ni, i adi Yoane fuo yo, kura rimoko adu nga Marako.