Read zande Amokedi 13 Bible Online

Amokedi 13 - zande bible

Amokedi 13

¹Were anebi adu Andiokia yo rogo gu kanisa nadu yo na abayugupai, nangia aBarunaba na gu Simona i aniya ti ko Nigera, na Rukio nangia boro Kurene, na Manae gu ko i ambu ti yo na Erode nangia bazogo, a Saura.

²Wa i amanga pa Gbia nigina riahe, Ziazia Toro ki ya, “Oni kpára aBarunaba fere na Saura sa gu sunge yambu mi yo sa ni.”

³Ho i agina riahe ni tie ki kpari, ki moi beyo ri yo, i ki kedi yo.

⁴Were Ziazia Toro akedi yo, si du i andu ti ni ku Sereukia yo; i ki guari yo ki ga ri ime ku Kupurio yo.

⁵Ho i adu ni Sarami yo, i ki nitungusi ga Mbori pai rogo ga aYudo abambutiria yo. Yoane adu fuo yo a ni gayo moyambu.

⁶Ho i ata ni rogo kisanga dunduko ku Papo yo, i ki bi irasoroka nangia kungba nebi, Yudo, rimoko angia Bara-Yesu;

⁷ko adu na gbiakporo, Serugio Pauro, nangia babipai. Serugio Pauro ayambu aBarunaba na Saura koyo du ko ni nikpi nyemu gia ga Mbori pai.

⁸Ono Eruma nangia irasoroka (bambiko ka i sa rimoko si du wo), ko ki niti kangu ati na yo, nikpi kina nyemu nyaga gbiakporo ti idapase.

⁹Ono Saura, i aniya ti ko Pauro, nahi be Ziazia Toro, ko ki dua bangiriko ti ko,

¹⁰ki ya, “Ako mo gbérẽ be biriki dũ na gbegberẽpai dunduko, nga wiri bakitingbanga, nga vura ruruapai dunduko, mo ambu nga irasi gu agene nga ga Gbia te?

¹¹Mo ngére, awere be Gbia ti ro, mo nikadu adu ni iravurari, ka mo abi nga uru ya dati kina ragoho.” Ndura ki ye sa ko na bitimo ni ba sa; ko ki nitataraga nigbata aboro i zi beko mbata vo fu ko.

¹²Gbiakporo, ho ko abi gu pai ni namangi re ko ki idi pase tie, niiriwo gu yugopai nga ga Gbia ti ko.

¹³Were aPauro ki guari Papo yo kurungba yo na gako aboro, ki ye ku Peruga vo ku Pamburia yo. Yoane ki guari pati yo ki karaga tiko ku Yerusarema yo.

¹⁴I ki susi Peruga yo tigayo, ki ye ku Andiokia yo ku Pisidia yo; i ki rimi ku bambutiria yo rago sabiti, ki sungu.

¹⁵Fuo geda rugute na ga anebi pai abaira bambutiria ki kedi sunge koyo du yo ni ki ya, “Awirina, si ngia pai ngbaroni ka ngarasi aboro, oni peke he.”

¹⁶Pauro ki ru ku ari, ki za yo ni beko ki ya. “Aboro aYisaraere, na agu roni nagunde ti Mbori, oni gi he.

¹⁷Mbori agi aboro nga aYisaraere re nasia abarani, ki kusi aboro ho i aima ni ku Ezipeta yo, ko Ki kusi yo yo ni nyanyaki beko.

¹⁸Ko ahi gayo pai ngbakungba yo ragoho ki du wa ka garã du 40.

¹⁹Ho ko agbarasi rika aboro ni saba, rogo gu ringara nga Kanana, ko ki fuku gayo ringara fu yo ni ukumbo, garãha ki du wa ka si du 450.

²⁰Fuo agi apai re ko ki nifu abasapungbanga afu fu yo dati kina Samuere, nebi.

²¹Fuo gere i ki sana he tipa bakindo. Mbori ki fu Saura fu yo nangia wiri Kisi, ngbatunga Benyamina, garãko ki du na ni 40.

²²Ho ko adi ko ni, ko ki moi Dawidi fu yo ni gayo bakindo; ko ko agumba pa ko a ni dezire, ki ya, ‘Mi bi Dawidi wiri Yisai, du kpotoko yo wa gu mi akpi nyemu he, ko amánga gu pai amanga dunduko wa mi akpi nyemu he a.’

²³Dagba tunga gi kumba yo re, fu Mbori Batasi fu aYisaraere ni, nga vesu, wa ko akido yo;

²⁴ho Yoane aima tungusa pa bapatiza saberã ni fu aboro Yisaraere dunduko mbata fu ye ko.

²⁵Wa Yoane amanga gako sunge, ko ki ya, ‘Ya oni da nga mi? Mi nga ko te. Oni ngére gu boro naye fuo re gu rakata du nduni yo mi are nga na zaka ha te.’

²⁶“Awirina, awiri ngbatunga Abarayama, na agu yo du dagba roni nagunde ti Mbori, kedi yo pa gi bata re fu rani.

²⁷Bambiko agu yo du Yerusarema yo, na abazogoyo, bambiko i aina nga ko te, na pa agu anebi i anageda na sabiti a te, i ki digisi he nisara ngbanga ko.

²⁸Ka i avura bi nga gu pai kuti ko vuru rengbe na kpi ko ya, i asana Pirato asana i imi ko.

²⁹Ho i adigisi agu apai ni dunduko i ake tipa ko, i ki zogo ko ngua yo ki pigi ko ku murã yo.

³⁰Ono Mbori azingisi ko azingisa be kpio dagba akangba yo.

³¹Agu yo naye Gariraya yo ku Yerusarema yo na ko i ki nibi ko abi ti dungu rame, i du ni adezireko fu aboro awere.

³²Ani ye na wene pangbanga gu kidohe i akido abarani na ni fu roni,

³³wa digisi Mbori he fu awirani, nizingisa Yesu; wa du he ni keke he ti ue tambuahe a, ‘Mo nga Wire, vungu mi ro areme.’

³⁴Gi pai re ko agumba tipa zingisa ko dagba akangba yo, awere ko akaraga nga tiko sa zirã berewe te, ki ya, ‘mi afú gu ziazia ndikidi pai nga ga Dawidi foro.’

³⁵Mbiko ya ko a rogo kura tambuahe yo, ‘Mo ahe nga ga Ziazia Ko ko bi zirã te.’

³⁶Kango Dawidi akpí akpi fuo manga ko ga Mbori pai dagba rikayo yo, i ki pigi ko pati abako, ko ki zirĩ.

³⁷Ono gu ko Mbori azingisi ko ko azirã nga te.

³⁸Oni ini aina ti ni awirina, ya, i natungusa pa gbandaka ingaapai mbiko kina gi kumba re.

³⁹Agu yo dunduko idi pa ko i sapu ngbanga fu yo ti apai dunduko mbiko ko, gu ka i asapa nga ngbanga fu roni ti ni mbiko ga Mose rugute te.

⁴⁰Oni bánda tironi abanda tie gu pai ka da ti roni anebi agumba pa ha; ya.

⁴¹‘Oni nga apayasipai, oni ngére, si ki iriwo airiwo ti roni oni ki kpiki; bambiko mi namanga pai ti gaoni arago, nga gu pai ka oni aida nga pa ha wa sa ya, ka i vura gumba ha fu roni vurũ.’ ”

⁴²Wa i akura, i ki kpari ya i tungusi agi apaia tungusa re fu yo ti kura sabiti.

⁴³Were ho rimbasa agbataka ni bambutiria yo, dungu aYudo na agu aboro naida pa ga aYudo yugopai i ki nipeke aPauro na Barunaba. I ki ta gumba pai fu yo, nisigira yo i ka kuti ga Mbori undahe.

⁴⁴Kura sabiti ki ya da aboro ki mbedi ka dungura tiyo adungura dunduko rogo bakporo ka gia ga Mbori pai.

⁴⁵Ono ho aYudo abi rimbasa ni, i ki nikpi Pauro akpi ki niti kangu agu apai ati ko agumba, ki nisapu ku riko.

⁴⁶APauro ki gumba pai agumba zukazuka na Barunaba ki ya, “Oni ka i gumba ga Mbori pai fu roni mbata. Ono kina gu oni naba ha aba ti roni ki nisapu ngbanga roni ni tironi ya oni are nga na nyenye unga te, oni ngére, si du ani ka sa tirani ti ni fu aGendiria.

⁴⁷Bambiko Gbia agumba ha wo fu rani, ki ya, ‘Mi moi ro ni imarago fu aGendiria, mo du adu ni bata dati kina digida sende yo.’ ”

⁴⁸Ho aGendiria agi gi ni re rago ki ningba angba ti yo, i ki taasi ga Mbori pai; agu yo i aima ringbisa yo sa nyenye unga i ki idi pa ha.

⁴⁹Ga Gbia pai ki gbataka agbataka rogo gu rago dunduko re.

⁵⁰AYudo ki zina he fu ruru bakumba ade, na abakumba bakporo, i ki enge rungosi aPauro na Barunaba ki do yo dagba yo.

⁵¹I ki zanzia nvutu ti nduyo kuti yo, i ki ye ku Ikonio yo.

⁵²Abawiriki ki hi be ngbarago na Ziazia Toro.