Read zande Amokedi 14 Bible Online

Amokedi 14 - zande bible

Amokedi 14

¹Pai ki da Ikonio yo ya i mongo rimi arima ku rogo ga aYudo ba mbutiria yo, i ki gumba pai bakere rimbasa aYudo ki idi he aida a na aGiriki.

²Ono agu aYudo nabasa ha i ki zingisi kpoto aGendiria yo, ki sa yo gbegberẽ kuti awirina.

³I ki ta ima aima koyo gbe nigumba pai agumba gbayaga mbiko Gbia nafu he ni dezire sa pa gako undahe, ki fu agu apai i aina pai ti ni na iiriwo apai i nimangi he ni beyo.

⁴Ono rimbasa aboro bakporo ki kparaka: agu yo ki ka kuti aYudo, agu yo ki du na amokedi.

⁵Ho aGendiria azingisi pai ni na aYudo a na abazogoyo i mangi yo amanga gbegberẽ, ki sopo yo na ambia.

⁶I ki ini he aina ki oro ku rogo agu abaakporo du Rukaonia yo, nangia Rusetura na Derube, na gu rago du yo kirikiri.

⁷I ki tungusi wene pangbanga yo.

⁸Kumba asungu Rusetura yo, adu nga na ome ti kpenduko ya, i avungu ko na gbarã, ko ata nga wa sa te.

⁹Gi ko agi pa Pauro re ko nigumba pai. Pauro ki dua bangiriko ti ko ki bi he ya ko du na idapase rengbe na husa ko,

¹⁰ko ki poi ku ari ya, “Mo gúari ku ari ni nduro.” Ko ki gu ku ari ki ta.

¹¹Ho arimbasa abi gi pai ni re Pauro amangi, i ki poi ku ari niya rogo pa aboro Rukaonia, “Ambori azorõ kono du ani ni ni kpia aboro!”

¹²I ki yambu rimo Barunaba, nga Zeu: na Pauro nga Ereme, bambiko ko adu ni bagumbapai.

¹³Gu boromotumo nga ga Zeu, gako yekaru adu barangba bakporo, ko ki ye na ababagara na kãikãi akpe ku ngbadimo bakporo yo, wa ka ko tumo ho na arimbasa.

¹⁴Ono ho amokedi agi pa ha ni nga aBarunaba na Pauro, i ki siri gayo remu ki oro ku dagba rimbasa yo, nipoi ku ari,

¹⁵niya, “Aboro, oni mangi agi apai re tipagine? Ani nga aboro a, ringirani wa kina gaoni, ani ye na wene pangbanga fu roni, ya oni sa nga tironi ti agi apai du gbua re sa gu Mbori du ni ungako, nga gu ko namangi ngbangbaturũ na sende na baime, na ahe dunduko rogo yo.

¹⁶Ko ahe rika aboro ahe dunduko i peke kina gayo agene mbata ni agu arikayo nasusi.

¹⁷Wo si adu ono ko ahe nga dezireko te, wa ko animangi wene pai, ki fu mai fu roni ngbangbaturũ yo, na rago ida riahe gbe, ki hihisi kpotoroni yo ni riahe na ngbarago.”

¹⁸I ki za rimbasa ti tumo ni ahe fu yo ni agi apai re ono i mbedi ka manga wo.

¹⁹AYudo ki ye Andiokia yo na Ikonio yo ku ho; ho i asosodi rimbasa ni, i ki nisopo Pauro ni ambia ki nigbefe ko ti bakporo yo, niberẽ ya ko kpi.

²⁰Ono wa abawiriki aru kirikiri pati ko ko ki guari ki rimi ku bakporo yo; rago ya giri i ki ndu na Barunaba ku Derube yo.

²¹Ho i atungusi wene pangbanga ni fu aboro gu bakporo re, ki sa dungu yo ni abawiriki, i ki karaga tiyo ku Rusetura yo, na ku Ikonio yo, a ku Andiokia yo,

²²ki nyakasi mbisimo abawiriki, ki ngarasi yo i ka kuti idapase, ki ya, ani aríma arima ku rogo ga Mbori ngbi ti dungu gberãrago.

²³Ho i amoi abaakumba ni fu yo rogo akanisa dũ, ki nikpari nigina riahe, i ki fu yo ku be Gbia, nga gu ko i aidi pa ko.

²⁴I ki kuru Pisidia yo, ki ye ku Pamburia yo.

²⁵Ho i agumba pai ni Peruga yo, i ki zorõ ku Ataria yo.

²⁶I ki guari yo kurungba yo ki ndu ku Andiokia yo, yo i afu yo ni ku be ga Mbori undahe tipa gu sungei anyasi re.

²⁷Hoi aye ni, ki dungura kanisa, i ki peke agu apai dunduko re Mbori amangi na yo, a wa ko aza gene ku rogo idapase fu aGendiria.

²⁸I ki ima na abawiriki tipa gbanga rago.