Read zande Amokedi 15 Bible Online

Amokedi 15 - zande bible

Amokedi 15

¹Akumba ki ye Yuda yo ki yugu pai fu awirina niya, “Ka i ayera nga roni wa sino Mose ya, ka oni bati nga te.”

²Ho aPauro na Barunaba adarĩ kangu ni gbe ki saki he na yo, awirina ki gumba ya aPauro ndu na Barunaba, a agu yo, ku Yerusarema yo koyo du amokedi ni na abaakumba tipa gi sakapai re.

³Si du i ata susa aPoinike yo ti ni na Somorona yo nitungusi pa sa kpoto aGendiria yo; kanisa agasi yo gene. Si ki du ni bakere ngbarago gbe fu awirina dunduko.

⁴Ho i aye ni ku Yerusarema yo, akanisa na amokedi a abaakumba ki nidi yo ku gume; i ki peke pa agu apai dunduko re Mbori amangi na yo.

⁵Ono agu yo naidi pase dagba rika aFarusi ki ta ru ku ari niya, “Yera yo ngba, ki rugu yo i ka kuti ga Mose rugute.”

⁶Amokedi ki dungura tiyo na abaakumba ka baka bangiriyo ti gi pai re.

⁷Ho i asaki he ni gbe, Petero ki ru ku ari, ki ya fu yo, “Awirina, oni ini he wa Mbori asia boro dagba roni mbata ya aGendiria gi pa wene pangbanga ngbare, ki idi pa ha.

⁸Mbori, ko ini kpotoboro yo, ko ki du ni dezireyo, nifu Ziazia Toro fu yo a wa ko afu ko fu rani;

⁹ko akpara nga rani na yo te, ko agirisi kpotoyo yo ni idapase.

¹⁰Were tipagine oni naasada Mbori ti ni, nimoi tindiro ri abawiriki nga gu ka atitarani arengba nga na ni na ani a te?

¹¹Ono ani idi ya ani abáta mbiko gu undahe nga ga Gbia Yesu, a wa yo.”

¹²Rimbasa ki ongo aonga dunduko; i ki gi pa aBarunaba na Pauro i nipeke agu apai i aina pai ti ni na iiriwo apai Mbori amangi dagba aGendiria ku beyo.

¹³Fuo onga yo, Yakoba ki karaga ha niya,

¹⁴“Awirina, oni gí pare; Simona nipeke pa ha wa Mbori andu koyo du aGendiria ni mbata, ka roga aboro dagba yo sa rimoko.

¹⁵Pa anebi naida gere a; wa du he ni keke he,

¹⁶‘Mi akaraga tire fuo agi apai re, mi ki dua ga Dawidi kporo berewe nati; gu nakpataka mi ki dua ha berewe, mi ki nyakasi he,

¹⁷ya yangara aboro gbata Gbia, na aGendiria dunduko, nga agu yo yambu yo rimore ti yo,

¹⁸Gbia nipoi wo, nga gu ko ninamanga agi apai i aini he re tona ho rago aenge ni.’

¹⁹Were gi sarangbanga nga, ka ani fúdi nga agu yo nasa tiyo fu Mbori dagba aGendiria ya;

²⁰ono ani ke pai fu yo, ya i ne agu abiriko nga ga kpiaahe, na pa meteka, na agu anya i akama gora, a kure.

²¹Bambiko tona bakuru yo i natungusa pa ga Mose rugute rogo abaakporo dunduko, ki nigedi pa ko rogo abambutiria na rago asabiti.”

²²Si ki ngba bangiri amokedi na abaakumba na akanisa dũ, ya, i sia akumba dagba rikayo, ki kedi yo ku Andiokia yo na aPauro na Barunaba, nga Yuda, i aniya ti ko Barusaba, na Sira, i nangia abaakumba dagba awirina.

²³I ki ke pai ku beyo were, “Amokedi na agu abaakumba nga ga awirina nasanango agu awirina nga ga aGendiria Andiokia yo na Suria yo a Kirikia yo;

²⁴bambiko ani agi he ya agu aboro nakuru dagba rani afudi roni ni apai ki nyaga mbisimoroni, ani agumba nga fu yo i mangi wo te.

²⁵Si ki ru bangirani, ani ki idi he ku bani, ya ani sia akumba ki kedi yo koyo du oni ni na aBarunaba na Pauro yo ani akpi nyemu yo.

²⁶Aboro nga yo nadi gayo kpio tipa rimo gaani Gbia nga Yesu Kristo.

²⁷Si du ani akedi aYuda ti ni na Sira, i agúmba kina agi apai re ni ngbayo a tigayo.

²⁸Bambiko si aru bangiri Ziazia Toro, na bangirani, ya ka ani moi nga bakere pai ri roni susi agi apai naru re ya;

²⁹ya oni ne agu ahe i atumo na ni fu kpiaahe, na kure, na agu anya i akama gora, na pa meteka; ka oni banda tironi ti agi apai re, oni adú wenengaĩ. Oni dú yo nyanyaki.”

³⁰Were, ho i akedi yo ni i ki ye ku Andiokia yo; ho i adungura rimbasa ni, i ki fu keke waraga fu yo.

³¹Ho i agedi he ni, rago ki ngba ti yo mbiko gu pa wasa re.

³²AYuda na Sira, i adu ni anebi a tigayo, i ki ngarasi awirina ni dungu apai, ki nyakasi yo.

³³Fuo nye yo yo ni ngbutuko, awirina ki ya i ndu zezeredi koyo du agu yo ni nakedi yo. [

³⁴Ono si angba ti Sira ka nye yo.]

³⁵Ono aPauro na Barunaba anye Andiokia yo, niyugu pa Gbia ki tungusi he, na kura aboro ni dungu yo a.

³⁶Fuo ra yo ngbutuko Pauro ki ya fu Barunaba, “Ani káraga tirani awere ki bi awirina ti gu pai ka amanga yo rogo abakporo dunduko ho ani atungusi pa Gbia ni.”

³⁷Barunaba ki kpi nyemu i di Yoane a, gu ko i aniya ti ko Marako.

³⁸Ono Pauro aberẽ ya ngba nga dia gu ko ka ndu na ko nakaraga tiko fuo yo Pamburia yo te, wa ko andu nga na yo ku pati sunge ya.

³⁹I ki dari kangu gbe si du i akparaka ti ni, Barunaba ki di Marako, i ki ndu kurungba yo ku Kupurio yo;

⁴⁰ono Pauro asia Sira, ki ndu, awirina nifu ko ku be ga Gbia undahe.

⁴¹Ko ki ndu rogo Suria na Kirikia, ki nyakasi akanisa.