Read zande Amokedi 16 Bible Online

Amokedi 16 - zande bible

Amokedi 16

¹Pauro ki ye ku Derube yo a na Rusetura yo; were, gu bawiriki ki du yo, rimoko angia Timoteo, wiri de Yudo naidi pase; ono bako nangia Giriki.

²Gi ko re agu awirina nadu Rusetura yo na Ikonio yo i agumba ruru pai kuti ko.

³Ko, pauro akpi nyemu i ndu na ko; ko ki di ko ki yere ko mbiko agu aYudo nadu rogo agu arago re; bambiko i aini dunduko ya bako nga Giriki.

⁴Wa i andu gayo nunguro rogo abaakporo yo, i ki fu agu andika fu akanisa i ka kuti ni, gu amokedi na abaakumba arú he nadu Yerusarema yo.

⁵Were akanisa ki nyaki rogo idapase yo, ki nge ange na uru.

⁶I ki ta ata rogo ringara aPumgia yo na Garatia yo. Ziazia Toro aza yo tipa gumba ga Mbori pai Asia yo.

⁷Ho i aye ni ku pati Musia yo, i ki asadi ndu ku Bitunia yo ka ga Yesu Toro aida nga ha fu yo ya;

⁸i ki susi Musia, ki ye ku Turoa yo.

⁹Pauro ki bi yuguyugupai yuru; kumba Makedonia yo niru nikpari fu ko niya, Oni si ku Makedonia no ki unda rani.

¹⁰Ho ko abi yuguyugupai ni, ani ki asadi ndu ku Makedonia yo ni ba sa, niya tigaani ya Mbori ayambu rani ani tungusi wene pangbanga fu yo yo.

¹¹Si du ani aguari Turoa yo ti ni rogo kurungba yo, ki ndu nzunzu ku Samoturake yo, rago ya giri ani ki ndu ku Neapori yo.

¹²Ani ki guari yo ki ndu ku Firipoi yo, nga bakporo Makedonia yo, bakumba ha nadu rogo gu rago re, si adu ni ga aRomo kporo. Ani ki raki ngbutuko rogo gi bakporo yo re.

¹³Rago sabiti ani ki kuru ngbadimo ku zegi yo ti ngba di yo, ani aberẽ ya yo du bakpe ni; ani ki sungu sande ki gumba pai fu agu ade natiria.

¹⁴De ki gi parani sa; rimori angia Rudia, ri anabaga ngungungu remu, ri aye rogo gu bakporo yo nga Tuntira, ri anairisa Mbori. Gbia ki za kpotori yo, ri di agu apai Pauro agumba ku gume.

¹⁵Ho i abapatizi ri ni, na gari aboro kporo, ri ki kpari fu rani, niya, “Ka oni bere ya mi ka kuti Gbia ni rengo, oni ye ku kpure yo, ki nye yo.” Ri ki zúngadi rani.

¹⁶Pai ki da, wa ani andu ku bakpe yo, ya paranga de agbia rani, ri adu na gu toro nagumba pai, ri afu bakere ũkumuko fu abairari be gari sangba atoro.

¹⁷Ri ata peka rani na Pauro nipoi ku ari, niya, “Agi aboro re i nga amoyambu fu Mbori du ni Bahe, natungusa pa bata fu rani.”

¹⁸Ri ki mangi gere ti dungu rame. Ono si afudi Pauro afuda gbe ko ki sa tiko ki ya fu toro, “Mi rugu ro ni rimo Yesu Kristo mo gúari ti ri.” U ki guari ni gu rago re.

¹⁹Ono ho abairari abi he ni ya gu pai i ka kumuko be he si go, i ki moi beyo ti aPauro na Sira, ki gbefe yo ku bangbeahe yo ku barangba abazogo.

²⁰Ho i aye ni na yo koyo du abasapungbanga ni, i ki ya, “Agi aboro re nga aYudo, i nafuda aboro rogo gaani bakporo bakere gbe,

²¹ki yugu agu asino aru nga dia ani he ki mangi he nga aRomo ya.”

²²Rimbasa ki mongo guari kuti yo: abasapungbanga ki siri gayo remu ti yo, ki ya i taki yo ni angbangbaki.

²³Ho i amoi dungu amandoro ni ti yo, i ki ta ba yo ku bambukisa yo nirugu babandaha ko banda yo gbe.

²⁴Wa i arugu ko were, ko ki turã yo ku rogo gu vuru bambukisa du ku dimo yo ki kisi nduyo nyanyaki ni angboro.

²⁵Ono ho si adu ni wa ka bebere yuru da aPauro na Sira i anikpari nibi aimina fu Mbori, kisikisi aboro ki nidege tuyo fuo yo.

²⁶Rure bakere bazigizo ki du wa si azigizo mburu bambukisa azigizo; angbadimo ki za aza dũ ni ba sa; agu ahe i avodi aboro na ni si ki zaki azaka ti yo dũ.

²⁷Babanda bambukisa ki zingi be rame ki bi angbadimo bambukisa ni zaza ha, ko ki mo gako gbanga sape, ki niye ka imo tiko, niberẽ ya kisikisi aboro merẽ.

²⁸Ono Pauro apoi ku ari niya, “Ka mo imi nga tiro ya; bambiko ani erẽ dunduko.”

²⁹Babanda ki yambu ne na we, ki ti ku dimo yo, ki ti sande barangba aPauro na Sira, nikio akio be gunde,

³⁰ki kusi yo, ki ya, “Abaira, gine mi ka manga nga ka bata?”

³¹I ki ya, “Mo ídi pa Gbia Yesu, mo ki bati, oni na gamo aboro kporo.”

³²I ki gumba pa Gbia fu ko, na fu agu yo naau ti gako bambu yo dũ.

³³Ko ki rogo yo ni kina gu rago re yuru, ki zundu gayo amandoro; i ki bapatizi ko, ko na gako aboro dunduko, ni ba sa.

³⁴Ko ki rogo yo ku tii gako bambu yo, ki moi riahe barangba yo, rago ki ngba angba ti ko na gako aboro kporo dú, wa i naidi pa Mbori.

³⁵Ono ho rago agiri ni, abasapungbanga ki nikedi abaira aparanga, niya, “I kúsi agu akumba re.”

³⁶Babanda bambukisa ki pe gi pai re fu Pauro, ki ya, “Abasapungbanga nikedi sunge i kusi roni; awere oni kúru mbiko ho, ki ndu zezeredi.”

³⁷Ono Pauro ki ya fu yo, “I ataki rani ku bangiri aboro, ka i asapa nga ngbanga rani ya, ani nga aRomo, i ki ba rani ku bambukisa vo; i nikaba rani ku sa yo awere ni rondo? Oó wa sa te! Ono i yé tigayo ki kusi rani.”

³⁸Abaira aparanga ki nipeke agi apai re fu abasapungbanga; i ki nigunde agunde, ho i agi he ni ya aRomo nga yo.

³⁹I ki ye ki zungadi yo; ho i akusi yo ni, i ki kpari fu yo i guari bakporo yo.

⁴⁰I ki kuru bambukisa yo, ki rimi ku rogo ga Rudia bambu yo; ho i abi awirina ni, i ki ngarasi yo, ki guari.