Read zande Amokedi 17 Bible Online

Amokedi 17 - zande bible

Amokedi 17

¹Were ho i asusi Ambipori ni na Aporonia, i ki ye ku Tesaronike yo, ho bambutiria aYudo adu ni.

²Pauro ki rimi koyo du yo ni, a wa ko anamanga, ki ta saka pai na yo rogo Ziazia Kekeapai ti arago sabiti biata,

³niyugu he nipe he ya hi Kristo pai angba, ki zingi dagba akangba. Ko ki ya a, “Gi Yesu tungusi mi pa ko fu roni re, Kristo du.”

⁴Agu yo ki idi he, ki ka kuti aPauro na Sira; na agu yo dagba ruru aGiriki ni bakere rimbasa yo a anagbia ni dungu yo.

⁵Ono aYudo ki nikpi yo akpi, ki nirogo wasiwasi akumba dagba azogo, ki nidungura rimbasa ki zingisi aboro bakporo yo; i ki dusia ga Yasona bambu, nikpi nyemu i kusi yo fu aboro.

⁶Ho i abi nga yo ni ya i ki nigbefe a Yasona na agu awirina ku barangba abazogo bakporo, nipoi ku ari ya, “Agi aboro nagbarasi zegino re i ye kono a.

⁷Yasona ki di yo ku gume; i namanga akia ti agu andika nga ga Kaisara dunduko, niya kura bakindo ho, nga Yesu.”

⁸I ki nifudi rimbasa na abazogo bakporo ho i agi agi apai ni re.

⁹Ho i adaka he ni be Yasona na akura yo i ki he yo i ndu.

¹⁰Awirina ki kedi aPauro na Sira ku Beroya yo ni ba sa yuru; i, ho i aye ni koyo i ki rimi ku rogo ga aYudo bambutiria yo.

¹¹Were agi yo re i ngba ti agu yo nadu Tesaronike yo, wa i adi pai wenengaĩ ka berã ha, niwisigi Ziazia Kekeapai na uru, si ngia agi apai wo re.

¹²Si du agu yo aidi pa ha ti ni ni dungu yo; agu yo adu ni abaakumba aGiriki a, ade na akumba, ki idi pa ha, ni dungu yo.

¹³Ono ho agu aYudo nadu Tesaronike yo aini he ni, ya Pauro atungusi ga Mbori Pai ku Beroya yo a, i ki ye koyo a, ki nizingisi rimbasa ni fuda yo.

¹⁴Awirina ki kedi Pauro tie ni ba sa ko ndu da pati baime yo: aSira ki nye yo mbata na Timoteo.

¹⁵Ono agu yo nangbisi Pauro, aye na ko da Atenai yo; i ki ga na pai tipa aSira na Timoteo ya i ye fuo Pauro ni ipo.

¹⁶Were wa Pauro asungudi yo Atenai yo, toroko ki zingi kpotoko yo, wa ko abi bakporo si nahi be kpiaahe.

¹⁷Si du ko anasaka pai ti ni bambutiria yo na aYudo na ruru aboro, na bangbeahe yo na uru na agu yo nagbia ko yo.

¹⁸Agu airatatamana a nangia ga aEpikuro yo na ga aSatoa yo, i ki gbia ko. Agu yo ki ya, “Gini pai gi boro menemene nagumba ha re?” Agu yo ki ya, “Ko wiri bayugu ambori nga ga kura aringara.” Bambiko ko atungusi pa Yesu na pa zingabekpio.

¹⁹I ki di ko ki ye na ko ku Areopaga yo, niya, “Ka ani ini gi vovo yugopai re mo nagumba ha, gine nga ha?

²⁰Bambiko mo ye na agu apai iriwo turani yo; si du ani nakpi nyemu ka ruga tirani ti ni na agi apai re.”

²¹Were aboro Atenai na agu aboro kura aringara nadu yo dunduko, i amanga nga kura pai te kina gia pa vovo pai.

²²Pauro ki ru bebere Areopaga yo, ki ya, “Aboro Atenai, mi nabi he dedede ya berã pa irisa kungba ambori du ti roni gbe.

²³Bambiko wa mi asusi ki bi agu ahe oni nairisa ha mi ki bi zungudizungudi mbia a du na keke pai ti ni, ya, ‘Fu gu Mbori i aina nga ko ya.’ Were gu oni nairisa oni aina nga paha ya, si nga gu mi nayugo ho fu roni.

²⁴Gu Mbori namangi zegino na ahe dunduko rogo yo, ko nga Gbia ngbangbaturũ na sende, ko aima nga rogo agu abambuirisa i nadua ha ni be te.

²⁵I amanga nga pa ko ni be aboro wa ka zingo ahe mangi ko te, wa du ko ni tiko nafu unga fu aboro dũ, na onga na ahe dunduko.

²⁶Ko ki mangi arika aboro dunduko wa sa i ima auru kpotosende dunduko, ko aringbisi agu arago i afu fu yo, na ngbanda gayo banye.

²⁷Mbori amangi he wo aboro gbata ko, wa i akpi nyemu ka ruga tiyo na pako, si ngia ka i da ti inida ko. Ono ko aturã nga na ani wa sa te,

²⁸bambiko ‘Ani ni ungarani, ki nita ata, ki du kina ho rogo ko yo;’ a wa agu yo dagba gaoni abayango aya, ‘Bambiko ani aenge ti Mbori a.’

²⁹Wa du ani tie naenge ti Mbori, ka ani here nga ya gu he nga Mbori si wa dahabu na feda na mbia du ni sekeseke he be rubangirise na ga aboro tatamana ya.

³⁰Were Mbori aneke bangiriko ti agu arago mungo re, ono awere ko naruga aboro ya i sa gayo berã dunduko rogo kpotosende du:

³¹bambiko ko aringbisi rame, ko nikasapa ngbanga zegino ni rurupai rogo yo be gu kumba ko aasia paha fu ko. Ko afuga pai fu aboro dunduko i ini gere ti ni, wa ko azingisi ko be kpio dagba akangba.”

³²Were ho i agi pa zingabekpio ni, agu yo ki momu; ono agu yo ki ya, “Ani agía paro tipa gere berewe giza.”

³³Were Pauro ki guari dagba yo.

³⁴Ono agu akumba ki ka kuti ko, ki idi he. Dionusio nangia Areopago ki du dagba yo a, na de rimori angia Damari, na akura yo a.