Read zande Amokedi 2 Bible Online

Amokedi 2 - zande bible

Amokedi 2

¹Ho rago Pendekote ada ni i nadungura tiyo kina ku rogo gu ba sa.

²I ki ya gi woro si niwo awo ari yo wa ka kina bakere yuge aya ari yo, si ki du adu vuru gu bambu yo dunduko i asungu ni.

³I ki bi mirãhe si nikparaka wa kina mirã we; si ki du adu riyo dunduko.

⁴I ki hiki ahika be Ziazia Toro dunduko, i ki tona fura ni kura ngbatunga afugo, wa Toro afu he fu yo i nigumba ha.

⁵Were, aYudo nanidu Yerusarema yo, nangia ruru aboro i aye dagba rika aboro dunduko zegino.

⁶Ho i agi gi woro ni re, rimbasa ki dungura tiyo, ngbayo ki zere azera bambiko aboro agi payo dunduko i nifura rogo payo yo.

⁷Si ki niiriwo airiwo ti yo i ki niberẽ kina ha, niya, “Oni ngére, a nga aGarirayo du nafura dunduko te re?

⁸Wiri ani pa gia ha wãi, ani na kina parani dunduko i avungu rani kuti ni?

⁹Nga aPurutio na aMadaio a aEramo, na agu yo nidu Mesopotamia yo na Yuda yo, a Kapadokia yo, a Pondo yo a Asia yo,

¹⁰a Purugia yo a Pamburia yo, a Ezipeta yo na agu arago du Ribue yo mbedi ambeda ku Kurene yo, na gu kungba aboro ninaima ku Roma yo, aYudo na agu aboro idi ga aYudo yugopai,

¹¹aKureto a aArabo, ani nagia payo i nigumba agu apai du na tandu nga ga Mbori parani yo.”

¹²Si ki iriwo airiwo ti yo dunduko i ki nibaki bangiriyo abaka ki ya dagba yo, “Gini pai nga gere?”

¹³Agu yo ki ya ni wia, “I hiki be vovo imekakue.”

¹⁴Petero ki ru ku ari na agu yo nanidu bawe na sa, ki poi ku ari ki ya fu yo, “Aboro Yuda, na agu roni dunduko ninaima ku Yerusarema yo, oni ini gere ki ye turoni sa gimi apai.

¹⁵Agi yo akpi nga imekakue re wa oni aberã ha te; oni bi nga saa ribua gbua nga ga wiso du;

¹⁶ono gi pai re nga gu i agumba ku ngba gu nebi nga Yoere; ya,

¹⁷‘Ya Mbori, Si adá ada ti yangara rame, mi aúka Torore ku ri aboro dunduko, awironi nga akumba na agu awironi nga ade, i agúmba pai, gaoni aparanga abí yuguyugupai, gaoni gbinza aboro ki nirari amusumo;

¹⁸ii, ni gu rago re mi aúka Torore ku ri gimi akanga nga akumba na ku ri agu akanga nga ade, i nigumba pai.

¹⁹Mi ki yugu iiriwo apai ngbangbaturũ yo ari yo, na agu apai i aina pai ti ni zegino; kure na we na ngime;

²⁰i ki sa uru ku bitimo yo, ki sa diwi ku kure yo, mbata gu rago nikada nga ga Gbia, nga gu bakere iiriwo rago re.

²¹Si adú adu, gu ni ka kpara ti rimo Gbia ni bati abata.’

²²“Aboro aYisaraere oni gí agi apai re: Yesu nga boro Nazareta, nga gu kumba Mbori anayugo ngba na ko fu roni ti agu apai du na tandu na iiriwo apai na agu apai i aina pai ti ni, Mbori anamanga ha rogo ko yo ku dagba roni, wa ini oni he ni tironi a.

²³Ko, Mbori aringbisi zia ko fu roni wa ko aima ina ha mbata, oni awagi ko ki imi ko vurube agu aboro yo aru nga ya.

²⁴Ko Mbori azingisi ko, ki zaki kpio ti ko; bambiko si adu nga wa ka kpio di be ko te.

²⁵Bambiko ya Dawidi tipa ko, ‘Mi anabi Gbia barangba re dedede, bambiko ko du ku kumbabere, ya ka mi wo nga ya;

²⁶si du kpotore yo angí ti ni, mirãre ki du pusiapusia; borore aráka na maabangirise.

²⁷Bambiko mo ambu nga mbisimore Adisi yo te, mo afu nga ga Ziazia Ko ko bi zirã a te.

²⁸Mo ayugu gene unga fere; mo ambíisa re ni ngbarago yo du mo ni.’

²⁹“Awirinami, mi gumba pa gu titarani fu roni nga Dawidi zukazuka, ya ko akpi i ki kpisidi ko, murãko du na ani a wa du rago re.

³⁰Bambiko ko adu ni nebi, ki ini ya Mbori zunga he fu ko ya ko amaa boro auru gako mbata bakindo dagba atitako.

³¹Ko aima bi gere ki gumba pa gu zingabekpio nga ga Kristo, ya i ambú nga ko ku Adisi yo te, boroko abí nga zirã a te.

³²Gi Yesu re Mbori azingisi ko, ani nga adezire gere dunduko.

³³Kumbabe Mbori amoi irisa riko, Bako ki kido ko tipa Ziazia Toro, si ki ta du wa gere ko ki uka gi pai oni ata bi re nigi he.

³⁴Bambiko Dawidi andu nga ku angbangbaturũ yo te; ono ko aya ni tiko, ya ‘Gbia aya fu gi Gbia, Mo sungu ku kumbabere,

³⁵daho mi ka maa avuraro ni ku tii nduro yo wa gbada.’

³⁶Aboro aYisaraere ini ti ni ni rengo ya Mbori amangi ko ni Gbia, ni Kristo, nga gi Yesu oni awagi ko re.”

³⁷Were ho i agi gi ni re, ngbaduyo ki nikua akua, i ki ya fu Petero na kura amokedi, “Awirinarani, ani amánga wãi?”

³⁸Petero ki ya fu yo, “Oni sá gaoni berã i ki bapatizi roni dunduko ti rimo Yesu Kristo i di gaoni ingaapai ti roni; oni ki di gu ũgume nga Ziazia Toro.

³⁹Bambiko oni i akido roni, na awironi, na agu yo dunduko du adu tuturu nga agu yo dunduko Gbia ka yamba yo koyo du ko ni nga gaani Mbori.”

⁴⁰Kura dungu apai ko ayugu he na ni, ki ta ruga yo niya, “Oni bátasi tironi ti gi iraira rika aboro re.”

⁴¹Agu yo naka kuti gako pai i ki bapatizi yo; ni gu rago re i ki gedi agu yo na yo i ki du wa ka i du 3,000.

⁴²I ki nye anye rogo ga amokedi yugopai yo na gayo ngbanya nyanyaki nikuadi kpokuta nikpakpari kpe.

⁴³Gunde ki zi aboro azia dũ; amokedi ki nimangi dungu iiriwo apai na agu apai i aina apai ti ni.

⁴⁴Agu yo dunduko naidi pai i ki du adu sa, gayo ahe ki du adu sa dunduko.

⁴⁵I ki babagi gayo akporo na gayo ahe, i ki kparaka ha fu aboro dunduko, a wa zingo ho amanga yo.

⁴⁶I ki nidu adu kina ku bani yekaru yo nikuadi kpokuta kpuyo yo i ki niri gayo riahe na kina ngbarago na ruru ngbaduyo na uru,

⁴⁷nitambua Mbori, aboro ki ningba angba na yo dunduko. Gbia ki nifu agu aboro nanabata ku dagba yo yo na uru.