Read zande Amokedi 22 Bible Online

Amokedi 22 - zande bible

Amokedi 22

¹“Awirinami, aba, oni gí gu pai mi nikagumba ha fu roni re.”

²Ho i agi he ni ya ko nagumba ha rogo pa Ebere yo i ki ongo kii; ko ki ya,

³“Yudo nga mi, i avungu re Taruseu yo du Kirikia yo, ono mi asono rogo gi bakporo yo re, mi asungu pati ndu Gamariere, i ayugu pa ga abarani rugute fere nyanyaki wa du sinoho, mi ki du ni iranyaka tipa Mbori, a wa du oni erẽ dunduko areme.

⁴Mi ki rungosi aboro gi Gene re kina kuti kpio, nivodi akumba na ade ki nimoi yo ku bambukisa yo.

⁵Gbiamotumo du ni dezirere tipa gi pa, re a, na rika ga aYudo abaakumba dunduko. I afu awaraga fere a tipa awirina nga aYudo, mi ki nungu ku Damaseke yo, ka ye na agu yo nadu yore a ku Yerusarema yo ni vodivodi yo, i mbusi yo.

⁶“Si ki du wa mi andu gi nunguro ki mbedi ku Damaseke yo wa bebere uru, rure bakere imarago ki ye ngbangbaturũ yo ki hasi rago pati re kirikiri.

⁷Mi ki ti sande ki gi fugo si niya fere, ‘Saura, Saura, tipagine mo arungosi re ti ni?’

⁸Mi ki karaga ha ki ya, ‘Da nga mo, Gbia?’ Ko ki ya fere, ‘Mi nga Yesu nangia boro Nazareta, nga gu ko mo arungosi ko.’

⁹Agu yo nadu na mi, i abi imarago tigu, ono i agia nga fugo gu ko nagumba pai fere te.

¹⁰Mi ki ya, ‘Mi amánga wãi, Gbia?’ Gbia ki ya fere, ‘Mo gúari ki ndu ku Damaseke yo; i agúmba pa agu apai dunduko foro yore nga gu i aringbisi mo mangi he.’

¹¹Ho ka mi abi nga he ni ya bambiko gu imarago du ni ngenzerengenzere he re, agu yo nadu na mi i ki zadi bere, mi ki ye ku Damaseke yo.

¹²“Anania nangia ruru kumba tipa rugute, agu aYudo nadu yo i agumba ruru pai kuti ko dunduko,

¹³ko aye koyo du mi ni, ki ta ru pati re niya fere, ‘Wirinami, Saura, mo ngere.’ Ni kina gu rago re mi ki ngere ki bi ko.

¹⁴Ko ki ya, ‘Ga abarani Mbori aya ti ro, mo ini agu apai ko akpi nyemu he re ki bi Ruru Boro ki gi fugo ngbako.

¹⁵Bambiko mo nikadu ni dezire agu apai mo abi ki gi he fu aboro dunduko tipa ko.

¹⁶Awere mo nasunga tipagine? Mo gúari, i ki bapatizi ro ki ta zunda ga gbegberẽapai ti ro, nikpari ti rimoko.’

¹⁷“Were ho mi akaraga tire ni ku Yerusarema yo, wa mi akpari yekaru yo mi ki bi yuguyugupai,

¹⁸ki bi Gbia, ko niya fere, ‘Mo ípisi tiro ki guari Yerusarema yo bambiko i adia nga ga dezire tipa re te.’

¹⁹Mi ki ya, ‘Gbia, i ini tigayo ya mi akikisi agu yo naidi pa ro ki nitaki yo rogo abambutiria dunduko.

²⁰Ho i auka kure Setefanio ni nangia dezirero, mi aru pati yo a ki idi he, ki banda ga agu yo remu naimi ko.’

²¹Ko ki ya fere, ‘Mo gúari; bambiko mi akéda ro tuturu koyo du aGendiria ni.’ ”

²²I ki ye tuyo fu ko dati kina gi pai re; i ki poi apaa ku ari, ki ya, “I dí gi irawia auru kpotosende re! Bambiko ngba nga nye ko ni ungako te.”

²³Wa i apoi ku ari, ki ba gayo aremu, ki mi nvutu ku yuge yo,

²⁴bairarivura ki ya, i ndu na ko ku gbata yo, ki ya i sana ko nita ko, ko ini ndu gu pai poi aboro ku ari ti ni kuti ko.

²⁵Ho i avo ko ni ni agiri kpoto, Pauro ki ya fu gu barukuri aboro 100 naru ho, “Ru taka oni gu boro nga Romo, wa i ata sapa nga ngbanga ni ya?”

²⁶Ho barukuri aboro 100 agi he ni, ko ki ndu koyo du bairarivura ni, ki gumba ha fu ko, niya, “Gini pai mo aye ka manga? bambiko gi kumba re nga Romo.”

²⁷Bairarivura ki ye ki ya fu ko, “Mo gúmba ha fere, Romo nga mo?” Ko ki ya, “Ii.”

²⁸Bairarivura ki karaga ha ki ya, “Mi angbe gi pa du ni Romo re ni dungu marã.” Pauro ki ya, “Ono i avungu re ni Romo.”

²⁹Agu yo naye ka sana ko nita ko i ki guari pati ko tie ni ba sa; bairarivura ki gunde a ho ko aini ni ya Romo nga ko, bambiko wa ko avo ko.

³⁰Ono ho rago agiri ni, bairarivura akpi nyemu ka ruga tiko na ndu gu pai aYudo akiti ngbanga Pauro ti ni, ko ki zaki ko, ki ya fu abairamotumo na abororondo dunduko i tiria tiyo, ko ki zorõ na Pauro ki moi ko barangba yo.