Read zande Amokedi 23 Bible Online

Amokedi 23 - zande bible

Amokedi 23

¹Pauro ki ningana abororondo, ki ya, “Awirinami, mi adu ni ungare ni wene sangba kpotore yo barangba Mbori dati kina gi rago re.”

²Gbiamotumo, nangia Anania, ko ki ya fu agu yo naru pati ko i ta ko ti ngbako.

³Pauro ki ya fu ko tie; “Mbori ata ro, mo nga vurusivurusi pere bambu; mo nasunga ka sapa ngbanga re wa kina pa rugute, mo ki ya i ta re wa adu nga pa rugute ya?”

⁴Agu yo naru ho i ki ya, “Mo nakpakana ga Mbori gbiamotumo?”

⁵Pauro ki ya, “Awirinami, mi aina nga ya ko nga gbiamotumo te; bambiko si du ni keke he ya, ‘Ka mo gúmba nga gbegberẽ pai fu bazogo ngbatungaro ya.’”

⁶Ono ho Pauro abi he ni ya agu yo angia aSadoke, agu yo ki ngia aFarusi, ko ki poi ku ari dagba abororondo yo, ki ya, “Awirinami, Farusi nga mi, nga wiri Farusi. I nasapa ngbanga re tipa kina maabangirise ti zinga aboro be kpio.”

⁷Ho ko agumba ha ni were, darãpai ki du dagba aFarusi na aSadoke ni kangu; gbuuyo ki kpara.

⁸Bambiko aSadoke niya zingabekpio ho te, maraika a te, atoro ho a te. Ono aFarusi naida pa ha dũ.

⁹Gbarakagbaraka pai ki du dagba yo: agu abakeapai nadu na aFarusi i ki ru ku ari, ki ti kangu, niya, “Ani abi nga gbegberẽpai ti gi kumba te re. Wa ka toro agumba pai fu ko, na maraika, si ki du wãi?”

¹⁰Ho bakere darãpai adu ni dagba yo, bairarivura ki gunde ya Pauro ka kuadi be yo, ko ki ya fu abanzengere i zorõ ki di ko be yo ni ome, ki ye na ko ku gbata yo.

¹¹Ni gu yuru kusa re, Gbia ki ru pati Pauro ki ya, “Mo ngárã; bambiko wa mo agumba pai tipa re Yerusarema yo, mo nikadu ni dezirere Roma yo a wo.”

¹²Ho rago agiri ni aYudo ki kpamia tiyo ki zunga he niya, i ari nga riahe ki mbiri he wa sa te da kina ho i ka imo Pauro ni.

¹³I asusi 40 nga agu aboro nata gi bura re.

¹⁴I ki ye koyo du abairamotumo ni na ga aYudo abaakumba, ki ya, “Ani azunga he ni bakere zungahe, ya ka ani gí nga fuõ riahe te da kina ho ani ka imo Pauro ni.

¹⁵Were oni na abororondo oni sána bairarivura, ko zorõ na ko kono du oni ni wa ka oni kpi nyemu ka sana he ti gako pai wenengaĩ. Ani ki ima ru nguru ka imo ko mbata ko nikambeda kono.”

¹⁶Ono wiri dawiri Pauro agi pa gayo nguru, ko ki ye ki rimi ku gbata yo ki gumba ha fu Pauro.

¹⁷Pauro ki yambu barukuri aboro 100 koyo du ko ni, ki ya, “Mo ndú na gi paranga re koyo du bairarivura ni; bambiko pai dũ ngbako ko ka gumba ha fu ko.”

¹⁸Ko ki di ko ki ndu na ko koyo du bairarivura ni, ki ya, “Pauro nga kisikisi boro niyambu re koyo du ko ni, ki ya fere mi ye na gi paranga re kono du mo ni, ko du pai ngbako ka gumba ha foro.”

¹⁹Bairarivura ki zi beko, ki ndu ku sa yo, ki sana ko ni rondo, “Gini pai mo agumba ha fere?”

²⁰Ko ki ya, “AYudo aidi gu pai dagba yo ka sana ro mo zorõ na Pauro fu abororondo gba, wa ka i nakpi nyemu ka sana he ti gako pai wenengaĩ.

²¹Were ka mo ídi nga ha fu yo wo ya; bambiko akumba naru nguru tipa ko, i susi 40, i azunga he ya i ari nga riahe ki mbiri he te, da kina ho i ka imo ko ni. I nasunguda furaro awere.”

²²Were bairarivura ki he paranga ko ndu; ki rugu ko, ya, “Ka mo gúmba nga ha ya mo ayugu agi apai fere re fu boro wa sa ya.”

²³Bairarivura ki yambu abarukuri aboro 100 ue koyo du ko ni, ki ya “Oni mbákadi abanzengere 200, na aboro farasi 70, na aboro baso 200, i ndu da Kaisaria yo ti saa ribua nga ga yuru.”

²⁴Ko ki ya “I fú anya Pauro sungu auru ra, i ki ye na ko wenengaĩ koyo du Ferika ni nga banyaki.”

²⁵Ko ki ke waraga wa gere:

²⁶“Kuraudio Rusia nasanango Ferika nga wene banyaki gbe.

²⁷AYudo azi gi kumba re, ki niye ka imo ko, ho mi ayara ni koyo du yo ni na abanzengere, ki batasi ko be yo, wa mi agi he ya Romo nga ko.

²⁸Mi ki zorõ na ko koyo du gayo abororondo ni, nikpi nyemu ka ina ndu gu pai i akiti ngbanga ko ti ni.

²⁹Mi ki bi he ya i nakita ngbanga ko kuti pa gayo rugute, ono i akita nga ngbanga ko kuti gu pai rengbe na kpi ko na vo ko a te.

³⁰Ho i ayugu he fere ni ya i nikaru nguru ti gi kumba re, mi ki kedi ko koyo du mo ni ni ba sa, ki ya fu agu yo nakita ngbanga ko a i gumba pai kuti ko barangba ro.”

³¹Were abanzengere ki di Pauro, wa i agumba ha fu yo, ki ye na ko yuru ku Andipaturi yo.

³²Ono rago ki ya giri i ki he abanduri farasi i ndu na ko, i ki karaga tiyo ku gbata yo.

³³Ho agu yo ada ni Kaisaria yo, ki fu keke waraga fu banyaki i ki moi Pauro barangba ko.

³⁴Ho ko agedi he ni, ko ki sana he ya ko aye rogo gini ringara; ho ko aini he ni ya ko aye Kirikia yo,

³⁵ko ki ya, “Mi agia ga pai ho agu aboro nakita ngbanga ro ka ye ni a”. Ko ki ya i banda ko ti ga Erode bambu ngbanga yo.