Read zande Amokedi 26 Bible Online

Amokedi 26 - zande bible

Amokedi 26

¹Aguripa ki ya fu Pauro. “I idi he foro mo gumba gu pai dũ ti ro.” Pauro ki tãi beko tie ki gumba gako pai, ya:

²“Aguripa, bakindo, mi berẽ ya si ngba ti re, mi gumba gi pai areme barangba ro tipa agu apai dunduko aYudo nakita ngbanga re ti ni;

³bambiko mo ini agu asino na agu apai du dagba aYudo yo dunduko wenengaĩ. Si du mi azúngadi ro ti ni mo gi gi pai zezeredi.

⁴“AYudo atona ina agu apai mi anamanga ni ungare dunduko ho mi adu ni ni gude, si adu dagba ngbatungare ti tonatona ha, na Yerusarema yo a.

⁵Si ngia i nakpi nyemu ka gumba ha wo, i gúmba ha ya i aini pa re ti bambata ha wa mi adu ni Farusi nipeke agu yo naru nyanyaki tipa gaani dini.

⁶Awere mi naru erẽ i sapu ngbanga re tipa maa bangirise kuti gu kidohe Mbori akido fu abarani;

⁷nga gu rikarani du bawe na ue namaa bangiriyo kuti dia ha a, nimangi pa Mbori yuru na uru kakaka. Ako bakindo, aYudo nakita ngbanga re kina kuti gi maabangirise re!

⁸Tipagine adu nga gu pai ti ni bangironi ni rengo, ya Mbori nazingisa aboro be kpio ya?

⁹“Mi aberẽ he a tigu ya ngba manga mi dungu apai angba kuti rimo Yesu nangia boro Nazareta.

¹⁰Wo mi amangi a Yerusarema yo: abairamotumo aasia pai fere mi ki nikisi ga Mbori aboro ku bambukisa yo ni dungu yo, ho i aimi yo ni, mi ape fugo kuti yo a.

¹¹Mi aasadi manga yo i gberẽ ngbayo yo, nimbusa yo dedede rogo abambutiria yo dunduko; mi ki rungosi yo da rogo abaakporo nga ga kura aringara a, bambiko wa mi azingi kuti yo bakere gbe.

¹²“Were wa mi anunga ku Damaseke yo na gu pai be re abairamotumo aasia pa ha fere,

¹³bebere uru, bakindo, mi abi imarago ngbangbaturũ yo gene yo, nga gu susi ima uru, si ahasi rago pati rani kirikiri na agu yo ani anunga na yo.

¹⁴Ho ani ati ni ku sande dunduko, mi ki gi fugo si niya fere rogo pa Ebere yo, ‘Saura, Saura, tipagine mo narungosi re ti ni? kpakara si mo para akpakara foro.’

¹⁵Mi ki ya, ‘Da nga mo Gbia?’ Gbia ki ya, ‘Mi nga Yesu nga gu ko mo narungosi ko.

¹⁶Ono mo gúari, ki ru ku ngba nduro; bambiko mi yugu tire foro tipa gi pai re, nga, mi sa ro ni ira manga pa agu apai mo nibi re ti ni, na agu apai mi mkayugo tire foro ti ni, mi ki sa ro ni dezirehe a;

¹⁷ki batasi ro be aboro na aGendiria ― nga agu yo mi nakeda ro koyo du yo ni.

¹⁸Mo zá bangiriyo, i sa tiyo ti bitimo ku imarago yo, ti ga Satana tandu koyo du Mbori ni, i gbandaka gayo ingaapai, i ki di kumbo dagba agu yo i nasa yo ni ziazia yo mbiko ida pa re.’

¹⁹“Were Aguripa, bakindo, mi akeretu nga fu gu yuguyugupai naye ngbangbaturũ yo te.

²⁰Ono mi agumba pa ha fu agu yo mbata du Damaseke yo, na Yerusarema yo, na rogo ringara Yuda dunduko, ki gumba ha fu aGendiria a, ya i sa gayo berã ki sa tiyo fu Mbori, ki nimangi agu apai rengbe na saberã.

²¹Bambiko gere, aYudo azi re ti ni yekaru yo i ki asadi imo re.

²²Were mi naru da areme nidu ni dezirehe fu rungorungo aboro na aboro kumuko a, bambiko mi di gu undahe nga ga Mbori, mi agumba nga kungba pai te kina gu anebi aya na Mose si aye:

²³ya, Kristo ahi pai, ya ko azínga be kpio ni bambata yo ki tungusi pa imarago fu aboro na aGendiria.”

²⁴Wa ko agumba gako pai ni were, Feseto ki poi ku ari, ya, “Pauro, iranzanga nga mo; ga bakere tatamana pai nasa ro ni nzanga.”

²⁵Ono Pauro ki ya, “Ako Feseto ngba mo gbe, iranzanga nga mi te; mi natungusa agu apai nga rengo na zezeredi pai.

²⁶Bambiko bakindo ini pa agi apai re, ko mi agumba ha fu ko zukazuka a: bambiko mi berẽ he ni rengo ya agi apai re adu nga ni okooko ho ti ko wa sa te; bambiko i amanga nga gere ni gbuko te.

²⁷Ako Aguripa, bakindo, mo idi pa anebi? Mi ini ya mo idi pa yo.”

²⁸Aguripa ki ya fu Pauro, “Mo nakpi nyemu ka sa re ni Kristano ni toni zungadihe!”

²⁹Pauro ki ya, “Watadu toni he na bakere he, mi nakpi nyemu he fu Mbori ya mo du wa kina re, kina ro ni sa ro a te, ono agu yo nagia pa re areme dunduko a, ono ka oni du nga ni vodivodi roni ya.”

³⁰Bakindo ki ru ku ari, na banyaki, na Berunike, na agu yo nasungu na yo.

³¹Ho i andu ni ku sa yo, i ki gumba pai dagba yo ki ya, “Gi kumba amanga nga pai re rengbe na kpi ko na vo ko wa sa te.”

³²Aguripa ki ya fu Feseto, “Ka gi kumba akpara nga fu Kaisara re ya, ka i kusi ko.”