Read zande Amokedi 28 Bible Online

Amokedi 28 - zande bible

Amokedi 28

¹Ho ani abati ni, ani ki ini ya gu kisanga re, rimoho nga Merita.

²Aboro gu kisanga re ki nimangi pa rani bakere gbe, bambiko i aginda we, ki di rani ku gume, bambiko mai ana, na zere.

³Ho Pauro adungura asakiri ni ki moi he ku we yo, kere wo ki kuru mbiko faa we, ki ka kuti beko.

⁴Ho aboro abi gu gbiro ni re naasi ti beko, i ki ya dagba yo, “Gi kumba re nga baimiboro ni rengo, ko vura bata be baime vurũ, rurupai aida nga fu ko ko nye ni ungako te.”

⁵Ono ko azanzia gu gbiro re ku we yo, ka pai amanga nga ko ya.

⁶Ono i aberẽ ya watadu ko ahi ahi, na ko ati ni kpio ni ipo. Ono ho i asungudi he ni gbe, ka i abi nga pai namanga ko ya, i ki sa gayo berã ki ya, “Mbori nga ko!”

⁷Were rogo gu ringara re mbembedi aati adu nangia ga bazogo kisanga, rimoko angia Puberiu; ko adi rani ku gume, ki nimangi pa rani rame ki du biata wenengaĩ.

⁸Were ba Puberiu api auru ba be kazari na ngana. Pauro ki rimi koyo du ko ni, ki kpari, ki moi beko auru ko ki husi ko.

⁹Ho gi amangi ni re, kura aboro kaza nadu kisanga yo ki ye a, ko ki husi yo.

¹⁰I ki irisi rani ni dungu apai a. Ho ani aye ka ndu kurungba yo ni, i ki moi agu ahe zingoho amanga rani ku rogo kurungba.

¹¹Fuo diwi biata ani ki ndu rogo bakurungba Aresanduria nanye kisanga yo ti rago zere; kpia rihe nangia Abi.

¹²Ani ki da ku Sarakusa yo, ki sungu yo rame biata.

¹³Ani ki ndu yo kirikiri ki da ku Regio yo: rame ki du sa yuge ki ye pavururago yo, gu ue rame ani ki da ku Puteori yo:

¹⁴yo ani abi awirina ni, i ki zungadi rani ani sungu na yo rame saba. Were ani ki da ku Roma yo.

¹⁵Ho awirina agi parani ni, i ki ye daku ga Apio Bangbeahe yo na ku Asinziri Biata yo ka ngbisa rani yo; ho Pauro abi yo ni, ko ki tambua Mbori ki ngarã.

¹⁶Ho ani arimi ni ku Roma yo, i ki idi fu Pauro ya ko sungu ni sako na kina gu banzengere naabanda ko.

¹⁷Were fuo rame biata ko ki yambu bakumba aYudo i tiria tiyo. Ho i adungura tiyo ni, ko ki ya fu yo, “Awirinami, mi amanga nga pai kuti aboro na sino abarani wa sa te, ono i afu re Yerusarema yo ku be aRomo.

¹⁸I, ho i awisigi re ni i ki nikpi nyemu kusa re, bambiko i abi nga gu pai kuti re rengbe na kpi mi te.

¹⁹Ono ho aYudo agumba pai ni kuti ni, mi ki mo ka kpara fu Kaisara ― ono si tipa kita ngbanga ngbatungare te.

²⁰Si du mi azungadi roni ti ni oni ye ka bi re ki fura na mi; bambiko mi du ni vovo re ni agi azogbo re mbiko gu maabangirise nga ga aYisaraere.”

²¹I ki ya fu ko, “Waraga pa ro aye nga Yuda yo fu rani te, agu awirina naye yo i agumba nga pangbangaro ki gumba gbegberẽpai kuti ro a te.

²²Ono ani nakpi nyemu gia gu pai mo aberã ha: bambiko gi rika pai re, ani ini ya i nagumba pai kuti ni rogo zegino dũ.”

²³I ki ye ku rogo gako bambu yo ni dungu yo, ni gu rago i aringbisi he fu ko: ko ki ringbisi pai fu yo nigumba pa ga Mbori ngbi, nizungadi yo tipa Yesu, rogo ga Mose rugute na pa anebi a, wiso kina kuti nyemu.

²⁴Agu yo ki idi agu apai i agumba, agu yo ki basa ha.

²⁵Ho i adarĩ kangu ni dagba yo, i aguari fuo pe Pauro gi pai sa re, ya, “Ziazia Toro agumba pai ni rengo ku ngba gu nebi nga Yesaya fu abaron:

²⁶ya, ‘Mo ndú koyo du agi aboro ni re, ki ya, Oni agía pai agia, ono oni arúga nga tironi na ni wa sa te; oni angéra angera ono oni abí nga he wa sa te.

²⁷Bambiko kpoto gi rika aboro yo re asa tihe ni dokoyo ho, tuyo ni ngbangbangba ha, i kisi bangiriyo; i ka bi he ni bangiriyo, ki gi pai ni tuyo, ki rugu tiyo na ni kpotoyo yo, ki sa tiyo berewe, mi ki husi yo.’

²⁸Were oni ini gere aina, ya, gi bata nga ga Mbori re i nakeda ha fu aGendiria; i agía ha agia a.” [

²⁹Ho ko agumba agi apai ni re, aYudo ki guari, ki nisaki pai dagba yo bakere.]

³⁰Ko ki sungu ti gu bambu ko anafu marã tipa ha kuti garã ue, ki di agu yo dunduko nandu koyo du ko ni ku gume,

³¹nitungusi pa ga Mbori ngbi, niyugu pai tipa Gbia Yesu Kristo zukazuka, a nga boro sa naza ko ti ni te.