Read zande Amokedi 3 Bible Online

Amokedi 3 - zande bible

Amokedi 3

¹Were Petero ki nidakpa na Yoane ku yekaru yo rago kpe, saa biata nga ga nyemu nadu.

²Iki aka kumba i avungu ko na gbarã, i ki nizogo ko na uru pati gu ngbadimo yekaru i aniya ti ni Wenehe, ko nio ahe be agu aboro nanarima ku yekaru yo.

³Ko ki ta bi aPetero na Yoane i niye ka rima ku yekaru yo ko ki o he.

⁴APetero ki ngana ko na Yoane, ki ya, “Mo bí rani.”

⁵Ko ki gi payo ki ya tigu i nikafu he fu ko.

⁶Ono Petero ki ya, “Marã be re te; gu he du be re si mi afu foro. Ni rimo Yesu Kristo nga boro Nazareta; mo nitá.”

⁷Ko ki zi ko ti kumbabeko, ki tumba ko ku ari; nduko ki du na ome ni ba sa na nguku nduko.

⁸Ko ki guari ku ari, ki ru, ki tona ta; i ki rimi na ko ku yekaru yo, ko ki ta ndu niguku, nitambua Mbori.

⁹Aboro ki bi ko dunduko ko ki ta ata nitambua Mbori.

¹⁰I ki ini ko ya ko du nasungu ka o ahe pati Wene Ngbadimo yekaru. Si ki niiriwo airiwo ti yo i ki nibaki bangiriyo abaka ti gu pai namangi fu ko.

¹¹Wa ko aka kuti be aPetero na Yoane, aboro ki tiria atiria koyo du yo ni dunduko ku rogo gu gbanga ngbadimo i aniya ti ni, Ga Soromo, moaki bangiriyo abaka ni rengo.

¹²Ho Petero abi yo ni, ko ki ya fu aboro, “Aboro aYisaraere tipagine oni abaka bangironi ti ni ti gi kumba re? Tipagine oni angana rani ti ni, wa ka ani niya ni gaani tandu na wene ringirani ko nita?

¹³Ga a Abarayama Mbori na ga Yisaka aga Yakoba, nga ga abarani Mbori, ko taasi rimo Wiriko nga Yesu, ko, oni afu ko ki oro rimoko barangba Pirato ho ko aya ni ko nikakusa ko.

¹⁴Oni ki oro rimo gu Ziazia Ruru Boro, ki sana he i fu kina baimia boro fu roni,

¹⁵ki imi Iraunga; Mbori azingisi ko dagba akangba. Ani nga adezirehe.

¹⁶Mbiko ida pa rimo Yesu, gi kumba anyaki ti ni re, gu ko bi oni ko re ki ini ko. Gu ida pa rimo Yesu ko aidi si fu gi wene zereda fu ko re ku bangironi dunduko.

¹⁷“Were awirinami, mi ini ya oni amangi he ka oni aruga nga tironi na ni ya, a wa abazogoroni amangi he.

¹⁸Ono agu apai Mbori ayugu mbata ku ngba anebi dunduko ya, gako Kristo ahi pai a, si ko adigisi he were.

¹⁹Oni zúngadi tironi bambiko gere ki sa tironi berewe, i gbandaka gaoni ingaapai, zereda ye yo du Gbia ni,

²⁰ko kedi Kristo gu ko Mbori amoi ko fu roni nga Yesu.

²¹Ko ngbangbaturũ nadi ko adia dati rago mbakada arago dũ, si Mbori agumba paha ku ngba gako ziazia anebi nadu ho rago aenge ni daku awere.

²²Mose aya tigu, ‘Gbia Mbori Ko asá nebi fu roni dagba awirinaroni wa mi; oni ki nigi agu apai agia dunduko ko nikaagumba paha fu roni.

²³Gu boro nikaagia nga pa gu nebi re ya i aímo ni aimo dagba aboro yo.’

²⁴Ii, agu anebi dunduko tona ti Samuere na agu yo du fuo ko, a wa i anagumba pai, i agumba pa gi rago re a.

²⁵Oni nga awiri anebi, nga awiri gu ndika Mbori aru fu abaroni, ki ya fu Abarayama, ‘Rogo wiro yo i ka fu maku ni fu ngbatunga aboro zegino dunduko.’

²⁶Mbori nasa gako moyambu ki kedi ko koyo du oni ni mbata, ko fu maku fu roni nisa roni dunduko ti gaoni ingaapai.”