Read zande Amokedi 4 Bible Online

Amokedi 4 - zande bible

Amokedi 4

¹I ki ta gumba ha fu aboro, aboromotumo ki ye fuo yo, na baira yekaru na aSadoke,

²ngbaduyo aima aima bambiko i atungusa pa zinga dagba akangba mbiko Yesu.

³I ki moi be ti yo ki kisi yo ku wiso; bambiko nyemu nadu.

⁴Ono agu aboro nagi he i ki idi pa ha ni dungu yo: akumba ki du tie wa ka i du 5,000.

⁵Rago ki ya giri gayo abazogo ki dungura tiyo ku Yerusarema yo na ga aYudo abaakumba a abakeapai.

⁶Ana nangia gbiamotumo ko ki du kina ho na aKayafa, na Yoane, a Aresanduro, na agu yo dunduko nangia agume gbiamotumo.

⁷Ho i amoi yo ni dagba yo, i ki sana yo ki ya, “Gini tandu mangi oni gi pai na ni re, ni rimo da?”

⁸Petero ki ya fu yo, ko nahi be Ziazia Toro; “Abazogo aboro na ga aYudo abaakumba,

⁹ka oni sasana rani areme tipa gu wene pai i amangi fu ngbundangbunda kumba ya gi kumba abati be gini he re;

¹⁰ka oni ini dunduko na aboro a Yisaraere dunduko, ya, ru gi kumba re erẽ barangba roni zezeredi mbiko rimo Yesu Kristo nga boro Nazareta, gu ko oni awagi ko, Mbori ki zingisi ko dagba akangba, mbiko ko du.

¹¹Ko nga gu mbia oni ambu, oni nga abadua ha, gu i amangi ni gu wene kikii mbia nidu pangbaha.

¹²I abata nga mbiko kura boro te; bambiko kura rimo zegino fu yo ku dagba aboro ani abata mbiko ho te.”

¹³Were ho i abi gu ngarã ni nga ga aPetero na Yoane ki ini ya i du nga ni tatamana aboro ni airainahe te, si ki niiriwo airiwo ti yo, i ki sana yo ki ini ya i anidu na Yesu.

¹⁴I ki ya bi gu kumba nahu ko ru na yo, ka si adu nga wa ka i gumba pai kuti ni wa sa ya.

¹⁵Ono ho i aya ni fu yo i kuru dagba abororondo yo, i ki nisaki he asaka dagba yo,

¹⁶niya, “Gine ani ka manga agi aboro na ni re? Bambiko agu aboro dunduko ninaima ku Yerusarema yo, i ini ya i mangi gu pai i aina pai ti ni rogo agi yo re ni rengo; ka ani ti nga kangu he te.

¹⁷Ono ka si gbandaka nga dagba aboro ya, ani serẽ yo aserã, ka i agumba nga pai fu boro ni gi rimo re fuo gere wa sa ya.”

¹⁸I ki yambu yo, ki rugu yo ya ka i gúmba nga pai niyúgu pai ni rimo Yesu wa sa ya.

¹⁹APetero ki karaga ha fu yo na Yoane ki ya. “Si ngia gia gaoni pai bakere ti ga Mbori ru bangiriko, kina roni na ni;

²⁰bambiko gaani nga kina gumba agu apai ani abi nigi he.”

²¹Ho i aserẽ yo ni berewe, i ki he yo i ga, ka i aina nga gu pai ka i mbusi yo ti ni ya, bambiko aboro ataasi rimo Mbori ataasa dunduko bambiko gupainamangi.

²²Bambiko garã gu kumba i amangi gi iiriwo hu ti ko re, si asusi 40.

²³Ho i ahe yo ni, i ki ye koyo du akurayo ni ki peke gu pai dunduko abairamotumo agumba fu yo na ga aYudo abaakumba.

²⁴Ho i agi he ni, i ki poi kina ku bani ku ari fu Mbori, ki ya, “Ako Gbia, mo namangi ngbangbaturũ na sende na baime na ahe dunduko rogo yo.

²⁵Mo aya rogo Ziazia Toro yo, ku ngba barani nga Dawidi vururo, ‘Tipagine aGendiria azingi ti ni, rika aboro a ki niberẽ pa ruka?

²⁶Abakindo zegino atangara tiyo, abazogo aboro ki zugadi tiyo, kuti Gbia, kuti gako Mbedimbedi Boro a’,

²⁷bambiko rogo gi bakporo re aErode azugadi ni na Pondio Pirato na aGendina na aboro aYisaraere, ku ti ziazia vururo Yesu ni rengo, gu ko mo ambedi ko,

²⁸ka manga agu apai dunduko bero aya mbata na ga tatamana si ye.

²⁹Awere, Gbia, mo bí gayo serãhe, ki idi fu gamo amoyambu i ta peka ga pai apeka zukazuka gbe,

³⁰mo nitãi bero ka ahusa aboro; agu apai ki du ni mangimangi he i aina apai ti ni, na iiriwo apai ni rimo ziazia vururo Yesu.”

³¹Ho i akpari ni, gu ba i azugadi ku rogo si ki du ni zigizozigizo ho; i ki hiki ahika be Ziazia Toro dunduko, i ki nipeke ga Mbori pai apeka zukazuka.

³²Rimbasa agu yo naidi pai i ki du kpotoyo yo kina ku bani; a nga boro sa naya gu he sa dagba agu ahe nadu be ni, gani nga ha te; ono si du adu ni gayo dunduko.

³³Amokedi ki gumba gayo pai ni dezire na bakere tandu tipa zinga Gbia Yesu be kpio; bakere undahe ki du adu ri yo dú.

³⁴Bambiko a nga boro sa nadu dagba yo na zingo ahe te; bambiko agu yo dunduko aati adu be yo na abambu i ababagi he ababaga i ki ye na marã agu ahe i ababagi,

³⁵ki zozogo ho pati ndu amokedi. I ki gagamu he fu yo ki nifu kina gu fu gu ni zingo ho anamanga ni.

³⁶Yosefa, amokedi aya ti ko Barunaba, (si wa ka i ya, Wiri ngbanya), Revi nangia ko, ngbatungako nangia boro Kupurio,

³⁷ati adu be ko, ko ki bagi he, ki ye na marãha ki zogo ho pati ndu amokedi.